ଭୁବନେଶ୍ୱର (ବ୍ୟୁରୋ)/ଯାଜପୁର ଅଫିସ/ବନ୍ତ(ଡି.ଏନ୍.ଏ.), ୧୭।୧୧:ବିପୁଳ ବୈଦେଶିକ ଟଙ୍କା ଆୟର ମାଧ୍ୟମ ପାଲଟିଛି ଚାଇଲ୍ଡ ଏବଂ ଆଡଲ୍ଟ ପର୍ନ ଭିଡିଓ। ଓ୍ବେବ୍ସାଇଟରେ ଶିଶୁମାନଙ୍କ ଅଶ୍ଳୀଳ ଭିଡିଓ ଅପ୍ଲୋଡ କରାଯାଉଛି। ଟେଲିଗ୍ରାମ୍ ଓ ହ୍ବାଟ୍ସଆପ୍ରେ ଏହାକୁ ପ୍ରସାରଣ କରାଯାଉଥିବା ନେଇ ଦେଶର ବିଭିନ୍ନ ସ୍ଥାନରୁ ଅଭିଯୋଗ ଆସିବାପରେ ସିବିଆଇ ଗତ ୧୪ ତାରିଖରେ ୮୩ଜଣଙ୍କ ବିରୋଧରେ ୨୩ଟି ପୃଥକ୍ ମାମଲା ରୁଜୁ କରିଥିଲା। ଏହି କ୍ରମରେ ମଙ୍ଗଳବାର ଓଡ଼ିଶା ସମେତ ୧୪ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ୭୬ ସ୍ଥାନରେ ସିବିଆଇ ଚଢ଼ାଉ କରିଛି। ଓଡିଶାର ଯାଜପୁର ଜିଲା ପାଣିକୋଇଲି ଥାନା ଅନ୍ତର୍ଗତ କେଉଟଲଗୁଁଆର ଅନିଲ ମାଝି, ଭଦ୍ରକ ବନ୍ତ ବ୍ଲକ ବିନାୟକପୁର ଗ୍ରାମର ମନୋଜ ଦାସ ଏବଂ ଢେଙ୍କାନାଳର ସୁରେନ୍ଦ୍ର ନାୟକଙ୍କ ଘରେ ଏହି ଚଢ଼ାଉ କରାଯାଇଛି। ତେବେ ଢେଙ୍କାନାଳରେ ଚଢ଼ାଉବେଳେ ସିବିଆଇ ଅଧିକାରୀଙ୍କୁ ମାଡ଼ ମରାଯାଇଥିବା ଅଭିଯୋଗ ହୋଇଛି। ଓଡ଼ିଶା ବ୍ୟତୀତ ଆନ୍ଧ୍ରପ୍ରଦେଶ, ଦିଲ୍ଲୀ, ଉତ୍ତରପ୍ରଦେଶ, ପଞ୍ଜାବ, ବିହାର, ତାମିଲନାଡୁ, ରାଜସ୍ଥାନ, ମହାରାଷ୍ଟ୍ର, ଗୁଜରାଟ, ହରିୟାଣା, ଛତିଶଗଡ଼, ମଧ୍ୟପ୍ରଦେଶ, ହିମାଚଳ ପ୍ରଦେଶ ଆଦିର ୭୬ଟି ସ୍ଥାନରେ ଚଢ଼ାଉ ଜାରି ରହିଛି ବୋଲି ସିବିଆଇର ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
ମିଳିଥିବା ସୂଚନା ଅନୁସାରେ ଯାଜପୁର ଜିଲା କୋରେଇ ବ୍ଲକ ଗୋଳେଇପୁର ପଞ୍ଚାୟତ ଅଧୀନ କେଉଟଲଗୁଁଆ ଗ୍ରାମର ଅନିଲ ମାଝୀଙ୍କ ଘର ଉପରେ ମଙ୍ଗଳବାର ସିବିଆଇର ଏକ ୫ଜଣିଆ ଟିମ୍ ପୂର୍ବାହ୍ନ ୧୦ଟାରେ ଚଢ଼ାଉ କରିଥିଲେ। ଅଭିଯୁକ୍ତ ଅନିଲ ଜଣେ କମ୍ପ୍ୟୁଟର ସଫ୍ଟଓ୍ବେର ମେକାନିକ ଭାବେ କାର୍ଯ୍ୟ କରୁଥିବା ଜଣାପଡ଼ିଛି। ଦୀର୍ଘ ସମୟ ଯାଞ୍ଚ ପରେ ତାଙ୍କଠାରୁ ଗୁରୁତ୍ୱପୂର୍ଣ୍ଣ କାଗଜ ଓ ମୋବାଇଲ ଫୋନ ଜବତ କରାଯାଇଛି। ତଦନ୍ତ ଜାରି ରହିଥିବାରୁ ଚଢ଼ାଉରେ ସାମିଲ ଅଧିକାରୀମାନେ କୌଣସି ପ୍ରତିକ୍ରିୟା ଦେବାକୁ ମନା କରିଥିଲେ ସୁଦ୍ଧା ଆବଶ୍ୟକ ପଡ଼ିଲେ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରାଯିବ ବୋଲି ଜଣେ ଅଧିକାରୀ ସୂଚନା ଦେଇଛନ୍ତି। ସେହିପରି ଭଦ୍ରକ ଜିଲା ବନ୍ତ ବ୍ଲକ ଗଣିଜାଙ୍ଗ ପଞ୍ଚାୟତ ବିନାୟକପୁର ଗ୍ରାମରେ ମଙ୍ଗଳବାର ସକାଳେ ସିବିଆଇର ୫ଜଣିଆ ଟିମ୍ ମନୋଜଙ୍କ ଘରେ ଚଢ଼ାଉ କରିଥିଲା। ସିବିଆଇ ଇନ୍ସପେକ୍ଟର ପି.କେ. ମିଶ୍ରଙ୍କ ନେତୃତ୍ୱରେ ଅଧିକାରୀମାନେ ଅଭିଯୁକ୍ତ ମନୋଜଙ୍କ ଘର ଖାନତଲାସ ସମେତ ମୋବାଇଲ, କମ୍ପ୍ୟୁଟର ଆଦି ଯାଞ୍ଚ କରିଛନ୍ତି। ଅଭିଯୁକ୍ତଙ୍କୁ ଜେରା ପରେ ସିବିଆଇ ଟିମ୍ ତାଙ୍କ ମୋବାଇଲ ଜବତ କରିଛି। ସନ୍ଧ୍ୟା ୬ଟା ପର୍ଯ୍ୟନ୍ତ ଏହି ଚଢ଼ାଉ ଜାରି ରହିଥିଲା। ମନୋଜ ବଙ୍ଗାଲୋରରେ ଚାକିରି କରୁଥିଲେ। ସେଠାରେ ଏକ ହ୍ବାଟସ୍ଆପ୍ ଗ୍ରୁପ ଖୋଲା ଯାଇଥିଲା। ଏହି ଗ୍ରୁପରେ ମନୋରଞ୍ଜନଙ୍କ ସମେତ ୪୮ଜଣ ସଦସ୍ୟ ଥିଲେ। ସେତେବେଳେ ଏହି ଗ୍ରୁପ ମାଧ୍ୟମରେ ଶିଶୁ ଯୌନ ଉତ୍ପୀଡ଼ନ ଭିତ୍ତିକ ଫଟୋ ଓ ଭିଡିଓ ଛଡ଼ା ଯାଉଥିବା ଅଭିଯୋଗ ହୋଇଛି। ୫ବର୍ଷ ତଳେ ମନୋଜ ଘରକୁ ଚାଲି ଆସି ବିବାହ କରିବା ସହ ଅଟୋ ଚଳାଇ ଜୀବିକା ନିର୍ବାହ କରୁଥିବା ସୂଚନା ମିଳିଛି।
