ଚିତ୍ରକୋଣ୍ଡା,୨୨ା୫(ଡି.ଏନ୍.ଏ.): ମାଲକାନଗିରି ଜିଲା ପ୍ରଶାସନ ଜିଲାରୁ ବାଲ୍ୟ ବିବାହ ରୋକିବାକୁ ଅନେକ ସଚେତନତା କାର୍ଯ୍ୟକ୍ରମ କରୁଛନ୍ତି। ମାତ୍ର ଚିତ୍ରକୋଣ୍ଡା ବ୍ଲକର ସ୍ବାଭିମାନ ଅଞ୍ଚଳରେ ଏହାର ପ୍ରଭାବ ବିଶେଷ ଭାବେ ପଡୁ ନ ଥିବା ଜଣାପଡିଛି।ଉକ୍ତ ଅଞ୍ଚଳର ରାଲେଗଡ଼ା଼ ପଞ୍ଚାୟତରେ ଅଧିକ ପରିମାଣରେ ବାଲ୍ୟ ବିବାହ ହେଉଥିବା ଅଭିଯୋଗ ହେଉଛି l ୧୩/୧୪ ବର୍ଷର ଝିଅମାନଙ୍କୁ ବିବାହ କରାଯାଉଛି। କେଉଁଠି ନା କେଉଁଠି ରହୁଥିବା ସମସ୍ୟା ବାଲ୍ୟବିବାହକୁ ପ୍ରୋତ୍ସାହିତ କରୁଛି। ଏନେଇ ଗ୍ରାମବାସୀ, ଜନ ପ୍ରତିନିଧିମାନେ ନୀରବ ରହୁଥିବା ଦେଖିବାକୁ ମିଳୁଛି। ସ୍ବାଭିମାନ ଅଞ୍ଚଳର ବହୁ ପଞ୍ଚାୟତର ଅନେକ ଗ୍ରାମ ଓଡ଼ିଶା ସୀମାନ୍ତ ଆନ୍ଧ୍ରକୁ ଲାଗି ରହିଥିବାରୁ ଏହି ଅଞ୍ଚଳରେ ଅଧିକ ପରିମାଣରେ ବାଲ୍ୟବିବାହ ହେଉଥିବା ଅଭିଯୋଗ ହେଉଛି l ଗତ ଏକ ମାସ ମଧ୍ୟରେ ସ୍ବାଭିମାନ ଅଞ୍ଚଳ ପଣସପୁଟ ପଞ୍ଚାୟତ ପଣସପୁଟ ଗ୍ରାମର ଜଣେ ୧୪ ବର୍ଷୀୟା ନାବାଳିକାଙ୍କ ନୂଆଗୁଡ଼ା ପଞ୍ଚାୟତ ଆର୍ଏସ୍ସି ୧୩ ନମ୍ବର ଗ୍ରାମର ଜଣେ ବ୍ୟକ୍ତିଙ୍କ ସହ ବିବାହ ହୋଇଛି। ସେହିପରି ଅଳ୍ପ ଦିନ ହେଲା ରାଲେଗଡ଼ା ପଞ୍ଚାୟତ ସାକୃବନ୍ଧା ଗ୍ରାମର ଜଣେ ଯୁବକଙ୍କ ସହ ସେହି ପଞ୍ଚାୟତ ତାଟିପାର ଗ୍ରାମର ଜଣେ ୧୪ ବର୍ଷର ଝିଅ ସହିତ ବାଲ୍ୟବିବାହ କରାଯାଇଥିଲା। ଏହା ଜାଣିବା ପରେ ସିଡିପିଓ ପବିତ୍ର ହାଜରା ପାପରମେଟେଲା ଥାନା ସହଯୋଗରେ ବିବାହକୁ ରୋକିଥିଲେ।
ସେହିଭଳି ୫ଦିନ ତଳେ ଅଣ୍ଡିରାପାଲି ପଞ୍ଚାୟତ କୋଡ଼ିଗନ୍ଧି ଗ୍ରାମର ଜଣେ ୧୪ ବର୍ଷୀୟା ଝିଅର ମାତାପିତାଙ୍କ ଅନିଚ୍ଛା ସତ୍ତ୍ୱେ ରାଲେଗାଡ଼ା ଗ୍ରାମର ଜଣେ ଯୁବକ ବିବାହ ପାଇଁ ନେଇଯାଇଛନ୍ତି। ଆଇସିଡିଏସ୍ ପକ୍ଷରୁ ଏହି ବିବାହ ବନ୍ଦ ଉଦ୍ୟମ କରାଯାଉଛି। ଏ ସମ୍ପର୍କରେ ରାଲେଗାଡ଼ା ସରପଞ୍ଚ କମଳୁ ହନ୍ତାଳଙ୍କୁ ପଚାରିବାରୁ ପଞ୍ଚାୟତରେ ଦୁଇଟି ବାଲ୍ୟବିବାହକୁ ରୋକିଛୁ। ପଞ୍ଚାୟତର ଗ୍ରାମ ସ୍ତରରେ କାମ କରୁଥିବା କେତେଜଣ ସରକାରୀ କର୍ମଚାରୀ ଗ୍ରାମରେ ରହି କାମ କରୁନାହାନ୍ତି। ଯଦି ରହୁଛନ୍ତି କେଉଁ ଗ୍ରାମରେ କିଛି ଏଭଳି ଘଟଣା ଘଟିଲେ ନ ଜଣାଇ ନୀରବ ରହିଯାଉଛନ୍ତି ବୋଲି ସରପଞ୍ଚ ହନ୍ତାଳ ଅଭିଯୋଗ କରିଛନ୍ତି। ସେହିଭଳି ମାଲକାନଗିରି ଜିଲା ପରିଷଦ ଅଧ୍ୟକ୍ଷା ସମାରି ତାଙ୍ଗୁଲଙ୍କୁ ପଚାରିବାରୁ ବାଲ୍ୟବିବାହରେ ରୋକ ଲାଗିବା ଆବଶ୍ୟକ। ଯେଉଁଠି ଏଭଳି ଘଟଣା ଘଟିଲେ ଦୃଢ଼ ପଦକ୍ଷେପ ନିଆଯିବ।
