ନୂଆଦିଲ୍ଲୀ,୧୨।୬(ପି.ଟି.): କର୍ନାଟକ ମୁଖ୍ୟମନ୍ତ୍ରୀ ଡି. କେ. ଶିବକୁମାର ଗୁରୁବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଛନ୍ତି । ଉଭୟ ନେତାଙ୍କ ମଧ୍ୟରେ ରାଜ୍ୟର ବିକାଶମୂଳକ ପ୍ରାଥମିକତା ଉପରେ ଏକ ଗଠନମୂଳକ ଆଲୋଚନା ହୋଇଛି। ୩ ଜୁନ୍ର ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ପ୍ରଧାନମନ୍ତ୍ରୀଙ୍କ ସହ ଶିବକୁମାରଙ୍କର ଏହା ପ୍ରଥମ ସାକ୍ଷାତ୍ ଥିଲା। ପିଏମ୍ଓ ‘X’ ରେ ଏକ ପୋଷ୍ଟ କରି କହିଛି, ‘କର୍ନାଟକର ମୁଖ୍ୟମନ୍ତ୍ରୀ ଶିବକୁମାର ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଛନ୍ତି’।
ଶିବକୁମାର କହିଛନ୍ତି, ଭିତ୍ତିଭୂମି, ପୁଞ୍ଜିନିବେଶ, ସହରୀ ଗତିଶୀଳତା, ଜଳସେଚନ, ଅଭିନବତ୍ୱ ଏବଂ ଲୋକଙ୍କ ଜୀବନକୁ ପ୍ରଭାବିତ କରୁଥିବା କଲ୍ୟାଣକାରୀ ଯୋଜନା ସମେତ କର୍ନାଟକର ବିକାଶମୂଳକ ପ୍ରାଥମିକତା ଉପରେ ମୋଦିଙ୍କ ସହ ତାଙ୍କର ସକାରାତ୍ମକ ଆଲୋଚନା ହୋଇଛି। ସେ ‘X’ ରେ ଏକ ପୋଷ୍ଟରେ କହିଛନ୍ତି, “କର୍ନାଟକର ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ପ୍ରଥମ ଥର ପାଇଁ ନୂଆଦିଲ୍ଲୀରେ ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଲି“। ଶିବକୁମାର କହିଛନ୍ତି, କର୍ନାଟକ ସର୍ବଦା ଭାରତର ଅଭିବୃଦ୍ଧିରେ ଏକ ପ୍ରମୁଖ ଯୋଗଦାନକାରୀ ରହିଆସିଛି।
ବିକାଶକୁ ତ୍ୱରାନ୍ବିତ କରିବା, ଅଧିକ ସୁଯୋଗ ସୃଷ୍ଟି କରିବା ଏବଂ କର୍ନାଟକବାସୀଙ୍କ ଆଶା ଓ ଆକାଂକ୍ଷାକୁ ପୂରଣ କରିବା ପାଇଁ ସହଯୋଗୀ ସଂଘୀୟ ବ୍ୟବସ୍ଥାର ଆଭିମୁଖ୍ୟ ନେଇ କେନ୍ଦ୍ର ସରକାରଙ୍କ ସହ ମିଶି କାମ କରିବାକୁ ସେ ଆଶାବାଦୀ ବୋଲି ଶିବକୁମାର କହିଛନ୍ତି। ନୀତି ଉଲ୍ଲେଖଯୋଗ୍ୟ, ନୀତି ଆୟୋଗ ଗଭର୍ନିଂ କାଉନ୍ସିଲର ୧୧ତମ ବୈଠକରେ ଯୋଗଦେବା ପାଇଁ ଶିବକୁମାର ଦିଲ୍ଲୀରେ ଅଛନ୍ତି ।