ନୂଆଦିଲ୍ଲୀ,୨୨।୫: କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବୟସକୁ ନେଇ କଟାକ୍ଷ କରିଥିଲେ। ଏବେ ନବୀନ(୭୭) ବୃଦ୍ଧାବସ୍ଥାରେ ପହଞ୍ଚିଥିବାରୁ ଅବସର ନେବା ଉଚିତ ବୋଲି ସେ କହିଥିଲେ। ଏପରି କହି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶାହା ସଙ୍କେତ ଦେଇଥିବା କଂଗ୍ରେସ କହିଛି।
କଂଗ୍ରେସର ବରିଷ୍ଠ ନେତା ପି ଚିଦାମ୍ବରମ୍ ଶାହା ଦେଇଥିବା ମନ୍ତବ୍ୟକୁ ନେଇ ଏକ୍ସରେ ପୋଷ୍ଟ କରି କହିଛନ୍ତି, ଯେତେବେଳେ ଅମିତ ଶାହା କହିଥିଲେ ଯେ ‘ବୃଦ୍ଧାବସ୍ଥା(୭୭ ବର୍ଷ)ହୋଇଥିବା ଯୋଗୁ ନବୀନ ପଟ୍ଟନାୟକ ଅବସର ନେବା ଉଚିତ, ସେତେବେଳେ କ’ଣ ସେ ନରେନ୍ଦ୍ର ମୋଦି(୭୩ ବର୍ଷ ୭ ମାସ)ଙ୍କୁ କିଛି ସଙ୍କେତ ଦେଉଛନ୍ତି– ଯଦି ଭାଜପା ସରକାର ଗଠନ କରେ?’
ଏହାଛଡ଼ା ଶାହା ପ୍ରଧାନମନ୍ତ୍ରୀଙ୍କ ଚେୟାର ନିଜେ ନେବାକୁ ଇଚ୍ଛୁକ। ତାଙ୍କ ବୟାନରୁ ଜଣାପଡ଼ୁଛି ଯେ ଭାଜପା ସରକାର ଗଠନ ନ କଲେ ମଧ୍ୟ ବିରୋଧୀ ଦଳର ନେତା ଭାବେ ଶାହା ସବୁଠାରୁ ଅଧିକ ଖୁସି ହେବେ ବୋଲି ଚିଦାମ୍ବରମ୍ ମଧ୍ୟ କହିଛନ୍ତି।
