ରାୟପୁର, ୨୬ା୫: ଛତିଶଗଡ଼ର ଜଣେ ସରକାରୀ ବାବୁଙ୍କ ମୋବାଇଲ୍ ଫୋନ୍ ଜଳଭଣ୍ଡାରରେ ଖସିପଡ଼ିବାରୁ ଚାଷଜମିକୁ ଜଳସେଚନ ପାଇଁ ଉଦ୍ଦିଷ୍ଟ ଲକ୍ଷାଧିକ ଗ୍ୟାଲୋନ୍ ପାଣିକୁ ଶୁଖାଇ ଦିଆଯାଇଛି। ପମ୍ପ ଲଗାଇ ଜଳ ନିଷ୍କାସନ କରିବାକୁ ୩ ଦିନ ଲାଗିଯାଇଛି। ଉକ୍ତ ପାଣିରେ ୧,୫୦୦ ଏକର ଜମି ଜଳସେଚିତ ହୋଇପାରିଥାନ୍ତା। ସରକାରୀ ବାବୁଙ୍କ ଏଭଳି ବେପରୁଆ କାର୍ଯ୍ୟକୁ ବିଭିନ୍ନ ମହଲରେ ନିନ୍ଦା କରାଯିବା ପରେ ତାଙ୍କୁ ଚାକିରିରୁ ନିଲମ୍ବିତ କରାଯାଇଛି।
କୋୟାଲିବେଡ଼ା ବ୍ଲକ୍ରେ ଖାଦ୍ୟ ନିରୀକ୍ଷକ ଥିବା ରାଜେଶ ବିଶ୍ୱାସ ଗତ ରବିବାର ଛୁଟି କଟାଇବା ପାଇଁ ଖେର୍କଟ୍ଟା ପାରାଲକୋଟ୍ ଜଳଭଣ୍ଡାରକୁ ବୁଲିଯାଇଥିଲେ। ଏହି ସମୟରେ ତାଙ୍କର ୯୬ ହଜାର ଟଙ୍କା ମୂଲ୍ୟର ସାମ୍ସଙ୍ଗ ଏସ୍୨୩ ମୋବାଇଲ୍ ଫୋନ୍ ୧୫ ଫୁଟ୍ ଗଭୀର ଜଳଭଣ୍ଡାରରେ ଖସିପଡ଼ିଥିଲା। ସଙ୍ଗେ ସଙ୍ଗେ ବିଶ୍ୱାସ ଜଳସେଚନ ବିଭାଗ ନିକଟରେ ପହଞ୍ଚତ୍ ଫୋନ୍କୁ କିପରି ଉଦ୍ଧାର କରାଯିବ ସେ ନେଇ ଆଲୋଚନା କରିଥିଲେ। ଶେଷରେ ଜଳଭଣ୍ଡାର ଶୁଖାଇବା ପାଇଁ ୩୦ ହର୍ସପାଓ୍ବାରର ଏକ ପମ୍ପକୁ ନିୟୋଜିତ କରାଯାଇଥିଲା। ଏହି ପମ୍ପରେ ଦିନକୁ ୨୧ ଲକ୍ଷ ଜଳ ନିଷ୍କାସିତ ହେଉଥିବାବେଳେ ଜଳଭଣ୍ଡାର ଶୁଖାଇବାକୁ ସମ୍ପୂର୍ଣ୍ଣ ୩ ଦିନ ଲାଗିଯାଇଥିଲା। ମୋଟ ୪୧,୧୦୪ ଘନମିଟର ଜଳ ନିଷ୍କାସନ ହେବା ପରେ ଫୋନ୍ ମିଳିଲା ହେଲେ ତାହା କାର୍ଯ୍ୟକ୍ଷମ ଅବସ୍ଥାରେ ନାହିଁ। ବିଭିନ୍ନ ମହଲରେ ସମାଲୋଚନା ହେବା ପରେ ଜଳସେଚନ ପାଇଁ ଉକ୍ତ ପାଣି ଉପଯୁକ୍ତ ନ ଥିଲା ବୋଲି ବିଶ୍ୱାସ କହିଛନ୍ତି। ତାଙ୍କ ବ୍ୟକ୍ତିଗତ ମୋବାଇଲ ଫୋନ୍ରେ ବହୁ ଗୁରୁତ୍ୱପୂର୍ଣ୍ଣ ଯୋଗାଯୋଗ ନମ୍ବର ଥିବାରୁ ଉଦ୍ଧାର କରିବା ପାଇଁ ସେ ଚାହିଥିଲେ ବୋଲି ସଫେଇ ଦେଇଛନ୍ତି।
