କଲମ୍ବୋ,୨୩।୭: ଭାରତ-ଶ୍ରୀଲଙ୍କା ମଧ୍ୟରେ ଚାଲିଥିବା ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ର ଶେଷ ମ୍ୟାଚ୍ ଶୁକ୍ରବାର ଆର୍ ପ୍ରେମଦାସା ଷ୍ଟାଡିୟମରେ ଖେଳାଯାଉଛି। ଶିଖର ଧାଓ୍ବନ ନେତୃତ୍ୱାଧୀନ ଟିମ୍ ଇଣ୍ଡିଆ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଛି। ଭାରତୀୟ ଦଳରେ ୬ ପରିବର୍ତ୍ତନ କରାଯାଇଛି। ସେଥିରେ ୫ ଜଣ ଡେବ୍ୟୁ କରିଛନ୍ତି। ତେବେ ପାଞ୍ଚଜଣ ଖେଳାଳିଙ୍କ ମଧ୍ୟରୁ ଜଣେ ଏବେ ଚର୍ଚ୍ଚାରେ ରହିଛନ୍ତି। ସେ ହେଲେ ଚେତନ ସାକାରିଆ। ଏହି ଯୁବ ବାମହାତୀ ବୋଲରଙ୍କ ପାଇଁ ଡେବ୍ୟୁର ଯାତ୍ରା ସେତେଟା ସହଜ ନ ଥିଲା। ବିଶେଷକରି ତାଙ୍କ ଘରର ଆର୍ଥିକ ସ୍ଥିତି ସ୍ବଚ୍ଛଳ ନ ଥିଲା। ଚଳିତ ବର୍ଷ ସେ ନିଜର ସାନ ଭାଇଙ୍କୁ ଓ ପରେ ନିଜର ବାପାଙ୍କୁ ହରାଇଥିଲେ। ହେଲେ ସାକାରିଆ ପ୍ରଥମେ ଆଇପିଏଲ୍ରେ ରାଜସ୍ଥାନ ରୟାଲ୍ସ ପକ୍ଷରୁ ଡେବ୍ୟୁ କରିଥିଲେ। ଏବେ ତାଙ୍କୁ ଭାରତୀୟ ଦିନିକିଆ ଟିମ୍ରେ ଖେଳିବାର ସୁଯୋଗ ମିଳିଛି।
ଆଇପିଏଲ୍ରେ ଖେଳି ଅନେକ ଖେଳାଳି ଭାରତୀୟ ଟିମ୍ରେ ସ୍ଥାନ ପାଇଛନ୍ତି। ପ୍ରତି ସିଜନରେ କାହାକୁ ନା କାହାକୁ ସେଭଳି ସୁଯୋଗ ମିଳେ। ଚଳିତ ଥର ସାକାରିଆଙ୍କୁ ସେହି ସୁଯୋଗ ମିଳିଛି। ଚଳିତ ବର୍ଷ ଘରୋଇ କ୍ରିକେଟରେ ସେ ଭଲ ପ୍ରଦର୍ଶନ କରିଥିଲେ। ଏଥିପାଇଁ ପ୍ରଥମେ ଆଇପିଏଲ୍ରୁ ତାଙ୍କୁ ଡାକରା ଆସିଥିଲେ। ସେଠାରେ ଭଲ ଖେଳିବା ପରେ ଏବେ ତାଙ୍କ ପାଇଁ ରାଷ୍ଟ୍ରୀୟ ଟିମ୍ର ଦ୍ୱାର ଖୋଲିଯାଇଛି। ଶ୍ରୀଲଙ୍କା ଗସ୍ତ ପାଇଁ ତାଙ୍କର ଚୟନ କରାଯାଇଛି।
ସାକାରିଆ ଆଇପିଏଲ୍ ପୂର୍ବରୁ ନିଜର ସାନ ଭାଇଙ୍କୁ ହରାଇଥିଲେ। ଏହାପରେ ଭାରତୀୟ ଟିମ୍ରେ ଚୟନ ପୂର୍ବରୁ ତାଙ୍କର ବାପାଙ୍କ ନିଧନ ହୋଇଥିଲା। ଏହି କାରଣରୁ ସେ ଦଳରେ ସୁଯୋଗ ପାଇବାର ଖୁସିରେ ଉତ୍ସବ ପାଳନ କରି ନ ଥିଲେ। ଏପରିକି ଶ୍ରୀଲଙ୍କା ଗସ୍ତରେ ଯଦି ଭଲ କରନ୍ତି ତେବେ ତାଙ୍କ ବାପାଙ୍କୁ ଖୁସି ହେବ ବୋଲି କହିଥିଲେ।
