ଦୁବାଇ,୧୬।୧୦: ଶେଷ ହୋଇଛି ଆଇପିଏଲ୍ ୨୦୨୧। ଶୁକ୍ରବାର ଚେନ୍ନାଇ ସୁପର କିଙ୍ଗ୍ସ ଏବଂ କୋଲକାତା ନାଇଟ୍ ରାଇଡର୍ସ ମଧ୍ୟରେ ଫାଇନାଲ ମୁକାବିଲା ଖେଳାଯାଇଥିଲା। ଏଥିରେ ଟସ୍ ହାରିଥିଲା ଚେନ୍ନାଇ। ପ୍ରଥମେ ବ୍ୟାଟିଂ କରି ଦଳ ୨୦ ଓଭରରେ ୧୯୨ ରନ୍ କରିଥିଲା। ବିଜୟ ଲକ୍ଷ୍ୟ ୧୯୩ ରନ୍ର ପିଛା କରି ବିଫଳ ହୋଇଥିଲା କେକେଆର୍। ଫଳରେ ୨୭ ରନ୍ରେ ବିଜେତା ହୋଇଥିଲା ଚେନ୍ନାଇ। ଚତୁର୍ଥ ଥର ପାଇଁ ଟାଇଟଲ୍ ହାତେଇଥିଲା ଦଳ। ଏହାପରେ ଟିମ୍କୁ ୨୦ କୋଟି ଟଙ୍କାର ପୁରସ୍କାର ମିଳିଥିଲା। ସେହିଭଳି ରନର୍ସ ଅପ୍ ଟିମ୍ କେକେଆର୍କୁ ୧୨.୫ କୋଟି ଟଙ୍କା ମିଳିଥିଲା। ଏହାଛଡ଼ା ଟୁର୍ନାମେଣ୍ଟରେ ସର୍ବଶ୍ରେଷ୍ଠ ପ୍ରଦର୍ଶନ କରିଥିବା ଖେଳାଳିମାନଙ୍କୁ ଟ୍ରଫି ସହ ୧୦ ଲକ୍ଷ ଲେଖାଏ ପୁରସ୍କାର ରାଶି ପ୍ରଦାନ କରାଯାଇଥିଲା।
ଆଉ ଦିନ କେଇଟାରେ ଟି-୨୦ ବିଶ୍ୱକପ୍ ଆରମ୍ଭ ହେବାକୁ ଯାଉଥିବା ଭିନ୍ନ କାରଣକୁ ନେଇ ଏହା ଚର୍ଚ୍ଚାରେ ରହିଛି। ସେଇଟି ହେଲା ବିଶ୍ୱକପ୍ ବିଜେତା ଟିମ୍କୁ ମିଳୁଥିବା ପୁରସ୍କାର ରାଶି। ବିଶ୍ୱକପ୍ ଜିତିଥିବା ଦଳକୁ ପ୍ରାୟ ୧୨ କୋଟି ଟଙ୍କା ମିଳିବ ବୋଲି କିଛି ଦିନ ପୂର୍ବେ ଆଇସିସି ପକ୍ଷରୁ ଘୋଷଣା କରାଯାଇଥିଲା। ସେହିଭଳି ରନର୍ସ ଅପ୍ ଟିମ୍କୁ ୬ କୋଟି ଟଙ୍କା ମିଳିବ। ଏଣୁ ଚେନ୍ନାଇକୁ ଯେତିକି ଟଙ୍କା ମିଳିଛି ତାହା ବିଶ୍ୱକପ୍ ବିଜେତା ଏବଂ ରନର୍ସ ଅପ୍କୁ ମିଳୁଥିବା ମୋଟ ରାଶିଠାରୁ ୨ କୋଟି ଅଧିକ ବୋଲି ଚର୍ଚ୍ଚା ହେଉଛି।
