ବାଙ୍ଗାଲୁରୁ,୧୫।୨: ଆଗାମୀ ଆଇପିଏଲ ପାଇଁ ବେଙ୍ଗାଲୁରୁରେ ଆୟୋଜିତ ମେଗା ଅକ୍ଶନରେ ଭେଟେରାନ ବ୍ୟାଟ୍ସମ୍ୟାନ ସୁରେଶ ରାଇନାଙ୍କୁ କୌଣସି ଫ୍ରାଞ୍ଚାଇଜ କିଣି ନାହାନ୍ତି। ଏପରିକି ତାଙ୍କ ପୁରୁଣା ଫ୍ରାଞ୍ଚାଇଜ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ମଧ୍ୟ ରାଇନାଙ୍କୁ କିଣିବାକୁ ଇଚ୍ଛା ପ୍ରକଟ କରି ନ ଥିଲା। ଏହାର ପଛର କାରଣ କହିଛନ୍ତି ଫ୍ରାଞ୍ଚାଇଜ ସିଇଓ କାସି ବିଶ୍ୱନାଥ।
ସିଏସ୍କେ ପକ୍ଷରୁ ୟୁଟ୍ୟୁବରେ ଶେୟାର କରାଯାଇଥିବା ଭିଡିଓରେ ବିଶ୍ୱନାଥ କହିଛନ୍ତି, ଦୀର୍ଘ ୧୨ ବର୍ଷ ହେଲା ସିଏସ୍କେ ପାଇଁ ଲଗାତାର ଭଲ ପ୍ରଦର୍ଶନ କରୁଛନ୍ତି ରାଇନା। ତାଙ୍କୁ ଦଳରେ ସାମିଲ ନ କରିବା ଆମ ପାଇଁ କଷ୍ଟକର ନିଷ୍ପତ୍ତି ଥିଲା। କିନ୍ତୁ ଦଳର କମ୍ପୋଜିଶନ ପାଇଁ ଆମକୁ ଏଭଳି ନିଷ୍ପତ୍ତି ନେବାକୁ ପଡ଼ିଥିଲା। ଆମେ ତାଙ୍କ ଅନୁପସ୍ଥିତି ଅନୁଭବ କରିବୁ। ତାଙ୍କ ବ୍ୟତୀତ ୧୦ ବର୍ଷ ହେଲା ଆମ ସହ ଯୋଡ଼ି ହୋଇଥିବା ଫାଫ ଡୁପ୍ଲେସିଙ୍କ ଅନୁପସ୍ଥିତି ମଧ୍ୟ ଅନୁଭବ କରିବୁ।
ସିଏସ୍କେ ବୋଲିଂ କୋଚ୍ ଲକ୍ଷ୍ମୀପତି ବାଲାଜି କହିଛନ୍ତି, ଦଳର ଟ୍ରାନ୍ସଫରମିଂ ପାଇଁ ସମୟ ଆସିଯାଇଛି। ମୁଁ ନିଶ୍ଚିତ ଯେ, କିଛି ଯୁବ ଖେଳାଳି ସେମାନଙ୍କ ସ୍ଥାନ ନେବେ। ଆମ ସେଟ୍ ଅପ୍ରେ ଯୁବ ଖେଳାଳିମାନେ ପରବର୍ତ୍ତୀ ପିଢ଼ିର ସୁପରଷ୍ଟାର ହୋଇ ବାହାରିବେ। ଏଣୁ ମୁଁ ଆସନ୍ତା ସିଜନ ପାଇଁ ପ୍ରତ୍ୟେକଙ୍କୁ ଶୁଭକାମନା ଦେଉଛି।
