ସ୍ବାମୀ-ସ୍ତ୍ରୀଙ୍କ ମଧ୍ୟରେ ହେଉଥିବା ଛୋଟ ଛୋଟ କଥାକୁ ନେଇ ଝଗଡା ସମ୍ପର୍କରେ ତିକ୍ତତା ଆଣିଥାଏ। ମନୋମାଳିନ୍ୟତ ସବୁଠି ହୋଇଥାଏ ହେଲେ ସାମନ୍ୟ ବଚସାରୁ ଆରମ୍ଭ ଝଗଡା ଉଗ୍ର ରୂପ ନେଲେ କୋର୍ଟ ଯାଏଁ କଥା ପହଞ୍ଚିବା ନିଶ୍ଚୟ ଶୁଣିଥିବେ। ନିକଟରେ ସ୍ବାମୀ-ସ୍ତ୍ରୀଙ୍କ ମଧ୍ୟରେ ହୋଇଥିବା ଝଗଡା ଏପରି ହେଲା ଯେ, ସ୍ବାମୀ ଜଣକ ୨୦ଟି ଗାଡି ଭାଙ୍ଗିଦେଇଛନ୍ତି। କଥାଟି ଶୁଣିଲେ ଆଶ୍ଚର୍ଯ୍ୟ ଲାଗୁଥାଇପାରେ ହେଲେ ଏପରି ସତରେ ଘଟିଛି।
ଚେନ୍ନାଇରେ ରହୁଥିବା ଜଣେ ବ୍ୟକ୍ତିଙ୍କର ତାଙ୍କ ସ୍ତ୍ରୀଙ୍କ ସହ ସାମାନ୍ୟ କଥାରୁ କଥା କଟାକଟି ଆରମ୍ଭ ହୋଇଥିଲା। ଝଗଡା ପରେ ସେ ଏତେ ବ୍ୟତିବ୍ୟସ୍ତ ହୋଇପଡିଲେ ଯେ, ରାଗରେ ୧-୨ ନୁହେଁ ୨୦ଟି ଗାଡି ଭାଙ୍ଗିଦେଇଛନ୍ତି। ସୂଚନା ଅନୁଯାୟୀ, ଚେନ୍ନାଇର କୋଲାଥୁରର ସେକେଣ୍ଡ ହ୍ୟାଣ୍ଡ ଗ୍ୟାରେଜରେ ଏହି ସମସ୍ତ ଗାଡି ପାର୍କିଂ କରାଯାଇଥିଲା ଏବଂ ସେହି ବ୍ୟକ୍ତିଙ୍କ ଘର ସେହି ଶୋ’ରୁମ ନିକଟରେ ଥିଲା। ସୋମବାର ସକାଳେ ଶୋ’ରୁମର ମାଲିକ ଗାଡିଗୁଡିକର ଏପରି ଅବସ୍ଥା ଦେଖି ତୁରନ୍ତ ପୋଲିସ ନିକଟରେ ଅଭିଯୋଗ କରିଥିଲେ।
ଅଭିଯୋଗ ପରେ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଉକ୍ତ ଅଞ୍ଚଳରୁ ସିସିଟିଭି ଫୁଟେଜ ପାଇ ତଦନ୍ତ ଆରମ୍ଭ କରିଥିଲା। ତଦନ୍ତରେ ଜଣାପଡିଥିଲା ବ୍ୟକ୍ତି ଜଣକ ହେଉଛନ୍ତି ବୁବାଲାନ। ପୂର୍ବରୁ ସେ ସହରର ଏକ ନିଶା କେନ୍ଦ୍ରରେ ଥିଲେ ଏବଂ ସେ ସେଠାରେ ଚିକିତ୍ସିତ ହେଉଥିଲେ। ଘଟଣାର ଦୁଇ ଦିନ ପୂର୍ବରୁ ସେଠାରୁ ସେ ଫେରିଥିଲେ। ଏହାପରେ ପୋଲିସ ତାଙ୍କୁ ଗିରଫ କରିଛି।
ଯେତେବେଳେ ପୋଲିସ କୋର୍ଟରେ ବୁବାଲାନଙ୍କୁ ହାଜର କଲା। ସେ କହିଛନ୍ତି, ମୋ ସ୍ତ୍ରୀ ମୋତେ ଠକୁଛନ୍ତି ସେଥିପାଇଁ ତାଙ୍କ ସହ ଝଗଡା ହୋଇଥିଲା। ଏହାପରେ ମୁଁ ରାଗିଯାଇ ପାର୍କିଂରେ ଥିବା ସବୁ ଗାଡି ଭାଙ୍ଗି ଦେଇଥିଲି। ବ୍ୟକ୍ତିଜଣକ ଏବେ ପୋଲିସ ହେପାଜତରେ ଅଛନ୍ତି।
