ପୁରୀ ଅଫିସ, ୨୫ା୧୧: ଶ୍ରୀମନ୍ଦିର ପ୍ରଶାସନ ଅଧୀନସ୍ଥ ନୀଳାଚଳ ଭକ୍ତ ଓ ଯାତ୍ରୀ ନିବାସରେ ଭକ୍ତଙ୍କୁ ରୁମ୍ ଦେବା ନାମରେ ସାଇବର ଲୁଟେରା ଠକୁଥିବା ନେଇ କିଛିଦିନ ତଳେ ଅଭିଯୋଗ ହୋଇଥିଲା। ଏଭଳି ଘଟଣା ଲୋକଲୋଚନକୁ ଆସିବା ପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ଏନେଇ ଶ୍ରୀମନ୍ଦିର ପ୍ରଶାସନ ଗୁରୁବାର ସାଇବର ଥାନାର ଦ୍ୱାରସ୍ଥ ହୋଇଛି।
ଭକ୍ତନିବାସ ଓ ଯାତ୍ରୀନିବାସରେ ରୁମ୍ ବୁକିଂ ନାଁରେ ଠକେଇ ହେଉଛି। ଏଥିଲାଗି ‘ଗୋ ଡାଡି ସାଇଟ୍ସ’ରେ ନୀଳାଚଳ ଭକ୍ତନିବାସ-୮୯ ନାମକ ଏକ ଫେକ୍ ଆଇଡି ଖୋଲାଯାଇଛି। ଏହି ଫେକ୍ ଆଇଡିକୁ ପ୍ରମୋଦ ଶାହା ନାମକ ବ୍ୟକ୍ତି ଖୋଲିଥିବା ସୂଚନା ମିଳିଛି। ପ୍ରାୟ ୫ଜଣ ଭକ୍ତ ଏହି ଆଇଡିରେ ରୁମ୍ ବୁକ୍ କରି ଠକେଇର ଶିକାର ହୋଇଥିଲେ। ସେମାନେ ଏ ନେଇ ଟାଉନ୍ ଥାନରେ ଅଭିଯୋଗ କରିଥିଲେ। ଏହି ଘଟଣା ଶ୍ରୀମନ୍ଦିର ପ୍ରଶାସନ ନଜରକୁ ଆସିଛି। ଯାତ୍ରୀମାନେ ଅନ୍ୟ କୌଣସି ୱେବସାଇଟରେ ରୁମ୍ ବୁକ୍ ନ କରି ଶ୍ରୀମନ୍ଦିର ପ୍ରଶାସନର ଅଫିସିଆଲ୍ ୱେବ୍ସାଇଟ୍ https://shreejagannath.in ଏବଂ https://stayatpurijagannath.inକୁ ଯାଇ ଶ୍ରୀମନ୍ଦିର ପ୍ରଶାସନ ଅଧୀନରେ ଥିବା ସମସ୍ତ ଯାତ୍ରୀନିବାସରେ ଅନଲାଇନ ମାଧ୍ୟମରେ ରୁମ୍ ବୁକ୍ କରିପାରିବେ। ଏଥିରେ ସମସ୍ତ ଯାତ୍ରୀ ନିବାସର ଫୋନ ନମ୍ବର ଓ ମ୍ୟାନେଜରଙ୍କ ଫୋନ୍ ନମ୍ବର ଉପଲବ୍ଧ ରହିଛି। ଏଣୁ ଅଲଗା ସାଇଟ୍କୁ ଯାଇ ରୁମ୍ ବୁକ୍ କରିବାର କୌଣସି ଆବଶ୍ୟକ ନାହିଁ ବୋଲି ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି। ରୁମ୍ ବୁକ୍ ନାଁରେ ଅନ୍ଲାଇନ ଠକେଇ ନେଇ ସାଇବର ଥାନାରେ ଅଭିଯୋଗ ହୋଇଥିବା ବେଳେ ପୋଲିସ ଶୀଘ୍ର କାର୍ଯ୍ୟାନୁଷ୍ଠାନ ନେବ ବୋଲି ଶ୍ରୀମନ୍ଦିର ପ୍ରଶାସନ ଆଶା ରଖିଛି।
