ବଇଣ୍ଡା,୧୦ା୧୨ (ପରିକ୍ଷିତ ସାହୁ): ମାସ ମାସର ହାଡ଼ଭଙ୍ଗା ପରିଶ୍ରମ। ତା’ ସାଙ୍ଗକୁ ବ୍ୟାଙ୍କ ଋଣର ବୋଝ। ଏସବୁ ସତ୍ତ୍ୱେ ଫଳାଇଥିବା ଫସଲରୁ ଚାଷୀଙ୍କୁ ମିଳିପାରୁନି ଲାଭ। ଖଟାଇଥିବା ଅର୍ଥ ଫେରିପାଇବା ତ ଦୂରର କଥା, ବରଂ ସହିବାକୁ ପଡ଼ୁଛି କ୍ଷତି। ସରକାର ଶୀତଳଭଣ୍ଡାର ନିର୍ମାଣ ଦିଗରେ ପଦକ୍ଷେପ ନେଉ ନ ଥିବାରୁ ଉତ୍ପାଦିତ ବନ୍ଧାକୋବିକୁ ସଂରକ୍ଷିତ ରଖି ନ ପାରି ଶସ୍ତାରେ ବିକିବାକୁ ବାଧ୍ୟ ହେଉଛି ଚାଷୀ। ଏହାକୁ ନେଇ ଅନୁଗୋଳ ଜିଲା କିଶୋରନଗର ବ୍ଲକର କୋବି ଚାଷୀଙ୍କ ମଧ୍ୟରେ ଦେଖାଦେଇଛି ଅସନ୍ତୋଷ।
କିଶୋରନଗର ବ୍ଲକର ଜାମୁନାଳି, ହଣ୍ଡପା, କଣ୍ଟେଇକୋଳିଆ ପଞ୍ଚାୟତର ୩୦୦ ହେକ୍ଟର ଜମିରେ ଚଳିତବର୍ଷ କୋବି ଚାଷ କରାଯାଇଛି। ଭଲ ଫସଲ ହୋଇଥିବାରୁ ଅଧିକ ଲାଭ ମିଳିବ ବୋଲି ଆଶା ବାନ୍ଧିଥିଲେ ଚାଷୀ। ହେଲେ ବାହାର ରାଜ୍ୟର କୋବି ବଜାରକୁ ଅକ୍ତିଆର କରିନେବାରୁ ଉତ୍ପାଦନ ତୁଳନାରେ ବନ୍ଧା କୋବି ଚାହିଦା ହ୍ରାସ ପାଇଛି। ଫଳରେ ଉତ୍ପାଦନ ପାଇଁ ଗୋଟା ପ୍ରତି ୧୦ ଟଙ୍କା ଖର୍ଚ୍ଚ କରିଥିବା ଚାଷୀ ଗୋଟିଏ ଲେଖାଏ କୋବିକୁ ୫ ଟଙ୍କାରେ ବିକ୍ରି କରିବାକୁ ଏକପ୍ରକାର ବାଧ୍ୟ ହେଉଛି। ଏପରି କି କେତେଜଣ ଚାଷୀ ୩ଟି କୋବିକୁ ୧୦ ଟଙ୍କାରେ ବ୍ୟବସାୟୀଙ୍କ ହାତକୁ ଟେକିଦେଉଥିବା ଦେଖାଯାଉଛି। ଏପରି ଶସ୍ତାରେ ଫସଲ ବିକ୍ରି ହେଉଥିବାରୁ ବ୍ୟଙ୍କ ଋଣ କିପରି ଶୁଝିବେ ତାହାକୁ ନେଇ ଚିନ୍ତାରେ ପଡ଼ିଛନ୍ତି କଣ୍ଟେଇକୋଳିଆ ପଞ୍ଚାୟତର ଇଚ୍ଛାପୁର, ଅଁଳାବେରେଣୀ, କଣ୍ଟେଇକୋଳିଆ, ଜାମୁନାଳୀ ପଞ୍ଚାୟତର ମଧପୁର, ଜାମୁନାଳି, ଖଣ୍ଡବର, ଅଶ୍ରୁବାହାଳ, ହଣ୍ଡପା ପଞ୍ଚାୟତର ହିଞ୍ଜିରିଡା, ପ୍ରତାପପୁର, ହଣ୍ଡପା, ଚାକୁଣ୍ଡାମୁଣ୍ଡା ଆଦି ଗ୍ରାମର ଚାଷୀ। ସରକାରଙ୍କ ପକ୍ଷରୁ କୋବି ଚାଷୀଙ୍କୁ ସବ୍ସିଡ ଯୋଗାଇ ଦିଆଯାଉଥିବା ବେଳେ ଏହି ପଞ୍ଚାୟତର ଅନେକ ଚାଷୀ ସେହି ସୁବିଧାରୁ ବଞ୍ଚିତ ରହିଥିବା ଅଭିଯୋଗ କରିଛନ୍ତି। ସେହିପରି ହାତୀ ଉପଦ୍ରବ ପାଇଁ ମଧ୍ୟ ଚାଷୀମାନେ ବହୁ କ୍ଷତି ସହୁଛନ୍ତି। ବଇଣ୍ଡାଠାରେ ଏକ ଶୀତଳ ଭଣ୍ଡାର ନିର୍ମାଣ ନିମନ୍ତେ ବଇଣ୍ଡା ଗ୍ରାମବାସୀ ଓ କୃଷକ ସଙ୍ଗଠନ ପକ୍ଷରୁ ୨ ନଭେମ୍ବର ୨୦୧୭ ଓ ୨୩ ମେ ୨୦୨୧ରେ ସ୍ଥାନୀୟ ବିଧାୟକଙ୍କ ଠାରୁ ଆରମ୍ଭ କରି କୃଷି ମନ୍ତ୍ରୀ, ଅନୁଗୋଳ ଜିଲାପାଳ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଥିଲା। ହେଲେ ଏ ଦିଗରେ ଏଯାଏ କୌଣସି ପଦକ୍ଷେପ ନିଆଯାଇ ନାହିଁ। ଫଳରେ କୋବି ଚାଷୀମାନେ ବିପୁଳ ପରିମାଣର କ୍ଷତି ସହୁଥିବାରୁ ସେମାନଙ୍କୁ କ୍ଷତିପୂରଣ ଦେବା ଓ ତୁରନ୍ତ ଶୀତଳ ଭଣ୍ଡାର ନିର୍ମାଣ ନିମନ୍ତେ କଣ୍ଟେଇକୋଳିଆର କୋବି ଚାଷୀମାୋନ ଗତ ୨୬ ତାରିଖରେ ଜିଲା ପ୍ରଶାସନ ନିକଟରେ ଦାବି କରିଛନ୍ତି। ଏ ସମ୍ପର୍କରେ ଉଦ୍ୟାନ ବିଭାଗ ସହକାରୀ ଅଧିକାରୀ ସ୍ବରାଜ୍ୟଲକ୍ଷ୍ମୀ ନାୟକ କହିଛନ୍ତି, ପରିବା ଚାଷ ପାଇଁ ସରକାରଙ୍କ ପକ୍ଷରୁ ବିଭିନ୍ନ ଯୋଜନାରେ ସାମଗ୍ରୀମାନ ଯୋଗାଇ ଦିଆଯାଉଛି। କୋବି ଚାଷୀଙ୍କୁ ହେକ୍ଟର ପିଛା ୨୦ ହଜାର ଟଙ୍କା ସବ୍ସିଡ ପ୍ରଦାନ କରାଯାଉଛି।
ରାଜ୍ୟ ସରକାରଙ୍କୁ ଚିଠି କରାଯାଇଛି
ବଇଣ୍ଡାଠାରେ ଏକ ଶୀତଳ ଭଣ୍ଡାର ନିର୍ମାଣ ପାଇଁ ରାଜ୍ୟ ସରକାରଙ୍କୁ ଚିଠି ମାଧ୍ୟମରେ ଅବଗତ କରାଯାଇଛି। ଏହି ଅଞ୍ଚଳର ଶତାଧିକ ହେକ୍ଟରରେ ପରିବା ଚାଷ ହେଉଥିବାରୁ ଉତ୍ପାଦିତ ଫସଲକୁ ସଂରକ୍ଷିତ କରି ରଖିବା ପାଇଁ ଶୀତଳଭଣ୍ଡାର ଜରୁରୀ ବୋଲି ଚିଠିରେ ଦର୍ଶାଯାଇଛି।
-ରମେଶ ଚନ୍ଦ୍ର ସାଏ, ବିଧାୟକ, ଆଠମଲ୍ଲିକ
ସରକାର କ୍ଷତିଭରଣା କରନ୍ତୁ
କୋବି ଚାଷରେ ଯେତିକି ଅର୍ଥ ଖର୍ଚ୍ଚ ହେଉଛି ସେତିକି ବିକ୍ରିରୁ ଆସୁନାହିଁ। ଉତ୍ପାଦନ ଅଧିକ ହେଉଥିବାରୁ ଓ ବିକ୍ରି ଚାହିଦା ସେପରି ନ ଥିବାରୁ ଲାଭ ମିଳୁନାହିଁ। ହାତୀ ଉପଦ୍ରବ ଯୋଗୁ ମଧ୍ୟ ଅନେକ ସମୟରେ ଫସଲ ନଷ୍ଟ ହେଉଛି। ସରକାର କ୍ଷତି ପୂରଣ ଯୋଗାଇ ଦିଅନ୍ତୁ।
-କୃଷ୍ଣଚନ୍ଦ୍ର ସାହୁ, ଚାଷୀ, ଖଣ୍ଡବର
ସଂରକ୍ଷିତ ରଖାଯାଇପାରୁନି
ବଇଣ୍ଡାଠାରେ ଶୀତଳ ଭଣ୍ଡାର ନ ଥିବା ଯୋଗୁ ଚାଷୀମାନେ ଉତ୍ପାଦନ କରୁଥିବା କୋବିକୁ ସଂରକ୍ଷିତ କରି ପାରୁନାହନ୍ତି। ଫଳରେ ଖୁବ୍ କମ୍ ଦରରେ ପନିପରିବା ବିକ୍ରି କରିବାକୁ ବାଧ୍ୟ ହେଉଛନ୍ତି। ଏ ନେଇ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ ସୁଫଳ ମିଳୁନାହି।
-ଦୀନବନ୍ଧୁ ସାହୁ, ଚାଷୀ, ମଧପୁର
ଭଲ ଦର ମିଳିପାରୁନି
ବର୍ତ୍ତମାନ ଏହି ଅଞ୍ଚଳରେ ବହୁଳ ପରିମାଣରେ କୋବି ଚାଷ କରାଯାଇଛି। ଏହାସତ୍ତ୍ୱେ ବାହାର ରାଜ୍ୟରୁ କୋବି ବଇଣ୍ଡା ବେପାରୀଙ୍କ ନିକଟକୁ ଆସୁଛି। ତେଣୁ ସ୍ଥାନୀୟ ଚାଷୀଙ୍କୁ ଭଲ ଦର ମିଳିପାରୁ ନ ଥିବାବେଳେ ଏହାର ସୁଯୋଗ ନେଇ ବ୍ୟବସାୟୀମାନେ କମ୍ ମୂଲ୍ୟରେ ଚାଷୀଙ୍କ ଠାରୁ କୋବି କିଣୁଛନ୍ତି।
-ଅରବିନ୍ଦ ସାହୁ, ଚାଷୀ, କଣ୍ଟେଇକୋଳିଆ
ସରକାର ଶୀଘ୍ର ପଦକ୍ଷେପ ନିଅନ୍ତୁ
ବଇଣ୍ଡା ଅଞ୍ଚଳରେ ଏକ ଶୀତଳ ଭଣ୍ଡାର ନିର୍ମାଣ ପାଇଁ ପଞ୍ଚାୟତ ପକ୍ଷରୁ ପୂର୍ବରୁ ଅଭିଯୋଗ କରାଯାଇଛି। ଏହି ଅଞ୍ଚଳ ଉପଖଣ୍ଡର ମୁଖ୍ୟ ବ୍ୟାବସାୟିକ ପେଣ୍ଠସ୍ଥଳୀ ହୋଇଥିବାରୁ ବିଭିନ୍ନ ଅଞ୍ଚଳର ଚାଷୀ ଏହି ବଜାର ଉପରେ ନିର୍ଭର କରୁଛନ୍ତି। ତେଣୁ ଶୀଘ୍ର ଶୀତଳ ଭଣ୍ଡାର ନିର୍ମାଣ ନିମନ୍ତେ ସରକାର ପଦକ୍ଷେପ ନିଅନ୍ତୁ।
-ଦୀପ୍ତିମୟୀ ସାହୁ, ନୁନୁକାପଶି ସରପଞ୍ଚ
