ମେଲବୋର୍ନ, ୨୯ା୮ (ପି.ଟି.)-କ୍ରିକେଟ ଅଷ୍ଟ୍ରେଲିଆ (ସିଏ) ୨୦୨୦-୨୧ ସିଜନ ପାଇଁ ଏହାର ଘରୋଇ ଓ ଅନ୍ତର୍ଜାତୀୟ କ୍ୟାଲେଣ୍ଡରକୁ ଠିକଣା ରୂପେ ହାତେଇ ପାରୁ ନ ଥିବା କୁହାଯାଉଛି। ଏହି କାରଣରୁ ଚ୍ୟାନେଲ ସେଭେନ ୪୫୦ ନିୟୁତ ଡଲାର ମୂଲ୍ୟର କରିଥିବା ଚୁକ୍ତିରୁ ଓହରିଯିବା ଲାଗି ଧମକ ଦେଇଛି। ଚ୍ୟାନେଲ ସେଭେନ ୨୦୧୮ରେ କ୍ରିକେଟ ଅଷ୍ଟ୍ରେଲିଆ ସହ ୬ ବର୍ଷ ପାଇଁ ୪୫୦ ନିୟୁତ ଆମେରିକୀୟ ଡଲାରର ଏକ ଚୁକ୍ତି କରିଛି। ବ୍ରଡକାଷ୍ଟିଂ ସଂସ୍ଥା ଯଦି ଚୁକ୍ତିରୁ ଓହରିଯାଏ ତେବେ କ୍ରିକେଟ ଅଷ୍ଟ୍ରେଲିଆର ଆର୍ଥିକ ଅବସ୍ଥା ଆହୁରି ସଙ୍ଗୀନ ହୋଇ ପଡ଼ିବ। କୋଭିଡ୍-୧୯ ମହାକାରୀ ଯୋଗୁ ସମଗ୍ର ବିଶ୍ୱରେ କ୍ରୀଡ଼ା କାର୍ଯ୍ୟସୂଚୀରେ ଅନେକ ପରିବର୍ତ୍ତନ ଘଟିଛି। ଚ୍ୟାନେଲ ସେଭେନ ସିଜନର କ୍ୱାଲିଟିକୁ ନେଇ ଉଦ୍ବେଗ ପ୍ରକାଶ କରିଛି। ବିଶେଷ କରି ଭ୍ରମଣ କଟକଣା ଯୋଗୁ ବିଗ୍ ବାଶ୍ ଲିଗ୍ ପାଇଁ ଅନ୍ତର୍ଜାତୀୟ ଖେଳାଳିମାନେ ଉପଲବ୍ଧ ହେବେ ନାହିଁ। ବୋର୍ଡର କାର୍ଯ୍ୟସୂଚୀ ଅନୁସାରେ ଭାରତ ବିପକ୍ଷରେ ଅଷ୍ଟ୍ରେଲିଆ ୪ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଏବଂ ଆଫଗାନିସ୍ତାନ ବିପକ୍ଷରେ ଏକମାତ୍ର ଟେଷ୍ଟ ମ୍ୟାଚ ଖେଳିବ। ଏହାଛଡ଼ା ମହିଳା ଓ ପୁରୁଷ ବିଗ୍ବାଶ୍ ଟୁର୍ନାମେଣ୍ଟ ରହିଛି। କିନ୍ତୁ ସାମ୍ପ୍ରତିକ ପରିସ୍ଥିତିକୁ ନେଇ କଟକଣା ଉପରେ କ୍ରିକେଟ ଅଷ୍ଟ୍ରେଲିଆ ତରଫରୁ ଅଧିକ ସ୍ପଷ୍ଟ କରାଯିବା ଉଚିତ୍। ମ୍ୟାଚ ଓ ଟୁର୍ନାମେଣ୍ଟ ବେଳେ କ’ଣ ସବୁ କଟକଣା ରହିବ ସେ ନେଇ ପ୍ରତିଦିନ ଖବରକାଗଜରେ ଭିନ୍ନ ଭିନ୍ନ କଥା ପ୍ରକାଶ ପାଉଛି। ଅଷ୍ଟ୍ରେଲିଆର ଟି୨୦ ଓ ଦିନିକିଆ ଅଧିନାୟକ ଗୋଟିଏ କଥା କହୁଥିବା ବେଳେ କୋଚ୍ ଅନ୍ୟ ଏକ କଥା କହୁଛନ୍ତି। ଏଥର ଟୁର୍ନାମେଣ୍ଟରେ ଅନ୍ତର୍ଜାତୀୟ ଖେଳାଳିମାନଙ୍କୁ ଦେଖିବାକୁ ମିଳିବ ନାହିଁ ବୋଲି ବିବିଏଲ୍ ଫ୍ରାଞ୍ଚାଇଜ୍ଗୁଡ଼ିକ ଆଲୋଚନା କରୁଛନ୍ତି। ଚ୍ୟାନେଲ ସେଭେନ ମୁଖ୍ୟ ଜେମ୍ସ ଓ୍ବାରବର୍ଟନ ପୁଣି କହିଛନ୍ତ ଯେ, ଅଧିକ ମ୍ୟାଚ ଆୟୋଜନ କରିଦେଲେ ହେବନାହିଁ ଏହାର କ୍ୱାଲିଟି ଦରକାର। ଅନ୍ୟପକ୍ଷରେ କ୍ରିକେଟ ଅଷ୍ଟ୍ରେଲିଆର ସିଇଓ ନିକ୍ ହକ୍ଲି କହିଛନ୍ତି ବର୍ତ୍ତମାନ ବିଶ୍ୱ ସ୍ବାସ୍ଥ୍ୟ ସଙ୍କଟ ବେଳେ ଅନ୍ତର୍ଜାତୀୟ କାର୍ଯ୍ୟସୂଚୀ ଘୋଷଣା କରିବା ଏକ ପ୍ରକାର ଚ୍ୟାଲେଞ୍ଜ ସଦୃଶ।
