ପୁରୀ ଅଫିସ,୧୩।୫: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଢାଞ୍ଚାରେ ସାମାନ୍ୟ ପରିବର୍ତ୍ତନ କରାଯାଇଛି। ଏହି କ୍ରମରେ ଏଣିକି ନିଷିଦ୍ଧାଞ୍ଚଳ ବାହାରେ ଶ୍ରୀଜଗନ୍ନାଥ ଅଭ୍ୟର୍ଥନା କେନ୍ଦ୍ର ନିର୍ମାଣ କରାଯିବ। ଭୁବନେଶ୍ୱରସ୍ଥିତ ଓଡ଼ିଶା ସେତୁ ନିର୍ମାଣ ନିଗମର କନଫରେନ୍ସ ହଲ୍ରେ ବୁଧବାର ଗଜପତି ମହାରାଜାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ସାଂସ୍କୃତିକ ପରାମର୍ଶ କମିଟି ବୈଠକରେ ପ୍ରକଳ୍ପ ସମ୍ପର୍କରେ ସାନି ସମୀକ୍ଷା କରାଯିବା ପରେ ଏହି ନିଷ୍ପତ୍ତି ନିଆଯାଇଛି। ଅଧିଗ୍ରହଣ ହୋଇଥିବା ଜମିର ପରିମାଣକୁ ଦେଖି ଆଉଟର ଆସେସ୍ ରୋଡ୍ (ଓଏଆର୍) ଓସାର ନିର୍ଦ୍ଧାରଣ କରାଯାଇଛି। ପରିସ୍ଥିତି ସ୍ଥଳେ ଏହାର ସମ୍ପ୍ରସାରଣ କରାଯାଇପାରେ। ସେହିପରି ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସ୍ଆଇ) ମହାନିର୍ଦ୍ଦେଶକ (ଡିଜି)ଙ୍କ ପରାମର୍ଶ କ୍ରମେ ପରିକ୍ରମା ପ୍ରକଳ୍ପର ଢାଞ୍ଚାରେ ପରିବର୍ତ୍ତନ କରାଯାଇଛି। ଶ୍ରୀଜଗନ୍ନାଥ ଅଭ୍ୟର୍ଥନା କେନ୍ଦ୍ରକୁ ୧୦୦ ମିଟର ପରିଧିର ନିଷିଦ୍ଧାଞ୍ଚଳ ବାହାରକୁ ନେବାକୁ କମିଟି ନିଷ୍ପତ୍ତି ନେଇଛି। ଏହା ପରବର୍ତ୍ତୀ ୨ଶହ ମିଟରର ନିୟନ୍ତ୍ରିତ ଅଞ୍ଚଳରେ ନିର୍ମାଣ କରାଯିବ। ପୂର୍ବରୁ ଏହା ଶ୍ରୀମନ୍ଦିର ଚୌହଦିର ଶହେ ମିଟର ପରିଧି ମଧ୍ୟରେ ନିର୍ମାଣ କରାଯିବାକୁ ନିଷ୍ପତ୍ତି ହୋଇଥିଲା। ମାତ୍ର ଶ୍ରଦ୍ଧାଳୁଙ୍କ ମୌଳିକ ସୁବିଧା ଉଦ୍ଦେଶ୍ୟରେ ନିର୍ମାଣ ହେଉଥିବା ଭିତ୍ତିଭୂମି ଅଧୀନରେ ଏହା ନାହିଁ। ରାଜ୍ୟ ସରକାର ଜାତୀୟ ସ୍ମାରକୀ ପ୍ରାଧିକରଣ (ଏନ୍ଏମ୍ଏ) କର୍ତ୍ତୃପକ୍ଷଙ୍କଠାରୁ ଆଣିଥିବା ନୋ ଅବ୍ଜେକ୍ସନ ସାର୍ଟିଫିକେଟ୍ (ଏନଓସି) ତାଲିକାରେ ମଧ୍ୟ ଶ୍ରୀମନ୍ଦିର ଅଭ୍ୟର୍ଥନା କେନ୍ଦ୍ର ସମ୍ପର୍କରେ ଉଲ୍ଲେଖ ନାହିଁ। ନିଷିଦ୍ଧାଞ୍ଚଳରେ ଶ୍ରୀମନ୍ଦିର ଆଧ୍ୟାତ୍ମିକତାକୁ ଧ୍ୟାନରେ ରଖି ନିର୍ମାଣ କାର୍ଯ୍ୟ କରାଯିବ। ନିର୍ମାଣର ଢାଞ୍ଚାକୁ ସରଳ ରଖାଯିବ, ଯାହାଫଳରେ ଶ୍ରୀମନ୍ଦିର ସମ୍ପୂର୍ଣ୍ଣ ରୂପେ ଦୃଶ୍ୟମାନ ହେବ ବୋଲି ବୈଠକରେ ସ୍ଥିର ହୋଇଛି। ଏହି ବୈଠକରେ ଝାଞ୍ଜପିଟା ମଠ ମହନ୍ତ ବାବା ସଚ୍ଚିିଦାନନ୍ଦ ଦାସ ମହାରାଜ, ପୂର୍ବତନ ମୁଖ୍ୟ ଶାସନ ସଚିବ ଡ. ସୁବାସ ପାଣି, ଭୁବନେଶ୍ୱର ସର୍କଲର ଅବସରପ୍ରାପ୍ତ ପ୍ରତ୍ନତତ୍ତ୍ବବିତ୍ ଜୀବନ କୁମାର ପଟ୍ଟନାୟକ, ଏସ୍.ଏସ୍. ରାୟଙ୍କ ସମେତ ପୂର୍ତ୍ତ ବିଭାଗର ପ୍ରମୁଖ ସଚିବ, ଓଡ଼ିଶା ବ୍ରିଜ୍ ଆଣ୍ଡ୍ କନଷ୍ଟ୍ରକ୍ଶନ କର୍ପୋରେଶନ ଲିମିଟେଡ୍ (ଓବିସିସି)ର ପରିଚାଳନା ନିର୍ଦ୍ଦେଶକ, ପୁରୀ ଜିଲାପାଳ ସମର୍ଥ ବର୍ମା ଏବଂ ଶ୍ରୀମନ୍ଦିର ପ୍ରଶାସନର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ, ରାଜ୍ୟ ସରକାର ଏନ୍ଏମ୍ଏ ଏନ୍ଓସି ଆଧାରରେ ନିର୍ମାଣ କାର୍ଯ୍ୟ କରୁଥିବା ବେଳେ ଅନୁମୋଦନ ଦେବା ପାଇଁ ଏନ୍ଏମ୍ଏ କର୍ତ୍ତୃପକ୍ଷ ନୁହଁନ୍ତି ବୋଲି ଏଏସ୍ଆଇ ସ୍ପଷ୍ଟ କରିସାରିଛି। ସେହିଭଳି ହାଇକୋର୍ଟ ସତ୍ୟପାଠରେ ଏଏସ୍ଆଇ ରାଜ୍ୟ ସରକାରଙ୍କୁ କୌଣସି ଅନୁମୋଦନ ଦେଇ ନ ଥିବା କଥା କହିଥିବାବେଳେ ଅଭ୍ୟର୍ଥନା କେନ୍ଦ୍ର ନିର୍ମାଣକୁ ନେଇ ପ୍ରଶ୍ନ ଉଠାଇଥିଲା। ଶ୍ରୀମନ୍ଦିର ପରିକ୍ରମା ପ୍ରକଳ୍ପର ସାଂସ୍କୃତିକ ପରାମର୍ଶ କମିଟି ବୈଠକରେ ଏଏସ୍ଆଇର ପ୍ରସ୍ତାବକୁ ମାନି ନିଆଯାଇଥିବା ଦର୍ଶାଇ ଢାଞ୍ଚାରେ ପରିବର୍ତ୍ତନ କରିବାକୁ ନିଷ୍ପତ୍ତି ହୋଇଛି। ତେବେ ଏନ୍ଏମ୍ଏ ଏନ୍ଓସିରେ ଅଭ୍ୟର୍ଥନା କେନ୍ଦ୍ର ସାମିଲ ନ ଥିବାବେଳେ ରାଜ୍ୟ ସରକାର କିପରି ଏହାକୁ ନିଷିଦ୍ଧାଞ୍ଚଳରେ ନିର୍ମାଣ କରୁଥିଲେ ସେନେଇ ସାଧାରଣରେ ପ୍ରଶ୍ନ ଉଠିଛି।
