ମ.ରାମପୁର,୨୭ା୭(ଡି.ଏନ୍.ଏ.): କଳାହାଣ୍ଡି ଜିଲା ମଦନପୁର ରାମପୁର ସହର ମଧ୍ୟରେ ଥିବା ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟର ବିବାଦୀୟ ପ୍ରଧାନଶିକ୍ଷୟିତ୍ରୀ ଯଶୋବନ୍ତୀ ସେନାପତିଙ୍କୁ ବଦଳି କରାଯାଇଛି। ଜିଲା ଶିକ୍ଷାଧିକାରୀଙ୍କ ଅନୁମୋଦନ କ୍ରମେ ତ୍ରୁଟିପୂର୍ଣ୍ଣ କାର୍ଯ୍ୟ ସମ୍ପାଦନ ହେତୁ ଗୋଷ୍ଠୀ ଶିକ୍ଷାଧିକାରୀ, ମ.ରାମପୁର ନିର୍ଦ୍ଦେଶିତ ପତ୍ର ସଂଖ୍ୟା ୧୦୦୩, ତା ୨୭ା୭ା୨୦୨୨ ଅନୁଯାୟୀ, ଉକ୍ତ ବିଦ୍ୟାଳୟଠାରୁ ବ୍ଲକ କଲୋନୀ ଉଚ୍ଚ ପ୍ରାଥମିକ ବିଦ୍ୟାଳୟକୁ ବଦଳି କରାଯାଇଛି।
ଯଶୋବନ୍ତୀଙ୍କ ଦ୍ୱାରା ମଧ୍ୟାହ୍ନଭୋଜନ ଅନୁଦାନ ପାଣ୍ଠି ହେରଫେର, ବିଦ୍ୟାଳୟ ପରିଚାଳନା କମିଟିର ତାଲିମ ଅର୍ଥ ହେରଫେର, କ୍ରୀଡ଼ା ସାମଗ୍ରୀ ନ ଆଣି ଅଗ୍ରୀମ ଟଙ୍କା ପଇଠ, ଶ୍ରେଣୀ କୋଠରି ଅଭାବ ସତ୍ତ୍ୱେ ପ୍ରଧାନଶିକ୍ଷୟିତ୍ରୀ କକ୍ଷଠାରୁ ସହଶିକ୍ଷୟିତ୍ରୀମାନଙ୍କୁ ଅନ୍ୟତ୍ର କକ୍ଷଦେଇ ସେଠାରେ ଶ୍ରେଣୀ ପରିଚାଳନା କରିବା, ସହଶିକ୍ଷୟିତ୍ରୀମାନଙ୍କୁ ଚକ୍ ଡଷ୍ଟର ପ୍ରଦାନ ନ କରିବା, ବିଦ୍ୟାଳୟ ହତା ମଧ୍ୟରୁ ବାଲିମାଟି ମୋରମ୍ ନେଇ ଯିବା, କୋଠା ଅଭାବ ସତ୍ତ୍ୱେ ସିଆରସିସି ସ୍ତରୀୟ ପୁସ୍ତକ ଗଚ୍ଛିତ ରଖିବା, ବିଦ୍ୟାଳୟ ପରିଚାଳନା କମିଟି ସଭାପତି ଓ ସଦସ୍ୟା/ସଦସ୍ୟଙ୍କୁ ବାରମ୍ବାର ଦୁର୍ବ୍ୟବହାର ପ୍ରଦର୍ଶନ, ସର୍ବୋପରି ୧୯୯୪ରେ ଅଣସଂରକ୍ଷିତ ବର୍ଗରେ ଚାକିରି ଆରମ୍ଭ କରିଥିବାବେଳେ ୨୦୦୯ରେ ସ୍ବାମୀଙ୍କ ନାମରେ ହରିଜନବର୍ଗ ପ୍ରମାଣପତ୍ର ଦେଇ କ୍ରମାଗତ ପଦୋନ୍ନତି ପାଇଚାଲିଥିବା ବେଳେ ୨୦୨୧ରେ ଆବେଦନ କରିଥିବା ଏସ୍ସି ପ୍ରମାଣପତ୍ର ତହସିଲଦାରଙ୍କ ଦ୍ୱାରା ରଦ୍ଦ୍ ଆଦି ଘଟଣାକୁ ନେଇ ବିଦ୍ୟାଳୟ ପରିଚାଳନା କମିଟି ପକ୍ଷରୁ ଗତ ୧୩ ତାରିଖ କର୍ଲାମୁଣ୍ଡା ବ୍ଲକଠାରେ ଅନୁଷ୍ଠିତ ଜିଲାପାଳଙ୍କର ଅଭିଯୋଗ ଶୁଣାଣି ପ୍ରକୋଷ୍ଠରେ ଅଭିଯୋଗ କରାଯାଇଥିଲା। ୨୧ ତାରିଖ ଅପରାହ୍ନରେ ବିଇଓ ଠାକୁର ଚରଣ ସାହୁଙ୍କ ସହିତ ଏବିଇଓ ବେଣୁଧର କୁମାର, ଜୟସେନ ନିଆଲ, ସମ୍ପତି ଛୁରା ପ୍ରମୁଖ ୩ ଜଣ ଏବିଇଓ ତଦନ୍ତ ବେଳେ ପ୍ରମାଣ ପାଇଥିଲେ। ତଦନୁରୂପ ଆଜି ପ୍ରଧାନଶିକ୍ଷୟିତ୍ରୀ ଯଶୋବନ୍ତୀ ସେନାପତିଙ୍କୁ ବ୍ଲକ କଲୋନୀ ବିଦ୍ୟାଳୟକୁ ବଦଳି ହେଇଥିବାବେଳେ ସେଠାରେ ପ୍ରଧାନଶିକ୍ଷୟିତ୍ରୀ ଦାୟିତ୍ୱ ନ ଦେଇ କାର୍ଯ୍ୟ ସମ୍ପାଦନ ପାଇଁ କୁହାଯାଇଛି। ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟରେ ଲେବୁଲ ୩ ପ୍ରଧାନଶିକ୍ଷୟିତ୍ରୀ ଭାବେ କାମ କରୁଥିବାବେଳେ ଏହି ବଦଳିରେ ଲେବଲ ୪ ପ୍ରଧାନଶିକ୍ଷକଙ୍କର ତଳ ପାହ୍ୟାରେ କାମ କରିବା ପାଇଁ କୁହାଯାଇଛି।
ଉକ୍ତ ପ୍ରଧାନଶିକ୍ଷୟିତ୍ରୀଙ୍କର ଜାତିଗତ ପ୍ରମାଣପତ୍ରର ଚଞ୍ଚକତା ଓ ଅନ୍ୟାନ୍ୟ ଅଭିଯୋଗର ତଦନ୍ତ ଦୁଇଦିନ ଭିତରେ ଆରମ୍ଭ ହେବ ବୋଲି ଆଜି ବ୍ଲକ କର୍ତ୍ତୃପକ୍ଷ ଓ ବିଦ୍ୟାଳୟ ପରିଚାଳନା କମିଟି ସଦସ୍ୟମାନଙ୍କ ମଧ୍ୟରେ ମୌଖିକ ବୁଝାମଣା ହୋଇଛି।
ସୂଚନାଯୋଗ୍ୟ, ବିଦ୍ୟାଳୟ ପରିଚାଳନା କମିଟି ଓ ଅଭିଭାବକମାନଙ୍କ ପକ୍ଷରୁ ଉପରୋକ୍ତ ଦାବି ସମେତ ସିଆରସିସି ବିରେନ୍ଦ୍ର ରଥଙ୍କ ଦୁର୍ବ୍ୟବହାର ଯୋଗୁ ୨୯ ତାରିଖ ରାସ୍ତାରୋକୋ ଆନ୍ଦୋଳନ ପାଇଁ ସୂଚିତ କରାଯାଇଥିଲା। ଏହାପରେ ବ୍ଲକ ଓ ଜିଲ୍ଲା ଶିକ୍ଷା ବିଭାଗ କର୍ତ୍ତୃପକ୍ଷ ସାମୟିକ ତପତ୍ରତା ପରିପ୍ରକାଶ ପୂର୍ବକ ପ୍ରଶାସନିକ ଅବ୍ୟବସ୍ଥାଜନିତ ବଦଳି କରିଛନ୍ତି।