ଖୁଣ୍ଟୁଣୀ,୧୦ା୪(ଡି.ଏନ୍.ଏ.): ଚନ୍ଦକା ଜଙ୍ଗଲରୁ ଆସିଥିବା ୨୪ ଟିକିଆ ହାତୀପଲ କିଛିଦିନ ହେବ ଖୁଣ୍ଟୁଣୀ ବନାଞ୍ଚଳରେ ପ୍ରବେଶ କରିଛିି। ଏହାକୁ ନେଇ ଧାନ ଓ ପରିବା ଫସଲ କରିଥିବା ଚାଷୀ ଆତଙ୍କିତ ହୋଇପଡିଛନ୍ତି। ହାତୀପଲ ଧାନ ଓ ଆଖୁ ଖାଇବା ସହ ଲୋକଙ୍କ ବଗିଚାରେ ଥିବା କଦଳୀ, ଅମୃତଭଣ୍ଡା ଗଛ ନଷ୍ଟ କରିଥିବା ଅଭିଯୋଗ ହୋଇଛି। ହେଲେ ଏଥିପାଇଁ ଚାଷୀମାନେ ଭୟଭୀତ ନ ହେବାକୁ ବନ ବିଭାଗ ପକ୍ଷରୁ କୁହାଯିବା ସହ ହାତୀ ଘଉଡାଇବା ପାଇଁ ହାଇମାଷ୍ଟ ଲାଇଟ୍ ପ୍ରଦାନ କରାଯାଇଛି।
ମିଳିଥିବା ସୂଚନା ଅନୁଯାୟୀ, ଏହି ହାତୀପଲ ଗୁରୁବାର ଚନ୍ଦକାରୁ ଆସି ମହାନଦୀର କନ୍ଦରପୁର ଘାଟ ପାର ହୋଇ ଖୁଣ୍ଟୁଣୀ-ଘଣ୍ଟିଖାଲ ରାସ୍ତାରେ ଯାଇ ହରିପୋଲେଇ ପାହାଡ ତଳେ ରହିଥିଲେ। ପରେ ଶନିବାର ରାତିରେ ସୁନିଅଁାମୁହଁ ସଂରକ୍ଷିତ ଜଙ୍ଗଲରେ ପ୍ରବେଶ କରିଥିଲେ। ଏହି ହାତୀପଲରେ ୯ ମାଈହାତୀ, ୬ ଦନ୍ତା ଓ ୯ ଛୁଆ ହାତୀ ଅଛନ୍ତି। ଖାଦ୍ୟ ଓ ପାନୀୟ ଅନ୍ବେଷଣରେ ହାତୀପଲ ଜଙ୍ଗଲରୁ ଆସି କଖଡ଼ି, ନାରଙ୍ଗବସ୍ତ, ସୁନିଅଁାମୁହଁ, ଲିଙ୍ଗାପଦା, ମଞ୍ଚେଶ୍ୱର, ବ୍ରାହ୍ମଣବସ୍ତ ଗ୍ରାମରେ ପଶି ଧାନ, ଆଖୁ ସମେତ ପରିବା ଫସଲ ନଷ୍ଟ କରିଥିବା କେତେଜଣ ଚାଷୀ ଅଭିଯୋଗ କରିଛନ୍ତି। ଏ ସମ୍ପର୍କରେ ଚାଷୀ ସିଦ ଖଟୁଆ କହିଛନ୍ତି, ହାତୀଙ୍କ ପାଇଁ ଚାଷୀମାନଙ୍କ ନିଦ ହଜିଯାଇଛି। ୩ ଦିନ ମଧ୍ୟରେ କେତେଜଣ ଚାଷୀଙ୍କ ଫସଲ ନଷ୍ଟ ହୋଇଛି। ଅନ୍ୟ ଚାଷୀମାନେ ହାତୀଙ୍କ କବଳରୁ ଫସଲ ରକ୍ଷା କରିବା ପାଇଁ ସଜାଗ ରହିଥିବା ସେ କହିଛନ୍ତି। ଅପରପକ୍ଷରେ ଖୁଣ୍ଟୁଣୀ ବନାଞ୍ଚଳ ଅଧିକାରୀ ନୀଳମାଧବ ସାହୁ କହିଛନ୍ତି, ଚାଷୀମାନେ ଭୟଭୀତ ହୁଅନ୍ତୁ ନାହିଁ। ବନବିଭାଗ ଚାଷୀମାନଙ୍କ ସହିତ ସଜାଗ ଅଛି। ଗତ ୨ ଦିନ ମଧ୍ୟରେ ଖୁଣ୍ଟୁଣୀ, ରାଧାକିଶୋରପୁର, ଓରନ୍ଦା, କୁସପଙ୍ଗି, ଗୋବରା, କୁମାରପୁର, ଛଅଗଁା, କଣ୍ଡରେଇ, ମଞ୍ଚେଶ୍ୱର, ଗୁରୁଡିଝାଟିଆ ଆଦି ପଞ୍ଚାୟତର ଚାଷୀଙ୍କୁ ୧୨୦ଟି ହାଇମାଷ୍ଟ ଡିଜିଟାଲ ଟର୍ଚ୍ଚ ଲାଇଟ୍ ପଞ୍ଚାୟତ ପ୍ରତିନିଧିଙ୍କ ଜରିଆରେ ପ୍ରଦାନ କରାଯାଇଛି। ଏହି ଟର୍ଚ୍ଚ ଲାଇଟ୍ରେ ୩ଟି ସୁଇଚ୍ ରହିଛି। ହାତୀଙ୍କ ଆଖି ଉପରେ ଏହି ଲାଇଟ୍ ପଡିବା ଦ୍ୱାରା ସେମାନେ ଆଉ ଆଗକୁ ଯାଇପାରିବେ ନାହିଁ। ଅନ୍ୟ ସୁଇଚ୍ ମାରିଲେ ଖୁବ୍ଜୋରରେ ଲାଇଟ୍ ଦପ୍ଦପ୍ ହେବା ଦ୍ୱାରା ହାତୀ ସେହି ସ୍ଥାନ ଛାଡି ପଳାଇଯିବ। ଆଗାମୀ ଦିନରେ ଅନ୍ୟ ଚାଷୀମାନଙ୍କୁ ଏହି ଟର୍ଚ୍ଚ ଲାଇଟ୍ ଯୋଗାଇ ଦିଆଯିବ। ଜଙ୍ଗଲ ବିଭାଗ ପକ୍ଷରୁ ହାତୀ ଘଉଡାଳି, ପାରା ଷ୍ଟାଫ୍ଙ୍କୁ ସ୍ବତନ୍ତ୍ର ଭ୍ୟାନ୍ ଯୋଗାଇ ଦିଆଯାଇଛି। ହାତୀ ଦ୍ୱାରା ଯେଉଁ ଚାଷୀଙ୍କ ଫସଲ ନଷ୍ଟ ହୋଇଛି, ସେମାନେ ଅଭିଯୋଗ କଲେ ତଦନ୍ତ କରାଯାଇ କ୍ଷତିପୂରଣ ଦିଆଯିବା ବ୍ୟବସ୍ଥା କରାଯିବ ବୋଲି ସେ କହିଛନ୍ତି।
