ଇସଲାମାବାଦ୍,୧୯।୨: ଆଜିଠାରୁ ଚାମ୍ପିଅନ୍ସ ଟ୍ରଫି ଟୁର୍ନାମେଣ୍ଟ ଆରମ୍ଭ ହେଉଛି। ଏହି ଟୁର୍ନାମେଣ୍ଟର ପ୍ରଥମ ମ୍ୟାଚ୍ରେ ଆୟୋଜକ ପାକିସ୍ତାନ ଏବଂ ନ୍ୟୁଜିଲାଣ୍ଡ ଦଳ ପରସ୍ପର ମୁହାଁମୁହିଁ ହେବେ। ଏହା ପୂର୍ବରୁ ପାକିସ୍ତାନ ଅଧିନାୟକ ମହମ୍ମଦ ରିଜୱାନ ଚାମ୍ପିଅନ୍ସ ଟ୍ରଫିରେ ତାଙ୍କ ଦଳର ସମ୍ଭାବନା ବିଷୟରେ କହିଛନ୍ତି। ପାକିସ୍ତାନ ଦଳ ଚାପରେ ଭାଙ୍ଗିଯାଏ, ଏହି ଦୁର୍ବଳତା ଉପରେ କାମ କରିବାକୁ ପଡିବ ବୋଲି ରିଜଓ୍ବାନ ମତ ରଖିଛନ୍ତି।
ଜଣେ ସାମ୍ବାଦିକଙ୍କ ପ୍ରଶ୍ନର ଉତ୍ତରରେ ରିଜୱାନ କହିଛନ୍ତି, ଯଦି ୧୦ ବର୍ଷର ଆମର ରେକର୍ଡକୁ ଦେଖାଯାଏ, ତେବେ ଦେଖିବେ ଯେ ଚାପରେ ଆମ ଦଳ ଭାଙ୍ଗିଯାଏ, କିନ୍ତୁ ଏବେ ଉନ୍ନତି କରିବାର ସମୟ ଆସିଛି। ଯଦିଓ ଆମ ଦଳ ଭଲ ପ୍ରଦର୍ଶନ କରିଛି, ଆମେ ବଡ଼ ମ୍ୟାଚ ଜିତିଛୁ, ଚାମ୍ପିଅନ୍ସ ଟ୍ରଫି ଜିତିଛୁ ଏବଂ ଟେଷ୍ଟ ରାଙ୍କିଙ୍ଗରେ ନମ୍ବର ୧ ଦଳ ମଧ୍ୟ ହୋଇଛୁ, କିନ୍ତୁ ଚାପରେ ଭୁଶୁଡ଼ି ପଡ଼ିବାର ଆମର ଅଭ୍ୟାସକୁ ସଂଶୋଧନ କରିବାକୁ ପଡିବ। ମୁଁ ଆଶା କରୁଛି ଆମେ ଏହାକୁ ପୁନରାବୃତ୍ତି କରିବୁ ନାହିଁ। ନିକଟରେ ପାକିସ୍ତାନକୁ ନ୍ୟୁଜିଲାଣ୍ଡ ବିପକ୍ଷରେ ଟ୍ରାଏ ସିରିଜ ଫାଇନାଲରେ ପରାଜୟର ସାମ୍ନା କରିବାକୁ ପଡିଥିଲା। ଫେବୃଆରୀ ୨୩ରେ ଭାରତ ଏବଂ ପାକିସ୍ତାନ ମଧ୍ୟରେ ମହାମୁକାବିଲା ଖେଳାଯିବ। ଏହା ଉପରେ ସମସ୍ତଙ୍କ ନଜର ରହିଛି।
