ନୂଆଦିଲ୍ଲୀ,୧୪।୨: ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଚାମ୍ପିଅନ୍ସ ଟ୍ରଫି ପାଇଁ ପୁରସ୍କାର ରାଶି ଘୋଷଣା କରିଛି। ବିଶ୍ୱ କ୍ରିକେଟ ସଂସ୍ଥା ଗତ ଥର ତୁଳନାରେ ଟୁର୍ନାମେଣ୍ଟର ପୁରସ୍କାର ରାଶି ୫୩ ପ୍ରତିଶତ ବୃଦ୍ଧି କରିଛି। ଫେବୃଆରୀ ୧୯ରୁ ଆରମ୍ଭ ହେଉଥିବା ଚାମ୍ପିଅନ୍ସ ଟ୍ରଫିର ବିଜେତା ଦଳକୁ ୨.୪ ମିଲିୟନ ଆମେରିକୀୟ ଡଲାର, ଅର୍ଥାତ୍ ପ୍ରାୟ ୧୯.୫ କୋଟି ଟଙ୍କା ମିଳିବ।
ଏହି ଆଇସିସି ଟୁର୍ନାମେଣ୍ଟ ପାକିସ୍ତାନ ଏବଂ ଦୁବାଇରେ ଆୟୋଜିତ ହେବ। ଭାରତ ଟୁର୍ନାମେଣ୍ଟ ପାଇଁ ପାକିସ୍ତାନ ଯାତ୍ରା କରିବାକୁ ମନା କରିଦେଇଥିଲା ଯାହା ପରେ ICC ଭାରତର ମ୍ୟାଚ ଦୁବାଇରେ ଆୟୋଜନ କରିବାକୁ ନିଷ୍ପତ୍ତି ନେଇଥିଲା। ଭାରତ ଏହି ଟୁର୍ନାମେଣ୍ଟରେ ୨୦ ଫେବୃଆରୀରେ ବାଂଲାଦେଶ ବିପକ୍ଷରେ ତା’ର ଅଭିଯାନ ଆରମ୍ଭ କରିବ। ଭାରତ ଏହି ଟୁର୍ନାମେଣ୍ଟ ପାଇଁ ଗ୍ରୁପ ଏରେ ଅଛି ଯେଉଁଥିରେ ଡିଫେଣ୍ଡିଂ ଚାମ୍ପିଅନ ପାକିସ୍ତାନ, ନ୍ୟୁଜିଲାଣ୍ଡ ଏବଂ ବାଂଲାଦେଶ ମଧ୍ୟ ଅଛନ୍ତି।
ବିଜେତାଙ୍କ ବ୍ୟତୀତ, ରନର୍ସ-ଅପ ଦଳକୁ $୧.୧୨ ମିଲିୟନ (ପ୍ରାୟ ୯.୭୨ କୋଟି ଟଙ୍କା) ମିଳିବ। ସେମିଫାଇନାଲରେ ବାଦ ପଡ଼ିଥିବା ଉଭୟ ଦଳକୁ $୫୬୦୦୦ (୪.୮୬ କୋଟି ଟଙ୍କା) ମିଳିବ। ଏହି ଟୁର୍ନାମେଣ୍ଟର ମୋଟ ପୁରସ୍କାର ରାଶି ୬.୯ ନିୟୁତ ଡଲାର (ପ୍ରାୟ ୬୦ କୋଟି ଟଙ୍କା)କୁ ବୃଦ୍ଧି ପାଇଛି।
ଅନ୍ୟ ଦଳଗୁଡ଼ିକ କେତେ ଟଙ୍କା ପାଇବେ?
ଗ୍ରୁପ ପର୍ଯ୍ୟାୟରେ ବିଜୟୀ ହେଉଥିବା ଯେକୌଣସି ଦଳକୁ $୩୪,୦୦୦ (୩୦ ଲକ୍ଷ ଟଙ୍କା) ପୁରସ୍କାର ରାଶି ମିଳିବ। ପଞ୍ଚମ ଏବଂ ଷଷ୍ଠ ସ୍ଥାନରେ ଥିବା ଦଳଗୁଡ଼ିକୁ $୩୫୦,୦୦୦(ପ୍ରାୟ ୩ କୋଟି ଟଙ୍କା) ମିଳିବ। ସପ୍ତମ ଏବଂ ଅଷ୍ଟମ ସ୍ଥାନରେ ଥିବା ଦଳଗୁଡ଼ିକୁ $୧୪୦,୦୦୦ (ପ୍ରାୟ ୧.୨ କୋଟି ଟଙ୍କା) ମିଳିବ। ଏହା ବ୍ୟତୀତ, ଏହି ICC ଟୁର୍ନାମେଣ୍ଟରେ ଅଂଶଗ୍ରହଣ କରିବା ପାଇଁ ସମସ୍ତ ଆଠଟି ଦଳକୁ $୧୨୫,୦୦୦ (ପ୍ରାୟ ୧.୦୮ ଟଙ୍କା) କୋଟି ଟଙ୍କା ପ୍ରଦାନ କରାଯିବ।
ଭାରତ ଫେବୃଆରୀ ୨୦ରେ ବାଂଲାଦେଶ ବିପକ୍ଷରେ ପ୍ରଥମ ଲିଗ ପର୍ଯ୍ୟାୟ ମ୍ୟାଚ ଖେଳିବ। ଏହା ପରେ, ୨୩ ଫେବୃଆରୀରେ ପାକିସ୍ତାନ ବିପକ୍ଷ ମ୍ୟାଚ ପରେ, ଟିମ ଇଣ୍ଡିଆକୁ ୭ ଦିନ ବିଶ୍ରାମ ମିଳିବ। ଏହା ପରେ, ଭାରତୀୟ ଦଳ ମାର୍ଚ୍ଚ ୨ରେ ନ୍ୟୁଜିଲାଣ୍ଡ ସହିତ ମୁକାବିଲା କରିବ। ଭାରତ ଶେଷ ଥର ପାଇଁ ୨୦୧୩ରେ ଚାମ୍ପିଅନ୍ସ ଟ୍ରଫି ଜିତିଥିଲା,ମହେନ୍ଦ୍ର ସିଂହ ଧୋନୀ ଦଳର ଅଧିନାୟକ ଥିଲେ। ୨୦୦୨ ମସିହାରେ ବର୍ଷା ଯୋଗୁ ଫାଇନାଲ ବାତିଲ ହୋଇଥିଲା। ତା’ପରେ ଭାରତ ଏବଂ ଶ୍ରୀଲଙ୍କା ମିଳିତ ବିଜେତା ହୋଇଥିଲେ। ଭାରତୀୟ ଦଳ ମୋଟ ଚାରି ଥର ଫାଇନାଲରେ ପହଞ୍ଚିଛି। ୨୦୧୩ ଏବଂ ୨୦୦୨ ବ୍ୟତୀତ, ଏହା ୨୦୦୦ ଏବଂ ୨୦୧୭ରେ ଘଟିଥିଲା।
ପାକିସ୍ତାନରେ ହେବାକୁ ଥିବା ମ୍ୟାଚ ଗୁଡ଼ିକ କରାଚି, ଲାହୋର ଏବଂ ରାୱଲପିଣ୍ଡିରେ ଖେଳାଯିବ। ଏହି ଟୁର୍ନାମେଣ୍ଟରେ ଅଂଶଗ୍ରହଣ କରୁଥିବା ୮ଟି ଦଳକୁ ଦୁଇଟି ଗ୍ରୁପରେ ବିଭକ୍ତ କରାଯାଇଛି। ପ୍ରତ୍ୟେକ ଗ୍ରୁପର ଶ୍ରେଷ୍ଠ ଦୁଇଟି ଦଳ ସେମିଫାଇନାଲକୁ ଯିବେ।
