ବରଗଡ଼ ଅଫିସ୍,୨।୮: ବରଗଡ଼ ଜିଲା ଅମ୍ବାଭୋନାର ଦୟାସାଗର ପୁରୀ। ବୟସ ୨୭ବର୍ଷ ହେବ। ଗ୍ରାମର ରାମେଶ୍ୱର ଓ ତପସ୍ବିନୀଙ୍କ ସାନପୁଅ ଦୟାସାଗର ଗତ ପ୍ରାୟ ୮ବର୍ଷ ହେଲା ମାନସିକ ରୋଗରେ ଆକ୍ରାନ୍ତ। ଅମ୍ବାଭୋନା ହସ୍ପିଟାଲ ପାଖ ସାହିରେ ତାଙ୍କ ଘର। କିନ୍ତୁ ଆବଶ୍ୟକ ଚିକିତ୍ସା ଅଭାବରୁ ଦୟାସାଗର ରୋଗମୁକ୍ତ ହୋଇ ପାରି ନାହାନ୍ତି । ସେ ଇତସ୍ତତଃ ପଳାଇବା ସହିତ ଘରେ ସ୍ଥିର ହୋଇ ରହୁ ନ ଥିବା ଯୋଗୁ ତାଙ୍କ ଗୋଡ଼ରେ ଏକ ଲୁହା ଶିକୁଳି ବନ୍ଧା ଯାଇଛି ଏବଂ ଦୟାସାଗର ଶିକୁଳିରେ ବନ୍ଧା ଜୀବନ ବିତାଉଛନ୍ତି ।
ଝାଟିମାଟି ଘରେ ଦୟାସାଗରଙ୍କ ମା, ବାପା, ବଡ଼ଭାଇ ଏବଂ ଭାଉଜ ଜୀବନ କାଟୁଛନ୍ତି । ଜମିବାଡ଼ି କିଛି ନାହିଁ । ମାତ୍ର ୫୦ ଡେସିମିଲ ଜମି ଥିଲା । ଦୟାସାଗରଙ୍କ ଚିକିତ୍ସା ଖର୍ଚ୍ଚ ପାଇଁ ସେହି ଜମିକୁ ଅନ୍ୟପାଖରେ ବନ୍ଧା ପକାଇ ଦେଇଥିବା ରାମେଶ୍ୱର କହିଛନ୍ତି । ସେହିପରି ଘରେ ଛୋଟ ପସରାଟିଏ ଅଛି । କିନ୍ତୁ ମହାମାରୀ କରୋନା ସେମାନଙ୍କ ସେହି ରୋଜଗାରକୁ ମଧ୍ୟ ଛଡ଼ାଇ ନେଇଛି । ଅର୍ଥାଭାବ ଯୋଗୁ ଦୟାସାଗରଙ୍କ ଅଧିକ ଚିକିତ୍ସା ହୋଇପାରୁନାହିଁ ଏବଂ ତାଙ୍କ ସ୍ବାସ୍ଥ୍ୟାବସ୍ଥା ଦିନକୁ ଦିନ ଅଧିକ ବିଗିଡ଼ିବାରେ ଲାଗିଛି । ତାଙ୍କ ଚିକିତ୍ସାରେ ଅର୍ଥ ପ୍ରତିବନ୍ଧକ ସାଜିଛି ।
ସେହିପରି ମାନସିକ ରୋଗରେ ଆକ୍ରାନ୍ତ ହେବା ପରେ ବରଗଡ଼, ବୁର୍ଲା, ରାୟଗଡ଼ ସମେତ ବିଭିନ୍ନ ଡାକ୍ତରଙ୍କ ପାଖକୁ ପରିବାର ଲୋକେ ତାଙ୍କୁ ଚିକିତ୍ସା ପାଇଁ ନେଇଥିଲେ । ମାତ୍ର ସେ ଭଲ ହୋଇ ନ ଥିଲେ । ଦୟାସାଗର ଘରେ ଠିକ୍ ଭାବେ ରହୁ ନାହାନ୍ତି ଏବଂ ସବୁବେଳେ କଳିଗୋଳ କରିବା ସହିତ ତାଙ୍କ ମାନସିକ ଅବସ୍ଥା ଆହୁରି ଖରାପ ହେଉଛି ବୋଲି ରାମେଶ୍ୱର କହିଛନ୍ତି । ତାଙ୍କ ଚିକିତ୍ସାରେ ପାଖାପାଖି ୩ଲକ୍ଷ ଟଙ୍କା ଖର୍ଚ୍ଚ ହୋଇସାରିଛି । ତଥାପି ସେ ଭଲ ହୋଇନାହାନ୍ତି। ଚିକିତ୍ସା ପାଇଁ ପାଖରେ ଆଉ ସମ୍ବଳ ନାହିଁ । ସରକାର କିମ୍ବା କୌଣସି ସହୃଦୟ ବ୍ୟକ୍ତି ସହଯୋଗର ହାତ ବଢ଼ାଇଲେ ଦୟାସାଗର ଆବଶ୍ୟକ ଚିକିତ୍ସା ପାଇ ଭଲ ହେବ ବୋଲି ତାଙ୍କ ମା’ ତପସ୍ବିନୀ ଆଶା ରଖିଛନ୍ତି ।
