ଅହମ୍ମଦାବାଦ,୬।୨: ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଚାଲିଥିବା ଐତିହାସିକ ମ୍ୟାଚ୍ରେ ଭାରତୀୟ ଲେଗ୍ ସ୍ପିନର ୟୁଜବେନ୍ଦ୍ର ଚହଲ ତାଙ୍କ ପ୍ରଥମ ଓଭରରେ ଦୁଇ ଉଇକେଟ ନେଇ ଏକ ସ୍ବତନ୍ତ୍ର ମାଇଲଷ୍ଟୋନ ସ୍ପର୍ଶ କରିଛନ୍ତି। ଇନିଂସର ୧୯ତମ ଓଭରରେ ଚହଲ ପ୍ରଥମେ ନିକୋଲାସ ପୁରନ (୧୮) ଓ ତା’ ପରେ କିରନ ପୋଲାର୍ଡ(୦)ଙ୍କୁ ପ୍ୟାଭିଲିଅନ୍ ବାଟ ଦେଖାଇଥିଲେ। ଏଥିସହ ଚହଲ ଦିନିକିଆ କ୍ୟାରିୟରରେ ପୂରଣ କରିଛନ୍ତି ୧୦୦ ଉଇକେଟ। ଏହି ମାଇଲଷ୍ଟୋନ ସ୍ପର୍ଶ କରିବାରେ ସେ ଭାରତର ୫ମ ଦ୍ରୁତତମ ବୋଲର। ସେ କ୍ୟାରିୟରର ୬୦ ମ୍ୟାଚ୍ରେ ଏହି ସଫଳତା ପାଇଛନ୍ତି।
ତେବେ ଦ୍ରୁତତମ ଭାରତୀୟ ଭାବେ ୧୦୦ ଦିନିକିଆ ଉଇକେଟ ନେବା ରେକର୍ଡ ପେସର ମହମ୍ମଦ ଶାମିଙ୍କ ନାମରେ ରହିଛି। ସେ ୫୬ତମ ମ୍ୟାଚ୍ରେ ଏହି ମାଇଲଷ୍ଟୋନ ଛୁଇଁଥିଲେ। ଏହି ତାଲିକାରେ ଯଶପ୍ରୀତ ବୁମରା (୫୭ତମ ମ୍ୟାଚ୍), କୁଲଦୀପ ଯାଦବ (୫୮) ଓ ଇର୍ଫାନ ପଠାନ (୫୯) ରହିଛନ୍ତି।
