ବରଗଡ଼ ଅଫିସ୍,୮।୨: କେନ୍ଦ୍ର ସରକାର ୨୦୨୩-୨୪ ବର୍ଷ ପାଇଁ ଆଗତ କରିଥିବା ବଜେଟ୍ରେ ଚାଷୀଙ୍କୁ ଠକିଛି ବୋଲି ବିଜେଡି ଅଭିଯୋଗ କରିଛି। ବରଗଡ଼ର ଏକ ହୋଟେଲରେ ମଙ୍ଗଳବାର ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ବିଜେଡି ରାଜ୍ୟ ଉପସଭାପତି ତଥା ପୂର୍ବତନ ଏମ୍ପି ପ୍ରସନ୍ନ ଆଚାର୍ଯ୍ୟ କହିଥିଲେ, ୨୦୨୧-୨୨ ବର୍ଷ ଖାଦ୍ୟ ସଂଗ୍ରହ ବାବଦରେ ହୋଇଥିବା ବ୍ୟୟ ବରାଦ ତୁଳନାରେ ୨୦୨୩-୨୪ ବର୍ଷ ପାଇଁ ଆଗତ ବଜେଟ୍ରେ ୨୦ହଜାର କୋଟି ଟଙ୍କା ହ୍ରାସ କରାଯାଇଛି। ଏହା ଭାଜପା ନେତୃତ୍ୱାଧୀନ କେନ୍ଦ୍ର ସରକାରଙ୍କ ଚାଷୀ ବିରୋଧୀ ନୀତିକୁ ସ୍ପଷ୍ଟ ପ୍ରମାଣିତ କରୁଛି ବୋଲି ସେ କହିଛନ୍ତି। କେବଳ ସେତିକି ନୁହେଁ, ଓଡ଼ିଶାରୁ କେନ୍ଦ୍ର କିଣୁଥିବା ଚାଉଳର ପରିମାଣକୁ ମଧ୍ୟ କେନ୍ଦ୍ର ୮୦ଭାଗ କମାଇ ଦେଇ ଚାଷୀଙ୍କୁ ମରଣଯନ୍ତାକୁ ଠେଲି ଦେଇଛି। ଏହାଦ୍ୱାରା ବିଶେଷକରି ଧାନ ଉତ୍ପାଦନ ଏବଂ ଚାଉଳ ସଂଗ୍ରହରେ ପ୍ରମୁଖ ଭୂମିକା ନେଇଥିବା ପଶ୍ଚିମ ଓଡ଼ିଶାର ଚାଷୀମାନେ ବହୁ ଅସୁବିଧାର ସମ୍ମୁଖୀନ ହେବେ। ଗୋଟିଏ ପଟେ ଖାଦ୍ୟ ସଂଗ୍ରହ ବାବଦକୁ ବ୍ୟୟ ବରାଦ କମାଇବା ଏବଂ ଅନ୍ୟପଟେ ଚାଉଳ ସଂଗ୍ରହ ପରିମାଣକୁ ମଧ୍ୟ ଯଥେଷ୍ଟ ହ୍ରାସ କରିଥିବା ଯୋଗୁ ରାଜ୍ୟରେ ଧାନ ସଂଗ୍ରହ ଗୁରୁତର ବାଧାପ୍ରାପ୍ତ ହେବ ବୋଲି ଆଚାର୍ଯ୍ୟ କହିଛନ୍ତି ।
ସେହିପରି ଭଟଲି ବିଧାୟକ ସୁଶାନ୍ତ ସିଂ କହିଥିଲେ, ଧାନର ସର୍ବନିମ୍ନ ସହାୟକ ମୂଲ୍ୟ ଅତିକମ୍ରେ କୁଇଣ୍ଟାଲ ପ୍ରତି ୨୯୩୦ ଟଙ୍କା ଧାର୍ଯ୍ୟ କରିବା ପାଇଁ ଓଡ଼ିଶା ବିଧାନସଭାର ସର୍ବଦଳୀୟ ଓ ସର୍ବସମ୍ମତ ପ୍ରସ୍ତାବକୁ କେନ୍ଦ୍ର ସରକାର ପ୍ରତ୍ୟାଖ୍ୟାନ କରି ଚାଷୀ ବିରୋଧୀ ନୀତିକୁ ପ୍ରମାଣିତ କରିଦେଇଥିଲେ। ଏବେ ପୁଣି ଧାନ ସଂଗ୍ରହ ବାବଦକୁ ୨୦ହଜାର କୋଟି ଟଙ୍କାର ବ୍ୟୟବରାଦ କମାଇ ଦେବା ଚାଷୀଙ୍କ ପ୍ରତି କେନ୍ଦ୍ର ସରକାରଙ୍କ ଉଗ୍ର ଚାଷୀ ବିରୋଧୀ ନୀତିକୁ ସୂଚାଉଛି ବୋଲି ସିଂ କହିଥିଲେ। ବରଗଡ଼ ବିଧାୟକ ଦେବେଶ ଆଚାର୍ଯ୍ୟ କହିଥିଲେ, କେନ୍ଦ୍ର ସରକାରଙ୍କ ତରଫରୁ ଭାରତୀୟ ଖାଦ୍ୟ ନିଗମ ଓଡ଼ିଶାରୁ ହାରାହାରି ୧୮ଲକ୍ଷ ମେଟ୍ରିକ ଟନ ଚାଉଳ ଉଠାଉଥିବା ସ୍ଥଳେ ଚଳିତ ୨୦୨୨-୨୩ ବର୍ଷରେ ତାହାକୁ ୮୦ ଭାଗ କମାଇ ଦେଇ ମାତ୍ର ୪ଲକ୍ଷ ମେଟ୍ରିକ ଟନ ଚାଉଳ ସଂଗ୍ରହ କରିବାକୁ ଭାରତୀୟ ଖାଦ୍ୟ ନିଗମକୁ ନିର୍ଦ୍ଦେଶ ଦିଆଯାଇଛି। କେବଳ ବରଗଡ଼ ଜିଲାରେ ୪ଲକ୍ଷ ମେଟ୍ରିକ ଟନ ଚାଉଳ ଭାରତୀୟ ଖାଦ୍ୟ ନିଗମ ସଂଗ୍ରହ କରିଥାଏ। କେନ୍ଦ୍ର ସରକାରଙ୍କ ସେଭଳି ନିଷ୍ପତ୍ତି ଯୋଗୁ ଚାଷୀମାନେ କ୍ଷତିଗ୍ରସ୍ତ ହେବେ। ଚାଷୀଙ୍କ ଆୟକୁ ୨ଗୁଣା କରିବା ପାଇଁ ନାରା ଦେଉଥିବା କେନ୍ଦ୍ର ସରକାରଙ୍କ ଏଭଳି ନିଷ୍ପତ୍ତି ଚାଷୀଙ୍କ ପ୍ରତି କେନ୍ଦ୍ରର ଆନ୍ତରିକତାକୁ ପଦାରେ ପକାଇ ଦେଇଛି ବୋଲି ବିଧାୟକ ଆଚାର୍ଯ୍ୟ କହିଥିଲେ ।
