ନୂଆଦିଲ୍ଲୀ, ୨୦।୦୮: ୟୁନିୟନ୍ ପବ୍ଲିକ୍ ସର୍ଭିସ୍ କମିଶନ୍ ବା ୟୁପିଏସ୍ସି ଅଧିନରେ ହେଉଥିବା ଲାଟେରାଲ୍ ଏଣ୍ଟ୍ରି ଭର୍ତ୍ତି ପ୍ରକ୍ରିୟା ସମାପ୍ତ ହେବାକୁ ଯାଉଛି । ଏନେଇ କେନ୍ଦ୍ର ସରକାରଙ୍କ ପକ୍ଷରୁ ୟୁପିଏସ୍ସିକୁ ଚିଠି ଲେଖାଯାଇଛି । ଲାଟେରାଲ୍ ଏଣ୍ଟ୍ରିକୁ ନେଇ ଲଗାତାର ପ୍ରଶ୍ନ ଉଠିବା ପରେ ସରକାର ଏପରି ପଦକ୍ଷେପ ନେଇଛନ୍ତି । କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂଙ୍କ ପକ୍ଷରୁ ୟୁପିଏସସି ଅଧ୍ୟକ୍ଷଙ୍କୁ ଏହି ଚିଠି ଲେଖାଯାଇଛି। ଯେଉଁଥିରେ ସେ ୟୁପିଏ ସରକାର ସମୟରେ ଏଭଳି ନିଯୁକ୍ତି ଉପରେ ନିଆଯାଇଥିବା ପଦକ୍ଷେପ ବିଷୟରେ ମଧ୍ୟ ଉଲ୍ଲେଖ କରିଛନ୍ତି। ଏହି ଚିଠିରେ କୁହାଯାଇଛି ଯେ ଭେରପ୍ପା ମୋଇଲିଙ୍କ ଅଧ୍ୟକ୍ଷତାରେ ୨୦୦୫ ମସିହାରେ ପ୍ରଥମ ଥର ପାଇଁ କେନ୍ଦ୍ର ସରକାର ଲାଟେରାଲ୍ ଏଣ୍ଟ୍ରି ପାଇଁ ସୁପାରିଶ କରିଥିଲେ।
ନିକଟରେ ଲାଟେରାଲ ଏଣ୍ଟ୍ରି ପାଇଁ ନିଯୁକ୍ତି ବିଜ୍ଞାପନ ୟୁପିଏସସି ପକ୍ଷରୁ ଜାରି କରାଯାଇଥିଲା । ଏଥିରେ ପ୍ରକ୍ରିୟା ଏବଂ ସଂରକ୍ଷଣ ସମ୍ପର୍କରେ ବିରୋଧୀମାନେ କ୍ରମାଗତ ଭାବରେ ସରକାରଙ୍କ ଉପରେ ଟାର୍ଗେଟ୍ କରୁଥିଲେ। ଏହା ଉପରେ ନିରନ୍ତର ପ୍ରଶ୍ନ ଉଠିବା ପରେ ବର୍ତ୍ତମାନ କେନ୍ଦ୍ର ସରକାର ଏକ ଚିଠି ଲେଖି ଆୟୋଗ (ୟୁପିଏସସି) କୁ ପ୍ରତ୍ୟକ୍ଷ ନିଯୁକ୍ତିର ବିଜ୍ଞାପନ ବାତିଲ କରିବାକୁ କହିଛନ୍ତି।
ୟୁପିଏସସିରେ ଲାଟେରାଲ ଏଣ୍ଟ୍ରିକୁ ନେଇ ବିରୋଧୀମାନେ କ୍ରମାଗତ ଭାବରେ ସରକାରଙ୍କ ଉପରେ ପ୍ରଶ୍ନ ଉଠାଉଥିଲେ। ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ଏବଂ ବହୁ ବିରୋଧୀ ଦଳର ନେତାମାନେ ୟୁପିଏସସିରେ ଏହି ପ୍ରକ୍ରିୟାରେ ନିଯୁକ୍ତିକୁ ବିରୋଧ କରିଥିଲେ ଏବଂ ଏଥିରେ ସଂରକ୍ଷଣକୁ ନେଇ ପ୍ରଶ୍ନ କରିଥିଲେ। ଏହା ପରେ ସରକାରଙ୍କ ସହ ଜଡିତ ଅନେକ ଦଳ ମଧ୍ୟ ଏହି ପ୍ରସଙ୍ଗରେ ସ଼୍ବର ଉତ୍ତୋଳନ କରିବା ଆରମ୍ଭ କରିଥିଲେ । ପରେ ଲାଟେରାଲ ଏଣ୍ଟ୍ରି ପାଇଁ ବିଜ୍ଞାପନ ବାତିଲ କରିବାକୁ ସରକାର ବର୍ତ୍ତମାନ ୟୁପିଏସସିକୁ ନିର୍ଦ୍ଦେଶ ଦେଇଛନ୍ତି।
