କଳିଙ୍ଗନଗର,୧ା୭(ଶୁଭାଶିଷ ରାଉତ): କଳିଙ୍ଗନଗର ଶିଳ୍ପାଞ୍ଚଳର ଜୀବନ ରେଖା ସଦୃଶ ୨ ମୁଖ୍ୟ ରାସ୍ତା ବିଜୁ ପଟ୍ଟନାୟକ ମାର୍ଗ ଓ ଗୋପବନ୍ଧୁ ମାର୍ଗର ସତନ୍ତ୍ର ଉନ୍ନତୀକରଣ କରାଯିବ। ଏଥିପାଇଁ କେନ୍ଦ୍ର ସରକାର ଅର୍ଥ ବ୍ୟୟ କରିବାକୁ ନିଷ୍ପତ୍ତି ନେଇଥିବା ଜଣାପଡିଛି। ଶିଳ୍ପାଞ୍ଚଳର ଭିତ୍ତିଭୂମି ବିକାଶ ପାଇଁ ରାଜ୍ୟ ସରକାରଙ୍କ ଦାୟିତ୍ୱରେ ଥିବା ବିଭାଗ ଉଦାସୀନ ରହୁଥିବା ପ୍ରସଙ୍ଗରେ ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଚନ୍ଦ୍ର ଘଡ଼ାଇ ରାଜ୍ୟ ସରକାରଙ୍କୁ ଚିଠି ଲେଖିଥିବାବେଳେ ଶିଳ୍ପାଞ୍ଚଳର ଦୁଇ ମୁଖ୍ୟ ସଡ଼କ ନିର୍ମାଣ କାର୍ଯ୍ୟକୁ କେନ୍ଦ୍ର ସରକାର ପ୍ରଧାନମନ୍ତ୍ରୀ ଗତି ଶକ୍ତି ଯୋଜନାରେ ସାମିଲ କରିଥିବା ଜଣାପଡ଼ିଛି।
ତଥ୍ୟ ମୁତାବକ, ପରିବହନରେ ବହୁଳ ବ୍ୟବହାର ହେଉଥିବା ଏହି ରାସ୍ତା ଦ୍ୱୟ ବିପର୍ଯ୍ୟସ୍ତ ହୋଇପଡ଼ିଛି। ଜେସିଡିଲ ପରିଚାଳନା ଅଧୀନରେ ଥିବା ଏହି ରାସ୍ତାର ରକ୍ଷଣାବେକ୍ଷଣ ରାଜ୍ୟ ସରକାରଙ୍କ ପୂର୍ତ୍ତ ବିଭାଗ ଦ୍ୱାରା ପରିଚାଳିତ ହେଉଛି। ଟାଟା ଷ୍ଟିଲ, ଭିସା ଷ୍ଟିଲ, ଜିନ୍ଦଲ ଷ୍ଟେନ୍ଲେସ, ବିଆର୍ପିଏଲ, ନୀଳାଚଳ ଇସ୍ପାତ, କେଜେ ଇସ୍ପାତ, ରୋହିତ ଫେରୋଟେକ, ମଇଥାନ ଇସ୍ପାତ, ଯାଜପୁର ସିମେଣ୍ଟ, ନ୍ୟୁ ଭିସ୍ତା ସିମେଣ୍ଟ, ଜେଏସ୍ଡବ୍ଲ୍ୟୁ ସିମେଣ୍ଟ, ନିଜୋନ, ବେଟ ଓ ଆଦାନୀ ପ୍ରମୁଖ କାରଖାନା ପାଇଁ ଏହି ରାସ୍ତାଗୁଡ଼ିକ ସମ୍ପୂର୍ଣ୍ଣ ଭାବେ ବ୍ୟବହୃତ ହେଉଛି। ମାତ୍ର ବିଭାଗୀୟ କର୍ତ୍ତୃପକ୍ଷଙ୍କ ଅଣଦେଖା କାରଣରୁ ରାସ୍ତା ଦୁଇଟି ଏବେ ଭାଙ୍ଗିରୁଜି ଯାଇଛି। ସମ୍ପୂର୍ଣ୍ଣ ଶିଳ୍ପାଞ୍ଚଳ ନିର୍ଭରଶୀଳ ରହିଥିବା ଏହି ରାସ୍ତାଗୁଡ଼ିକର ଆବଶ୍ୟକତା ଦୃଷ୍ଟିରୁ ପ୍ରଶସ୍ତୀକରଣ ଓ ଉନ୍ନତିକରଣ ନିହାତି ଆବଶ୍ୟକ ହୋଇପଡିଛି।
ଗତ ୩ ମାସ ପୂର୍ବରୁ ରାସ୍ତା ଉନ୍ନତୀକରଣ ପାଇଁ ପୂର୍ତ୍ତ ବିଭାଗ ଟେଣ୍ଡର ଆହ୍ବାନ କରିଥିଲା। ମାତ୍ର ଟେଣ୍ଡର ପ୍ରକ୍ରିୟା ସରିବା ପରେ ତରବରିଆ ଭାବେ ଏହାକୁ ବାତିଲ କରି ଦିଆଯାଇଥିଲା। ପ୍ରଧାନମନ୍ତ୍ରୀ ଗତି ଶକ୍ତି ଯୋଜନାରେ ରାସ୍ତା ଦ୍ୱୟ ନିର୍ମାଣ ପାଇଁ ଅର୍ଥ ପ୍ରସ୍ତାବ ଆସିବା ପରେ ଟେଣ୍ଡର ବାତିଲ କରାଯାଇଥିବା କୁହାଯାଉଛି। ପ୍ରଶସ୍ତ ରାସ୍ତା ନ ଥିବାରୁ ଅନେକ ସମୟରେ ଏଠାରେ ଟ୍ରାଫିକ ସମସ୍ୟା ଉତ୍କଟ ରୂପ ଧାରଣ କରୁଛି। ଏତେ ବଡ଼ ଏକ ଶିଳ୍ପାଞ୍ଚଳରେ ଯାନବାହନ ନିୟନ୍ତ୍ରଣ ପାଇଁ ଟ୍ରାଫିକ ପୋଲିସ ମୁତୟନ ବ୍ୟବସ୍ଥା ହୋଇନାହିଁ। ପ୍ରତ୍ୟହ ହଜାରହଜାର ସଂଖ୍ୟାରେ ବଡ଼ବଡ଼ ଭାରିଯାନ ଶିଳ୍ପାଞ୍ଚଳ କଞ୍ଚାମାଲ ଓ ଉତ୍ପାଦ ପରିବହନରେ ଲାଗୁଥିବାବେଳେ ଏପର୍ଯ୍ୟନ୍ତ କଳିଙ୍ଗନଗରଠାରେ ଏକ ଟ୍ରକ ଟର୍ମିନାଲ ନିର୍ମାଣ କରାଯାଉ ନାହିଁ, ଯାହାକି ଶିଳ୍ପାଞ୍ଚଳରେ ଦୁର୍ଘଟଣାର ଅନ୍ୟ ଏକ କାରଣ ବୋଲି କୁହାଯାଉଛି।
