ନୂଆଦିଲ୍ଲୀ, ୬।୧ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଞ୍ଜାବ ଗସ୍ତ ସମୟରେ ଯାଇଥିବା ସୁରକ୍ଷା ଅବହେଳା ସମ୍ପର୍କରେ ଭାରତୀୟ ଚାଷୀ ସଂଘର ମୁଖପାତ୍ର ରାକେଶ ଟିକାଏତ୍ଙ୍କ ବଡ ବିବୃତ୍ତି ଏବେ ସାମ୍ନାକୁ ଆସିଛି। ଏବିପି ନ୍ୟୁଜ ସହିତ ଏକ ସ୍ବତନ୍ତ୍ର ବାର୍ତ୍ତାଳାପରେ ରାକେଶ ଟିକାଏତ୍ କହିଛନ୍ତି ଯେ ଏହା କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ଯୋଜନା।
ରାଜନୈତିକ ଫାଇଦା ପାଇଁ କେନ୍ଦ୍ର ଏବଂ ରାଜ୍ୟ ସରକାର ଜାଣିଶୁଣି ପ୍ରଧାନମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥା ଅବହେଳା କରିଛନ୍ତି। ୧୨୦ କିଲୋମିଟରର ରାସ୍ତା ପ୍ରଧାନମନ୍ତ୍ରୀଙ୍କ ଦ୍ୱାରା ଯାତ୍ରା ପାଇଁ ସ୍ଥିର କରାଯିବା ଉଚିତ ନ ଥିଲା ବୋଲି ସେ କହିଛନ୍ତି।
ରାକେଶ ଟିକାଏତ୍ କହିଛନ୍ତି ଯେ, କଂଗ୍ରେସ ସରକାର କହୁଛନ୍ତି ଯେ ସେଠାରେ ଭିଡ଼ କମ ଥିଲା। ତେଣୁ ରାସ୍ତାରେ ଗସ୍ତ କରି ଫେରିବା ଲାଗି ପ୍ରସ୍ତୁତି କରାଯାଇଥିଲା। ଆଗରେ କୃଷକଙ୍କ ପ୍ରଦର୍ଶନ ଥିଲା, କିନ୍ତୁ ରାସ୍ତା ଅବରୋଧ ଲାଗି ଏହା କରାଯାଇ ନ ଥିଲା। ପ୍ରଧାନମନ୍ତ୍ରୀ ଆସୁଥିବାର ଜାଣିବା ପରେ ପ୍ରଦର୍ଶନକାରୀ ରାସ୍ତାକୁ ଆସି ଯାଇଥିଲେ।
ଏହା ପଞ୍ଜାବ ସରକାରଙ୍କ ଦାୟିତ୍ୱ ଥିଲା। ରାଜ୍ୟ ସରକାର ବିରୋଧ କରୁଥିବା ଚାଷୀଙ୍କ ସହ ଆଲୋଚନା କରିପାରିଥାନ୍ତେ। ବିମାନ ବନ୍ଦରରେ ପହଞ୍ଚି ରାସ୍ତାରେ ଯିବା ଲାଗି ନିଷ୍ପତ୍ତି ନେବା ସମ୍ପର୍କରେ ସ୍ଥିର କରିବା ଉଚିତ ନ ଥିଲା ବୋଲି ସେ କହିଛନ୍ତି। ରାଜନୈତିକ ଫାଇଦା ପାଇଁ ଉଭୟ ପଞ୍ଜାବ ଏବଂ କେନ୍ଦ୍ର ସରକାର ଏହି କାର୍ଯ୍ୟ କରିଥିବା ଟିକାଏତ୍ ଅଭିଯୋଗ କରିଛନ୍ତି।