ନୂଆଦିଲ୍ଲୀ,୩୧।୩: ଓଟିଟି ପ୍ଲାଟଫର୍ମ ଏବଂ ଓ୍ବେବ୍ ଚ୍ୟାନେଲଗୁଡ଼ିକରେ ଅଶ୍ଳୀଳ ଦୃଶ୍ୟ ଓ ଧର୍ମୀୟ ଉତ୍ତେଜନାପୂର୍ଣ୍ଣ ବିଷୟବସ୍ତୁର ପ୍ରସାରଣ କରାଯାଉଛି। ସେଗୁଡ଼ିକୁ କାଟଛାଣ୍ଟ କରିବା ଲାଗି କେନ୍ଦ୍ର ସରକାର ଆଇନ ଆଣନ୍ତୁ ବୋଲି ବିଜେଡି ଏମ୍ପି ପ୍ରସନ୍ନ ଆଚାର୍ଯ୍ୟ ବୁଧବାର କହିଛନ୍ତି। ରାଜ୍ୟ ସଭାରେ ଶୂନ୍ୟକାଳ ଆଲୋଚନାରେ ଭାଗନେଇ ଆଚାର୍ଯ୍ୟ କହିଥିଲେ, ମହାମାରୀ ବେଳେ କଟକଣା ଯୋଗୁ ପାରମ୍ପରିକ ମନୋରଞ୍ଜନ ଉତ୍ସ ଗୁରୁତର ପ୍ରଭାବିତ ହୋଇଥିବାବେଳ ଓଟିଟି ପ୍ଲାଟଫର୍ମଗୁଡ଼ିକର ଦର୍ଶକ ସଂଖ୍ୟା ଅଭୂତପୂର୍ବ ଭାବେ ବୃଦ୍ଧି ପାଇଛି। ଏହାର ସୁଯୋଗ ନେଇ ଓ୍ବେବ୍ ଚ୍ୟାନେଲଗୁଡ଼ିକ ଅଶ୍ଳୀଳ ଦୃଶ୍ୟ ଓ ଆପତ୍ତିଜନକ ଭାଷାର ବ୍ୟବହାର କରୁଛନ୍ତି। ଯୁବପିଢ଼ିଙ୍କ ଉପରେ ଏହାର ପ୍ରତିକୂଳ ପ୍ରଭାବ ପଡ଼ୁଛି। ବିଭିନ୍ନ ଓ୍ବେବଚ୍ୟାନେଲରେ ପ୍ରସାରିତ ଶୋ ଦେଶର ସାମ୍ପ୍ରଦାୟିକ ସଦ୍ଭାବନାକୁ ମଧ୍ୟ ଗମ୍ଭୀର ଭାବେ ପ୍ରଭାବିତ କରୁଛି ବୋଲି ଆଚାର୍ଯ୍ୟ କହିଥିଲେ। ସେନ୍ସରଶିପ୍ ବ୍ୟବସ୍ଥା ଥିଲେ ଏଭଳି ଶୋ’ ପ୍ରସାରଣ ହୋଇପାରନ୍ତା ନାହିଁ। ଚଳଚ୍ଚିତ୍ର ପାଇଁ ସେନ୍ସର ବୋର୍ଡ ଥିବାବେଳେ ଓ୍ବେବ୍ ଚ୍ୟାନେଲ ପାଇଁ ନାହିଁ। ସୃଜନଶୀଳତାର ସ୍ବାଧୀନତା ଏବଂ ମତ ପ୍ରକାଶ କରିବା ଅଧିକାର ନାଁରେ ମହିଳାଙ୍କ ପ୍ରତି ଭ୍ରଷ୍ଟାଚାର ଓ ଧର୍ମୀୟ ଭାବନା ପ୍ରତି ଅସମ୍ମାନ କରିବାକୁ ପ୍ରୋତ୍ସାହିତ କରାଯାଇପାରିବ ନାହିଁ। ଟୁଇଟରରେ ଧର୍ମ ସମ୍ପ୍ରଦାୟ ଉପରେ ଆପତ୍ତିଜନକ ମନ୍ତବ୍ୟକୁ ନିକଟରେ ଦିଲ୍ଲୀ ହାଇକୋର୍ଟ ନିନ୍ଦା କରିଥିଲେ। ଓ୍ବେବ୍ ଚ୍ୟାନେଲଗୁଡ଼ିକର ସେନ୍ସରଶିପ୍ ପାଇଁ ଆଇନ ଅଣାଯିବା ଆବଶ୍ୟକ ବୋଲି ବରିଷ୍ଠ ବିଜେଡି ଏମ୍ପି କହିଛନ୍ତି।
