ହାଇଦ୍ରାବାଦ,୮।୧୧: ଉତ୍କଳୀୟ ନୌବାଣିଜ୍ୟ ପରମ୍ପରାକୁ ମନେ ପକାଇବା ପାଇଁ ପ୍ରତିବର୍ଷ କାର୍ତ୍ତିକ ପୂର୍ଣ୍ଣିମାରେ ପାଳନ ହୁଏ ବୋଇତ ବନ୍ଦାଣ ଉତ୍ସବ। ଏଥିପାଇଁ ମଙ୍ଗଳବାର ପୁରପଲ୍ଲୀରୁ ଆରମ୍ଭ କରି ସହର ପର୍ଯ୍ୟନ୍ତ ସବୁଠି ଉତ୍ସବମୁଖର। ସକାଳୁ ନଦୀ, ପୁଷ୍କରିଣୀ ଏପରିକି ମହୋଦଧିରେ ବହୁସଂଖ୍ୟାରେ ଲୋକମାନେ ଡଙ୍ଗା ଭସାଇ ଏହି ମହାନ ପରମ୍ପରାକୁ ମନେ ପକାଇଛନ୍ତି। କେବଳ ରାଜ୍ୟ ନୁହେଁ ପ୍ରବାସୀ ଓଡ଼ିଆମାନେ ମଧ୍ୟ ରାଜ୍ୟ ବାହାରେ ଏହି ଉତ୍ସବକୁ ଖୁବ ଆନନ୍ଦ ଉଲ୍ଲାସର ସହ ପାଳନ କରିଛନ୍ତି। ହାଇଦ୍ରାବାଦରେ ଉତ୍କଳ ୟୁଥ୍ ଆସୋସିଏସନ ପକ୍ଷରୁ ଏକ ଭବ୍ୟ ବୋଇତ ବନ୍ଦାଣ ଉତ୍ସବ ଆୟୋଜିତ ହୋଇଥିଲା। ହଜାର ହଜାର ଓଡ଼ିଆ ବେଶ ଆନନ୍ଦ ଉଲ୍ଲାସର ସହ ପାଳନ କରିଥିଲେ ବୋଇତ ବନ୍ଦାଣ ଉତ୍ସବ। ହାଇଦ୍ରାବାଦ ସ୍ଥିତ ପ୍ରସିଦ୍ଧ ମାଲକମ ଚେରୁଭୁ ହ୍ରଦରେ ଆ-କା-ମା-ବୈ ଉଚ୍ଚାରଣ ସହ ପାଣିରେ ଭସାଇଥିଲେ ସୁନ୍ଦର ସୁନ୍ଦର ହାତ ତିଆରି ଡଙ୍ଗା। ଏହି ଅବସରରେ ବରିଷ୍ଠ ଅଭିନେତା ତଥା ରାଜ୍ୟ ଚଳଚ୍ଚିତ୍ର ଉନ୍ନୟନ ନିଗମର ଅଧ୍ୟକ୍ଷ କୁନା ତ୍ରିପାଠୀ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ପ୍ରବାସୀ ଓଡ଼ିଆ ଲୋକମାନଙ୍କ ସହ ଭାବ ବିନିମୟ କରିବା ସହ ସେ ଓଡ଼ିଆ ସଂସ୍କୃତି ଏବଂ ନୌବାଣିଜ୍ୟ ପରମ୍ପରା ଉପରେ ବିସ୍ତୃତ ଭାବରେ ଆଲୋଚନା କରିଥିଲେ। ଏଥିରେ ଡାକ୍ତର ଅନୁରାଧା ପଣ୍ଡା ଓ ଡାକ୍ତର ନିହାର ରଞ୍ଜନ ପ୍ରଧାନ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ କୁନି କୁନି ସାଧବପୁଅ ଓ ସାଧବବୋହୁ, ମୁରୁଜ, ମୋ ବୋଇତ ଆଦି ପ୍ରତିଯୋଗିତା ଆୟୋଜିତ ହୋଇଥିଲା। ଏଥିସହ ସାମୁହିକ ଦୀପଦାନ, ଆକାଶ ଦୀପ ଆଦି କାର୍ଯ୍ୟକ୍ରମ ସହ ପ୍ରସାଦ ସେବନର ମଧ୍ୟ ଆୟୋଜନ କରାଯାଇଥିଲା ।
