ନାରାୟଣପାଟଣା,୪।୧୦(ଡି.ଏନ୍.ଏ.): ଗାଁକୁ ଯିବାକୁ ହେଲେ ପାରି ହେବାକୁ ପଡେ ନଦୀ। ନଦୀରେ ପୋଲ ନ ଥିବାରୁ ୨ଜଣ ରୋଗୀଙ୍କୁ ଗ୍ରାମବାସୀ ଷ୍ଟେଚରରେ ବୋହି ଡାକ୍ତରଖାନା ନେଇଛନ୍ତି। ଏପରି ଦୃଶ୍ୟ କୋରାପୁଟ ଜିଲା ମାଓବାଦୀ ଅଧ୍ୟୁଷିତ ନାରାୟଣପାଟଣା ବ୍ଲକ ସଦର ମହକୁମା ଖାରିକୋନ ଗାଁ ରେ ଦେଖିବାକୁ ମିଳିଛି।
ଗାଁର ରାମ ସୁକିୟା(୪୫) ଓ ଲକ୍ଷ୍ମୀ କୁନ୍ଦାରିଆ ଜ୍ବରରେ ଆକ୍ରାନ୍ତ ହୋଇ ଥିଲେ। ରବିବାର ରାତିରେ ସେମାନଙ୍କ ସ୍ବାସ୍ଥାବସ୍ଥା ବିଗିଡ଼ି ଯାଇଥିଲା। ବିଳମ୍ବିତ ରାତି ଯୋଗୁ ମେଡିକାଲ୍ ନେବାକୁ ପରିବାର ଲୋକଙ୍କ ପକ୍ଷରେ ସମ୍ଭବ ହୋଇ ନ ଥିଲା। ସୋମବାର ସକାଳେ ପରିବାର ଲୋକେ ଆମ୍ବୁଲାନ୍ସକୁ ଖବର ଦେଇଥିଲେ। ଆମ୍ବୁଲାନ୍ସ ଆସି ଗାଁ ଦେଇ ପ୍ରଭାବିତ ହେଉଥିବା ଝଞ୍ଜାବତି ନଦୀ କୂଳରେ ଆସି ଅଟକିଥିଲା। ପରେ ଆମ୍ବୁଲାନ୍ସ କର୍ମଚାରୀ ନଦୀ ପାର ହେଇ ଷ୍ଟ୍ରେଚର ନେଇ ଗାଁକୁ ଯାଇଥିଲେ। ଆମ୍ବୁଲାନ୍ସ କର୍ମଚାରୀ, ସରପଞ୍ଚ ରେବତୀ କୁନ୍ଦାରୀୟା, ରୋଗୀଙ୍କ ପରିବାର ଓ ଗ୍ରାମବାସୀ ଷ୍ଟ୍ରେଚରରେ ଉଭୟଙ୍କୁ ପ୍ରାୟ ୩ କିମି ବୋହି ନଦୀ ପର୍ଯ୍ୟନ୍ତ ଯାଇଥିଲେ। ସେଠାରେ ଭରା ନଦୀ ବିପଦ ସଙ୍କୁଳ ଅବସ୍ଥାରେ ପାରି ହୋଇ ଆମ୍ବୁଲାନ୍ସ ପର୍ଯ୍ୟନ୍ତ ଆଣିଥିଲେ। ସେଠାରୁ ସେମାନଙ୍କୁ ନାରାୟଣପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଏବେ ସେଠାରେ ଉଭୟଙ୍କ ଚିକତ୍ସା ଚାଲିଛି।
ସ୍ବାଧୀନତାର ୭୫ ବର୍ଷ ପରେ ବି ଆଜି ପର୍ଯ୍ୟନ୍ତ ଝଞ୍ଜାବତି ନଦୀରେ ପୋଲ ତିଆରି ହୋଇପାରିଲା ନାହିଁ। ଏହି ଝଞ୍ଜାବତୀ ନଦୀର ପୋଲ ନଥିବାରୁ ୧୦୦ରୁ ଊର୍ଦ୍ଧ୍ୱ ପରିବାର ଏବଂ ୫ରୁ ଊର୍ଦ୍ଧ୍ୱ ଗାଁର ଲୋକେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ଗାଁ ଲୋକେ ବହୁବାର ରାସ୍ତା ଏବଂ ପୋଲ ପାଇଁ ପ୍ରଶାସନର ଦ୍ବାରସ୍ଥ ହେଲାପରେ ମଧ୍ୟ କେହି ଶୁଣୁନାହାନ୍ତି ବୋଲି ସରପଞ୍ଚ ଏବଂ ଗ୍ରାମବାସୀ ଅଭିଯୋଗ କରିଛନ୍ତି। ସେମାନେ ପୋଲ ଓ ରାସ୍ତା ଦାବି କରିଛନ୍ତି।
