ୟାଦ୍ଗିର(କର୍ନାଟକ),୧୭ା୪: କର୍ନାଟକର ସୁରପୁର ତାଲୁକ୍ରେ ଶୁକ୍ରବାର ଏକ କାର୍ ଏବଂ ଘରୋଇ ବସ୍କୁ ମୁହାଁମୁହିଁ ଧକ୍କା ହୋଇଥିଲା। ପରବର୍ତ୍ତୀ ସମୟରେ କାରଟି ଜଳିଯିବାରୁ ସେଥିରେ ଥିବା ଗୋଟିଏ ପରିବାରର ୯ ଜଣ ସଦସ୍ୟଙ୍କ ମୃତ୍ୟୁ ଘଟିଛି। ଶନ୍ତପୁରା କ୍ରସ୍ ନିକଟରେ ଏହି ଦୁର୍ଘଟଣା ଘଟିଥିବା ପୋଲିସ କହିଛି। ମୃତକମାନେ ହେଲେ କ୍ରିଷ୍ଣା ନାୟକ (୫୨), ସ୍ତ୍ରୀ ଅନନ୍ତକଳା(୪୫), ଶରନପ୍ପା(୩୬) ଏବଂ ସ୍ତ୍ରୀ ନିସର୍ଗ(୩୦), ସେମାନଙ୍କ ପିଲା ସିଦ୍ଧାର୍ଥ (୩), ଆଦଭିକ(୫) ଏବଂ ଶ୍ରୀନିଧି (ଦେଢ଼ବର୍ଷ), ଶଶୀକଳା (୩୦) ଓ ତାଙ୍କ ପୁଅ ଚନ୍ଦନ(୮)। ଶଶୀକଳାଙ୍କ ଅନ୍ୟ ଏକ ପୁଅ ବିରାଟ(୧୦) ଦୁର୍ଘଟଣାରୁ ବର୍ତ୍ତିଯାଇଛନ୍ତି।
ପ୍ରତ୍ୟକ୍ଷଦର୍ଶୀଙ୍କ ସୂଚନା ମୁତାବକ, ଏସ୍ପି ପୃଥ୍ବିକ୍ ଶଙ୍କର କହିଛନ୍ତି, କାର୍ର ଟାୟାର ଫାଟିଯିବାରୁ ଡ୍ରାଇଭର ନିୟନ୍ତ୍ରଣ ହରାଇ ବିପରୀତ ଦିଗରୁ ଆସୁଥିବା ବସ୍କୁ ଧକ୍କା ଦେଇଥିଲା। ଦୁର୍ଘଟଣା ପରେ କାର୍ ଜଳିଯିବାରୁ ସେଥିରେ ଥିବା ୯ ଜଣଙ୍କର ମୃତ୍ୟୁ ଘଟିଥିଲା। କାରରେ ମୋଟ ୧୦ଜଣ ଯାତ୍ରା କରୁଥିବା ବେଳେ ସେମାନଙ୍କ ମଧ୍ୟରୁ ୫ ଜଣ ଛୋଟ ପିଲା। ସମସ୍ତ ଯାତ୍ରୀଙ୍କୁ ୟାଦ୍ଗିରି ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସକୁ ନିଆଯାଇଥିବା ବେଳେ ସେଠାରେ ଡାକ୍ତର ୯ଜଣଙ୍କୁ ମୃତ ଘୋଷଣା କରିଥିଲେ। ଏକମାତ୍ର ଜୀବିତ ଥିବା ବିରାଟଙ୍କୁ ସେଠାରେ ଚିକିତ୍ସା କରାଯାଉଛି।
ଦୁର୍ଘଟଣା ପରେ ଉଭୟ କାର୍ ଓ ବସ୍ ସମ୍ପୂର୍ଣ୍ଣ ଜଳିଯାଇଥିଲେ। ତେବେ ବସ୍ରେ ଥିବା ୨୦ ଜଣ ଯାତ୍ରୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା।