ବରଗଡ଼ ଅଫିସ,୨୩ା୫: ବରଗଡ଼ ଜିଲା ବରପାଲି ନିକଟସ୍ଥ ସରଣ୍ଡାପାଲିରେ ଏକ ସଡ଼କ ଦୁର୍ଘଟଣା ଘଟିଛି। ଦୁର୍ଘଟଣାରେ ଦମ୍ପତିଙ୍କର ମୃତ୍ୟୁ ହୋଇଛି।
ପ୍ରକାଶ ଯେ, ସୋମବାର ସକାଳୁ ବିଜେପୁର ନିକଟ କେଶେଇପାଲି ଗ୍ରାମର ଗଣେଶ ରାମ ସାହୁ ଓ ତାଙ୍କ ସ୍ତ୍ରୀ ସନ୍ତୋଷିନୀ ବାଇକ୍ (ସିଜି ୧୧ଏଡି ୨୪୩୩)ରେ ପଥର୍ଲା ଗ୍ରାମକୁ ଏକ ବାହାଘରକୁ ଯାଉଥିଲେ। ଏହି ସମୟରେ ସରଣ୍ଡାପାଲି ନିକଟରେ ସାମ୍ନା ପଟୁ ଆସୁଥିବା କାର୍ (ସିଜି ୦୪ ଏନ୍ଟି ୧୧୦୧) ତାଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ଗଣେଶଙ୍କ ମୃତ୍ୟୁ ହୋଇଥିବା ବେଳେ ସ୍ତ୍ରୀ ସନ୍ତୋଷିନୀଙ୍କୁ ଗୁରୁତର ଅବସ୍ଥାରେ ବରଗଡ଼ର ଏକ ଘରୋଇ ଡାକ୍ତରଖାନାକୁ ନିଆଯାଇଥିଲା। ତେବେ ବାଟରେ ତାଙ୍କ ଜୀବନ ଚାଲିଯାଇଥିଲା। କାର୍ଟି ବନ୍ଧପାଲିର ବୋଲି ସୂଚନା ମିଳିଛି। ବରପାଲି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। କାର୍ ଚାଳକ ରାହୁଲ ଗୋୟଲଙ୍କୁ ଅଟକ ରଖି ପୋଲିସ ପଚରାଉଚରା କରୁଛି।
