କେନ୍ଦୁଝର,୧୭।୨ (ନରେଶ ଚନ୍ଦ୍ର ପଟ୍ଟନାୟକ): ମଙ୍ଗଳବାର ବା ଆଜିଠାରୁ ଦଶମ ଏବଂ ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ଆରମ୍ଭ ହେଉଛି । ତେବେ ସକାଳ ପ୍ରାୟ ୮ଟା୩୦ ରେ ଏକ କାରରେ ସିବିଏସଇ ଦଶମ ପରୀକ୍ଷା ଦେବାକୁ ଯିବା ବେଳେ ରାସ୍ତାରେ ସିରିଜ୍ ଦୁର୍ଘଟଣା ହୋଇଛି । ଦୁଇଜଣ ପରୀକ୍ଷାର୍ଥୀ ସମେତ ଛଅ ଜଣ ଆହତ ହୋଇଛନ୍ତି । ଘଟଣାଟି ଚମ୍ପୁଆ ଥାନା ଅନ୍ତର୍ଗତ ରିମୁଳି ନିକଟ ଏନଏଚ ୨୦ରେ ଦୁର୍ଘଟଣା ହୋଇଛି । ଦୁଇ ଛାତ୍ରଙ୍କୁ ଉଦ୍ଧାର କରି ପୋଲିସ ଚମ୍ପୁଆ ଉପଖଣ୍ଡ ଡାକ୍ତର ଖାନାରେ ଚିକିତ୍ସିତ କରି ପରୀକ୍ଷା କେନ୍ଦ୍ରରେ ଛାଡ଼ି ଦେଇଛନ୍ତି। ସେମାନଙ୍କ ଅବସ୍ଥା ଭଲ ଅଛି ଏବଂ ସେମାନେ ସ୍ଵାଭାବିକ ଭାବେ ପରୀକ୍ଷା ଦେଉଛନ୍ତି ବୋଲି ଥାନା ଅଧିକାରୀ ସ୍ୱରୂପ ରଞ୍ଜନ ନାୟକ କହିଛନ୍ତି।
ପ୍ରକାଶ ଯେ ଆଜି ଝୁମ୍ପୁରା ଆଦର୍ଶ ବିଦ୍ୟାଳୟର ଦୁଇ ଛାତ୍ର ପରୀକ୍ଷା ଦେବାକୁ ଚମ୍ପୁଆ ସ୍ଥିତ କେରଳା ଇଂରାଜୀ ମିଡିଆମ୍ ପବ୍ଲିକ ସ୍କୁଲକୁ ଏକ କାରରେ ଯାଉଥିଲେ । ଏନଏଚ ରାସ୍ତା ମରାମତି ଚାଲିଥିବାରୁ ଅର୍ଶଳାରୁ ରିମୁଳିରେ ଗୋଟିଏ ପଟୁ ଗାଡ଼ି ଯିବାଆସିବା କରୁଛି । ଏଣୁ ଉକ୍ତ ସ୍ଥାନରେ ହଠାତ୍ ଏକ ଲୁହା ପଥର ବୋଝେଇ ଟ୍ରେଲର ଆଗ ପଟୁ ଆସିଥିଲା। ଟ୍ରେଲରଟି କାରକୁ ବଞ୍ଚାଇବା ପାଇଁ ସାମାନ୍ୟ ସାଇଡ କରିବାରୁ ହଠାତ୍ ଡାଲା ଓଲଟି ପଡିଥିଲା। ଫଳରେ ଡାଲା ବାଜି କାରଟି କ୍ଷତଗ୍ରସ୍ତ ହୋଇଥିଲା। କାରଟି ବହୁ ପରିମାଣରେ କ୍ଷତିଗ୍ରସ୍ତ ହୋଇଥିଲେ ହେଁ ଗାଡ଼ିରେ ବସିଥିବା ଦୁଇ ଛାତ୍ର ସାମାନ୍ୟ ଆହତ ହୋଇ ଅଳ୍ପକେ ବଡ ଅଘଟଣରୁ ବର୍ତ୍ତି ଯାଇଥିଲେ ।
କାର ଚାଳକ ମଧ୍ୟ ଆହତ ହୋଇ ଥିବା ବେଳେ ତାଙ୍କୁ ପ୍ରଥମେ ଚମ୍ପୁଆ ଓ ପରେ କେନ୍ଦୁଝରକୁ ଅଧିକ ଚିକିତ୍ସା ପାଇଁ ପଠେଇ ଦିଆଯାଇଛି । ଅନ୍ୟ ପକ୍ଷରେ କାର ପଛରେ ଆସୁଥିବା ଏକ ବୁଲେଟ ହଠାତ୍ ଦୁର୍ଘଟଣା ଯୋଗୁଁ ଭାରସାମ୍ୟ ହରାଇ କାର ପଛରେ ପିଟିଦେବାରୁ ଦୁଇ ବୁଲେଟ ଆରୋହୀ ଆହତ ହୋଇଥିବା ଜଣା ପଡ଼ିଛି। ଏହି ଘଟଣାକୁ ନେଇ ଉକ୍ତ ଅଞ୍ଚଳରେ ଭୟ ସୃଷ୍ଟି ହୋଇଥିବା ବେଳେ ଦୁର୍ଘଟଣା ପରେ ଯାତାୟତ ବନ୍ଦ ହୋଇ ଯାଇଥିଲା। ଦଶମ ପରୀକ୍ଷା ଚାଲିଥିବା ବେଳେ ଲୁହ ପଥର ଗାଡ଼ି ଚଳାଚଳ ଉପରେ କଟକଣା କରାଯାଇନଥିବାରୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖାଦେଇଛି ।
