ଅମୃତସର,୧୫।୮: ସାରା ଦେଶରେ ୭୫ତମ ସ୍ବାଧୀନତା ଦିବସ ଧୂମଧାମରେ ପାଳନ କରାଯାଉଛି। ଏହି ଅବସରରେ ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଅମୃତସରରେ ତ୍ରିରଙ୍ଗା ଉତ୍ତୋଳନ କରି ଦେଶର ଶହୀଦମାନଙ୍କୁ ଅଭିବାଦନ ଜଣାଇଛନ୍ତି। ଏହାସହ ସେ ପାକିସ୍ତାନକୁ ଖୋଲା ଚେତାବନୀ ମଧ୍ୟ ଦେଇଛନ୍ତି। କ୍ୟାପଟେନ କହିଛନ୍ତି ଯେ, ଆମ ଦେଶରେ କୌଣସି ପ୍ରକାର ଆକ୍ରୋଶ କିମ୍ବା ଆକ୍ରମଣକୁ ଆମେ ବରଦାସ୍ତ କରିବୁ ନାହିଁ। ଯଦି ସେମାନେ ସାହସୀ ହେବାକୁ ଚେଷ୍ଟା କରନ୍ତି, ତେବେ ଆମେ ସେମାନଙ୍କୁ (ପାକିସ୍ତାନ) ଜୀବନର ଉଚିତ ଶିକ୍ଷା ଦେବୁ। ଅମୃତସରର ଶ୍ରୀ ଗୁରୁ ନାନକ ଦେବ ଜୀ ଷ୍ଟାଡିୟମରେ ଜାତୀୟ ପତାକା ଉତ୍ତୋଳନ କରିବା ପରେ ତାଙ୍କ ଅଭିଭାଷଣରେ ମୁଖ୍ୟମନ୍ତ୍ରୀ କହିଛନ୍ତି ଯେ, ପଞ୍ଜାବର କଂଗ୍ରେସ ସରକାର ରାଜ୍ୟରୁ ଗ୍ୟାଙ୍ଗଷ୍ଟର ଏବଂ ଆତଙ୍କବାଦୀ ମଡ୍ୟୁଲକୁ ସମ୍ପୂର୍ଣ୍ଣ ଭାବେ ହଟାଇ ଦେଇଛନ୍ତି। ପଞ୍ଜାବରେ କଂଗ୍ରେସ କ୍ଷମତାକୁ ଆସିବା ପରଠାରୁ ୩୫୬୫ ଗ୍ୟାଙ୍ଗଷ୍ଟର ଜେଲରେ ଅଛନ୍ତି। ବିଦେଶୀ ମାଟିରେ ବସିଥିବା ଗ୍ୟାଙ୍ଗଷ୍ଟରକୁ ଭାରତକୁ ଆଣିବା ପାଇଁ ପ୍ରସ୍ତୁତି ଚାଲିଛି। ପାକିସ୍ତାନ ସୀମାରେ ନିର୍ମିତ ୪୭ଟି ଆତଙ୍କବାଦୀ ମଡ୍ୟୁଲ ମଧ୍ୟ ନିଷ୍କ୍ରିୟ କରାଯାଇଛି ଏବଂ ଏହି ସମୟରେ ୨୯୨ ଆତଙ୍କବାଦୀଙ୍କୁ ଜେଲରେ ରଖାଯାଇଛି।
