ଚଣ୍ଡିଗଡ଼,୧୯ ।୧୧: ଦେଶର କୃଷକଙ୍କ ପାଇଁ ଶୁକ୍ରବାର ଏକ ଶୁଭ ଦିନ ବୋଲି କୁହାଯାଉଛି । କେନ୍ଦ୍ର ସରକାର ଆଣିଥିବା ୩ ନୂଆ କୃଷି ନିୟମକୁ ଫେରାଇ ନେବା କଥା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରିଛନ୍ତି । ଏବେ ଏହାକୁ ନେଇ ରାଜନୀତି ହୋଇଛି ସରଗରମ । କିଛି ରାଜ୍ୟରେ ଆଗାମୀ ଦିନରେ ହେବାକୁ ଥିବା ବିଧାନସଭା ନିର୍ବାଚନକୁ ଆଖି ଆଗରେ ରଖି ମୋଦି ଏହି ଘୋଷଣା କରିଥିବା କୁହାଯାଉଛି । ବିଶେଷ କରି ପଞ୍ଜାବ ରାଜନୀତିରେ ପୁଣିଥରେ ସରଗରମ ଦେଖାଦେଇଛି । ଏପଟେ କୃଷି ଆଇନ ଫେରାଇ ନିଆଯିବା ଘୋଷଣା ହେବା ପରେ ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ଏହାକୁ ପ୍ରଶଂସା କରିଛନ୍ତି । ଏବେ ସେ କେନ୍ଦ୍ର ସରକାରଙ୍କ ନିଷ୍ପତ୍ତିକୁ ନେଇ ଖୁସି ହେବା ସହ ଭାରତୀୟ ଜନତା ପାର୍ଟି(ଭାଜପା) ସହ କାମ କରିବାକୁ ଉତ୍ସୁକ ଥିବା କହିଛନ୍ତି । ଏଥିରୁ ସ୍ପଷ୍ଟ ହୋଇଛି କି ପଞ୍ଜାବରେ ୨୦୨୨ରେ ହେବାକୁ ଥିବା ବିଧାନସଭା ନିର୍ବାଚନରେ କ୍ୟାପଟେନ ଭାଜପା ସହ ମିଶି ନିର୍ବାଚନ ଲଢିବେ । ଏହା ଫଳରେ ପଞ୍ଜାବରେ ନୂଆ ମେଣ୍ଟ ହେବାର ବାଟ ସଫା ହୋଇଯାଇଛି । କ୍ୟାପଟେନ ଟୁଇଟ୍ କରି କହିଛନ୍ତି କେନ୍ଦ୍ର ସରକାରଙ୍କ ଏଭଳି ନିଷ୍ପତ୍ତି ଯୋଗୁ କେବଳ ଯେ କୃଷକଙ୍କୁ ଆଶ୍ୱସ୍ତି ମିଳିଛି ତା’ନୁହେଁ ବରଂ ପଞ୍ଜାବରେ ପ୍ରଗତିର ମାର୍ଗ ପ୍ରଶସ୍ତ ହୋଇଯାଇଛି । ମୁଁ କୃଷକଙ୍କ ବିକାଶ ପାଇଁ ଭାଜପା ସହ ମିଶି କାମ କରିବାକୁ ଉତ୍ସୁକ ଅଛି । ମୁଁ ପଞ୍ଜାବ ଲୋକଙ୍କ ସହ କଥା ହୋଇଛି କି ମୁଁ ସେପର୍ଯ୍ୟନ୍ତ ଶାନ୍ତିରେ ବସି ପାରିବି ନାହିଁ ଯେପର୍ଯ୍ୟନ୍ତ ମୁଁ ସମସ୍ତଙ୍କ ଆଖିର ଲୁହ ପୋଛି ନ ପାରିଛି ।
