ସୋନପୁର,୨୯।୮(ମୃତ୍ୟୁଞ୍ଜୟ ଶତପଥୀ): ଓଡ଼ିଶାର କନ୍ଧମାଳ ଓ ବୌଦ୍ଧ ଜିଲାର ଆଭ୍ୟନ୍ତରୀଣ ଜଙ୍ଗଲ ଅଞ୍ଚଳରେ ଉତ୍ପାଦିତ ହେଉଥିବା ଗଞ୍ଜେଇର ଚାହିଦା ରାଜ୍ୟ ବାହାରେ ଖୁବ୍ ଅଧିକ। ହଜାର ହଜାର ହେକ୍ଟର ଜମିରେ ଚାଷ ହେଉଥିବା ଉନ୍ନତ ମାନର ଗଞ୍ଜେଇ କିଣିବା ପାଇଁ ଏବେ ପ୍ରତିଯୋଗିତା ଚାଲିଛି। ଅମଳ ପରେ ଗଞ୍ଜେଇଗୁଡିକୁ ଭଲଭାବେ ପ୍ୟାକିଂ କରି ଛତିଶଗଡ଼, ମଧ୍ୟପ୍ରଦେଶ, ଉତ୍ତରପ୍ରଦେଶ, ବିହାର, ପଶ୍ଚିମବଙ୍ଗ, ରାଜସ୍ଥାନ ଓ ଦିଲ୍ଲୀ ଭଳି ରାଜ୍ୟକୁ ଚାଲାଣ କରାଯାଉଛି। ପୋଲିସ ଓ ଅବକାରୀ ବିଭାଗର ଧ୍ୟାନ ହଟାଇବା ପାଇଁ ବ୍ୟବସାୟୀମାନେ ଅଭିନବ ଉପାୟରେ ଗଞ୍ଜେଇ ଚାଲାଣ କରୁଛନ୍ତି। ଗୁରୁବାର ଅଶୋକ ଲିଲାଣ୍ଡ ପିକ୍ଅପ ଭ୍ୟାନ୍(ନଂ. ଏମ୍ଏଚ୪୦ବିଜି-୫୦୬୫)ରେ ମହାରାଷ୍ଟ୍ରର ନାଗପୁରକୁ ଗଞ୍ଜେଇ ଚାଲାଣ ହେଉଥିଲା ବେଳେ ସୋନପୁର ପୋଲିସ ଏହାକୁ ଧରିଛି। ବ୍ୟବସାୟୀ ପିଆଜ ବସ୍ତା ଭିତରେ ଅଭିନବ ଉପାୟରେ ଗଞ୍ଜେଇ ଚାଲାଣ କରୁଥିଲେ। ଭ୍ୟାନ୍ଟି ବିଶିମୁଣ୍ଡା ନିକଟରେ ରାସ୍ତା ପାର୍ଶ୍ୱରେ ଛିଡା ହୋଇଥିଲା। ପୋଲିସ ଟିମ୍ ସନ୍ଦେହରେ ତନଖି କରିବା ସମୟରେ ୧୦ବସ୍ତା ପିଆଜ ମଝିରେ ଗଞ୍ଜେଇ ଠାବ ହୋଇଥିଲା। ୩ଟି ପ୍ୟାକେଟ୍ରୁ ୫କିଲୋ ଗଞ୍ଜେଇ ମିଳିଛି। ଏହି ଘଟଣାରେ ଟ୍ରକ ଡ୍ରାଇଭର ନାଗପୁର ଜିଲା ଶାନ୍ତିନଗରପଡା ଅଞ୍ଚଳର ଅବଦୁଲ କଲିମ ଖାନ(୫୮)ଙ୍କୁ ଗିରଫ କରିଛି। ପୋଲିସ ତାଙ୍କ ନିକଟରୁ ୧ଲକ୍ଷ ୪୭ହଜାର ଟଙ୍କା ଜବତ ହୋଇଛି। ପୋଲିସ ଭ୍ୟାନ୍, ଗଞ୍ଜେଇ ଓ ଟଙ୍କା ଜବତ କରିଛି। ସୋନପୁର ଏସ୍ଡିପିଓ ପ୍ରତାପ ଚନ୍ଦ୍ର ତ୍ରିପାଠୀ ଥାନା ପରିସରରେ ପହଞ୍ଚତ୍ ମାମଲାର ଅନୁଧ୍ୟାନ କରିଛନ୍ତି। ତଦନ୍ତ ଜାରି ରହିଛି ଶୁକ୍ରବାର ଅଭିଯୁକ୍ତଙ୍କୁ କୋର୍ଟଚାଲାଣ କରାଯିବ। ଏସ୍ଆଇ ପ୍ରଭାତି ଦାଶଙ୍କ ଅଭିଯୋଗକ୍ରମେ ଥାନାରେ ମାମଲା ରୁଜୁ ହୋଇଛି। ଏସଆଇ ଦିପ୍ତି ରଞ୍ଜନ ଡିଗାଲ ମାମଲାର ତଦନ୍ତ କରୁଛନ୍ତି।
