ନୂଆଦିଲ୍ଲୀ,୭ା୧: ଲୋକ ସଭା ଓ ବିଧାନସଭା ନିର୍ବାଚନ ଲାଗି ପ୍ରାର୍ଥୀମାନଙ୍କ ଖର୍ଚ୍ଚ ସୀମାକୁ ବୃଦ୍ଧି କରାଯାଇଛି। ଲୋକ ସଭା ପ୍ରାର୍ଥୀଙ୍କ ଲାଗି ସର୍ବୋଚ୍ଚ ଖର୍ଚ୍ଚ ସୀମା ୭୦ ଲକ୍ଷ ଟଙ୍କା ଥିବାବେଳେ ଏହା ୯୫ ଲକ୍ଷକୁ ବୃଦ୍ଧି ହୋଇଛି। ସେହିପରି ବିଧାନସଭା ପ୍ରାର୍ଥୀଙ୍କ ସର୍ବୋଚ୍ଚ ଖର୍ଚ୍ଚସୀମା ୨୮ ଲକ୍ଷରୁ ୪୦ ଲକ୍ଷ ଟଙ୍କାକୁ ବଢ଼ାଇ ଦିଆଯାଇଛି। ନିର୍ବାଚନ କମିଶନ (ଇସି)ଙ୍କ ସୁପାରିସ ଆଧାରରେ ଆଇନ ମନ୍ତ୍ରଣାଳୟ ଉପରୋକ୍ତ ନିଷ୍ପତ୍ତି ନେଇଛି। ଖର୍ଚ୍ଚ ମୁଦ୍ରାସ୍ଫୀତି ସୂଚକାଙ୍କ ବଢ଼ିବା ସହ ନିର୍ବାଚନ ମଣ୍ଡଳୀର ଭୋଟର ସଂଖ୍ୟାରେ ବୃଦ୍ଧି ଘଟିଛି। ଏହାକୁ ଦୃଷ୍ଟିରେ ରଖି ପ୍ରାର୍ଥୀଙ୍କ ନିର୍ବାଚନୀ ଖର୍ଚ୍ଚ ସୀମା ବଢ଼ାଇବାକୁ ନିଷ୍ପତ୍ତି ନିଆଯାଇଛି। ଉତ୍ତରପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ଗୋଆ ଏବଂ ମଣିପୁରରେ ହେବାକୁ ଥିବା ବିଧାନସଭା ନିର୍ବାଚନରେ ସଂଶୋଧିତ ଖର୍ଚ୍ଚ ସୀମା ଲାଗୁ ହେବ। ୨୦୧୪ରେ ହୋଇଥିବା ସଂଶୋଧନ ଅନୁଯାୟୀ ବଡ଼ ରାଜ୍ୟଗୁଡ଼ିକରେ ଲୋକ ସଭା ପ୍ରାର୍ଥୀଙ୍କ ଖର୍ଚ୍ଚସୀମା ୭୦ ଲକ୍ଷ ଟଙ୍କା ଧାର୍ଯ୍ୟ କରାଯାଇଥିଲା। କୋଭିଡ୍ ସମୟରେ ଏହାକୁ ଅସ୍ଥାୟୀ ଭାବେ ୭୭ ଲକ୍ଷ ଟଙ୍କାକୁ ଦୃଦ୍ଧି କରାଯାଇଥିବାବେଳେ ବର୍ତ୍ତମାନ ୯୫ ଲକ୍ଷ ଟଙ୍କା ହୋଇଛି। ସେହିପରି ଛୋଟ ରାଜ୍ୟଗୁଡ଼ିକ ପାଇଁ ପ୍ରାର୍ଥୀଙ୍କ ଖର୍ଚ୍ଚସୀମା ୫୪ ଲକ୍ଷ ଟଙ୍କା ଥିଲା, ଯାହାକୁ ୭୫ ଲକ୍ଷ ଟଙ୍କାକୁ ବଢ଼ାଯାଇଛି। ସେହିପରି ବଡ଼ ରାଜ୍ୟରେ ବିଧାନସଭା ପ୍ରାର୍ଥୀଙ୍କ ଖର୍ଚ୍ଚସୀମା ୨୮ ଲକ୍ଷରୁ ୪୦ ଲକ୍ଷକୁ ବଢ଼ିଥିବାବେଳେ ଛୋଟ ରାଜ୍ୟରେ ଏହାକୁ ୨୦ ଲକ୍ଷରୁ ୨୮ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି।
୨୦୧୪ରୁ ଇତିମଧ୍ୟରେ ଦରଦାମ୍ ଯଥେଷ୍ଟ ବଢ଼ିଛି। ଏହାକୁ ଦୃଷ୍ଟିରେ ରଖି ପ୍ରାର୍ଥୀଙ୍କ ନିର୍ବାଚନୀ ଖର୍ଚ୍ଚର ସର୍ବୋଚ୍ଚ ସୀମାର ସମୀକ୍ଷା କରିବା ଲାଗି ଇସି ଏକ କମିଟି ଗଠନ କରିଥିଲେ। ବଜାର ଦର ଓ ଭୋଟର ସଂଖ୍ୟା ବୃଦ୍ଧିକୁ ନଜରରେ ରଖି ପ୍ରାର୍ଥୀଙ୍କ ଖର୍ଚ୍ଚ ସୀମା ୧୨ରୁ ୪୨ ପ୍ରତିଶତ ପର୍ଯ୍ୟନ୍ତ ବଢ଼ାଇବା ଲାଗି କମିଟି ସୁପାରିସ କରିଥିଲା। ସୂଚନାଯୋଗ୍ୟ, ୨୦୧୪ରେ ଭୋଟର ସଂଖ୍ୟା ୮୩.୪ କୋଟି ଥିବାବେଳେ ୨୦୨୧ରେ ତାହା ୯୩.୬ କୋଟିକୁ ବୃଦ୍ଧି ପାଇଛି। ସେହିପରି ୭ ବର୍ଷ ମଧ୍ୟରେ ଖର୍ଚ୍ଚ ମୁଦ୍ରାସ୍ଫୀତି ସୂଚକାଙ୍କ ୨୪୦ରୁ ବଢ଼ି ୩୧୭ରେ ପହଞ୍ଚତ୍ଛି।
