ଭୁବନେଶ୍ୱର, ୨୬ା୨(ବ୍ୟୁରୋ): ରାଜ୍ୟ ନିର୍ବାଚନ କମିଶନଙ୍କ ଘୋଷଣା ଅନୁଯାୟୀ ଭୁବନେଶ୍ୱର ମହାନଗର ନିଗମ (ବିଏମ୍ସି) ନିର୍ବାଚନ ଆସନ୍ତା ୨୪ ତାରିଖରେ ଅନୁଷ୍ଠିତ ହେବ। ପଞ୍ଚାୟତ ଭୋଟ ଗଣତିର ଦିନକ ପୂର୍ବରୁ ଏହି ତାରିଖ ଘୋଷଣା ଅନେକ ନେତାଙ୍କ ପାଇଁ ଚିନ୍ତାର କାରଣ ପାଲଟିଯାଇଛି। ପଞ୍ଚାୟତ ନିର୍ବାଚନ ଲାଗି ଭୁବନେଶ୍ୱରର ବହୁ ନେତା ଗାଁରେ ସମୟ ବିତାଇ ଫେରୁଫେରୁ ଏଭଳି ଘୋଷଣା ସେମାନଙ୍କ ଅକଲ ଗୁଡୁମ କରିଦେଇଛି। କାରଣ ପୌର ନିର୍ବାଚନ ଏପ୍ରିଲରେ ହେବ ବୋଲି ନେତାମାନେ ଭାବିନେଇଥିଲେ। ହଠାତ୍ ପୌର ନିର୍ବାଚନ ଘୋଷଣା ହୋଇଥିବାରୁ ଏବେ ସମୟ ଅଭାବ ଚିନ୍ତା ସେମାନଙ୍କୁ ଘାରିଛି।
ସେହିପରି ରାଜନୈତିକ ଦଳଗୁଡ଼ିକ ପ୍ରାର୍ଥୀ ଖୋଜା ଆରମ୍ଭ କରିଦେଇଛନ୍ତି। ମେୟର ପଦବୀ ଲାଗି ରାଜ୍ୟର ୩ ପ୍ରମୁଖ ଦଳ ବିଜେଡି, ଭାଜପା ଏବଂ କଂଗ୍ରେସ ପାଇଁ ଚ୍ୟାଲେଞ୍ଜ ହେବ। ଏଥର ମେୟର ପଦବୀ ମହିଳାଙ୍କ ପାଇଁ ସଂରକ୍ଷିତ ରହିଛି। ସେହିପରି ଭୋଟରମାନେ ସିଧାସଳଖ ମେୟରଙ୍କୁ ନିର୍ବାଚିତ କରିବେ। ତେଣୁ ସବୁ ଦଳ ପାଇଁ ମହିଳା ପ୍ରାର୍ଥୀ ଚୟନ ବେଶ୍ ଗୁରୁତ୍ୱପୂର୍ଣ୍ଣ ରହିବ ବୋଲି ରାଜନୈତିକ ମହଲରେ କୁହାଯାଉଛି।
ବିଜେଡି ପକ୍ଷରୁ ଶନିବାର ସୁଦ୍ଧା ପ୍ରତ୍ୟେକ ବିଧାୟକ ନିଜ ନିର୍ବାଚନମଣ୍ଡଳୀ ଅନ୍ତର୍ଗତ ପ୍ରତ୍ୟେକ ଓ୍ବାର୍ଡ ଲାଗି ୩ ଜଣ ନେତାଙ୍କ ନାମ ପ୍ରଦାନ କରିବେ। ୨ ତାରିଖ ମଧ୍ୟରେ ଦଳ ସବୁ ଓ୍ବାର୍ଡ ପାଇଁ ଆସିଥିବା ୩ ଜଣିଆ ଆଶାୟୀ ତାଲିକାକୁ ତୃଣମୂଳସ୍ତରରୁ ଯାଞ୍ଚ କରିବା ପରେ ଜଣଙ୍କୁ ପ୍ରାର୍ଥୀ କରିବ। ବିଧାୟକମାନଙ୍କୁ କେବଳ ଓ୍ବାର୍ଡ ପିଛା ୩ ଜଣଙ୍କ ନାମ ପ୍ରସ୍ତାବ ଦେବାକୁ କୁହାଯାଇଛି। କମ୍ ସମୟ ମଧ୍ୟରେ ଏଭଳି ଦାୟିତ୍ୱ ମିଳିବାପରେ ବିଧାୟକମାନେ ମଧ୍ୟ କାହା ନଁା ଦେବେ, କେମିତି ଆଶାୟୀଙ୍କୁ ବାଛିବେ ସେନେଇ ଚିନ୍ତାରେ ପଡ଼ିଯାଇଛନ୍ତି। ଅନ୍ୟପଟେ ଦଳର ଆଶାୟୀଙ୍କ ସଂଖ୍ୟା ବେଶ୍ ଅଧିକ ଏବଂ ନିର୍ବାଚନ ପାଇଁ ସମୟ କମ୍ କାରଣରୁ କିପରି ଅସନ୍ତୁଷ୍ଟଙ୍କୁ ମନାଇବେ ତାହା ବିଧାୟକମାନଙ୍କ ଲାଗି ଚ୍ୟାଲେଞ୍ଜ ହେବ। ଯଦି ପ୍ରାର୍ଥୀ ଚୟନ ପରେ ଅସନ୍ତୁଷ୍ଟମାନଙ୍କୁ ବୁଝାଇବାରେ ବିଧାୟକମାନେ ଫେଲ୍ ହୁଅନ୍ତି ତେବେ ତାହା ସେମାନଙ୍କ ଟ୍ରାକ୍ ରେକର୍ଡକୁ ଖରାପ କରିପାରେ ବୋଲି ସେମାନେ ଆଶଙ୍କା କରିଛନ୍ତି। ଅନ୍ୟପକ୍ଷରେ କାଳେ ତୁରନ୍ତ ପ୍ରାର୍ଥୀଙ୍କ ନଁା ଘୋଷଣା କରିଦେଲେ ଅସନ୍ତୁଷ୍ଟମାନେ ଭାଜପାରେ ମିଶି ଟିକେଟ ନେଇଯିବେ ସେଥିଲାଗି ବିଜେଡି ଶେଷ ମୁହୂର୍ତ୍ତରେ ପ୍ରାର୍ଥୀଙ୍କ ନାମ ଘୋଷଣା କରିବାକୁ ଯୋଜନା କରିଥିବା ଜଣାପଡ଼ିଛି। ସେହିପରି ଶାସକ ଦଳର ଆଶାୟୀମାନେ ଭାଜପା ସହ ଯୋଗାଯୋଗରେ ରହିଛନ୍ତି। ବିଜେଡି ଟିକେଟ୍ କଟିଲେ ଭାଜପାରୁ ପ୍ରାର୍ଥୀ ହେବାକୁ ସେମାନେ ଲକ୍ଷ୍ୟ ରଖିଛନ୍ତି।
ବିଜେଡିର ଶୀର୍ଷ ନେତୃତ୍ୱ କିନ୍ତୁ ମେୟର ପ୍ରାର୍ଥୀଙ୍କୁ ବାଛିବାର ଦାୟିତ୍ୱ ନିଜ ହାତରେ ରଖିଛନ୍ତି। ଅନ୍ୟପଟେ ଭାଜପା ମଧ୍ୟ ନିର୍ବାଚନ ବିଗୁଲ ବାଜିବାପରେ ପ୍ରାର୍ଥୀ ଚୟନ ପ୍ରକ୍ରିୟା ଆରମ୍ଭ କରିଦେଇଛି। ଭାଜପା ଭୁବନେଶ୍ୱର ଜିଲା ସଭାପତି ବାବୁ ସିଂ ଏବଂ ଏମ୍ପି ଅପରାଜିତା ଷଡଙ୍ଗୀଙ୍କୁ ସବୁ ଓ୍ବାର୍ଡର ପ୍ରାର୍ଥୀ ଚୟନ ଦାୟିତ୍ୱ ଦିଆଯାଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ଶୁକ୍ରବାର ଏନେଇ ଦଳୀୟ କାର୍ଯ୍ୟାଳୟଠାରେ ମଧ୍ୟ ପ୍ରାଥମିକ ସ୍ତରରେ ଏକ ବୈଠକ ଅପରାଜିତାଙ୍କ ଅଧ୍ୟକ୍ଷତାରେ ବସିସାରିଛି। ଏଥିରେ ମହାନଗର ଭିତରେ ଆସୁଥିବା ବିଧାନସଭା କ୍ଷେତ୍ର ପାଇଁ ଗତ ସାଧାରଣ ନିର୍ବାଚନରେ ପ୍ରାର୍ଥୀ ହୋଇଥିବା ସମସ୍ତଙ୍କୁ ସାମିଲ କରାଯାଇଥିଲା ବୋଲି ଜଣାପଡିଛି। ଗତ ସାଧାରଣ ନିର୍ବାଚନରେ ସହରାଞ୍ଚଳ ଭୋଟ୍ ଭାଜପା ସପକ୍ଷରେ ଭଲ ରହିଥିବାରୁ ଗତଥର ତୁଳନାରେ ଅଧିକ କର୍ପୋରେଟରଙ୍କୁ ଜିତାଇବାକୁ ଦଳ ପ୍ରାଣପଣେ ଉଦ୍ୟମ କରିବ।
କଂଗ୍ରେସ ପକ୍ଷରୁ ମଧ୍ୟ ପ୍ରାଥମିକସ୍ତରରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ଜିଲା କମିଟିର ବହୁ ନେତା ଉପସ୍ଥିତ ରହି ଓ୍ବାର୍ଡସ୍ତରରେ କେଉଁମାନଙ୍କୁ ପ୍ରାର୍ଥୀ କରାଯିବ ସେନେଇ ଆଲୋଚନା କରାଯାଇଛି। କଂଗ୍ରେସ ରାଜ୍ୟରେ ଖରାପ ସ୍ଥିତିରେ ଥିବାବେଳେ ମହାନଗରରେ କିପରି ନିଜ ସମ୍ମାନ ରକ୍ଷା କରିବ ତାହା ଉପରେ ଗୁରୁତ୍ୱ ଦେଇଛି। କଂଗ୍ରେସରୁ ପ୍ରାର୍ଥୀ ହେବାକୁ ବିଶେଷ କେହି ଆଗ୍ରହ ପ୍ରକାଶ କରୁ ନ ଥିବା ନେଇ ମଧ୍ୟ ଦଳରେ ଆଲୋଚନା ଜୋର୍ ଧରିଛି। ତେଣୁ ଭଲ ଏବଂ ବିଜୟ ସମ୍ଭାବନା ରହିଥିବା ଲୋକଙ୍କୁ ପ୍ରାର୍ଥୀ କରିବା ଦିଗରେ ଦଳ ଖୁବ୍ଶୀଘ୍ର ଏକ କମିଟି କରି ଦାୟିତ୍ୱ ବାଣ୍ଟିବ ବୋଲି ଜଣେ ବରିଷ୍ଠ ନେତା ସୂଚନା ଦେଇଛନ୍ତି।
