ଥୁଆମୂଳ ରାମପୁର, ୧୦।୧୦ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲାର ଥୁଆମୂଳ ରାମପୁର ସରକାରୀ ସ୍ନାତକ ମହାବିଦ୍ୟାଳୟରେ ୨୦୨୬-୨୭ ଶିକ୍ଷାବର୍ଷ ପାଇଁ ଛାତ୍ର ସଂସଦ ଓ ବିଭିନ୍ନ ସଂସଦର ଚୟନ ପ୍ରକ୍ରିୟା ଆରମ୍ଭ ହୋଇଛି। ଏନେଇ ମହାବିଦ୍ୟାଳୟ ପକ୍ଷରୁ ବିଜ୍ଞପ୍ତି ନଂ. ୩୭୩, ତାରିଖ ୦୯.୧୦.୨୦୨୬ ଅନୁଯାୟୀ ପ୍ରାରମ୍ଭିକ ପ୍ରାର୍ଥୀ ତାଲିକା ପ୍ରକାଶ ପାଇଛି। ମହାବିଦ୍ୟାଳୟରେ ପ୍ରଥମ ଥର ପାଇଁ ଛାତ୍ର ସଂସଦ ଗଠନ ପ୍ରକ୍ରିୟା ଚାଲିଥିବାରୁ ଛାତ୍ରୀଛାତ୍ରଙ୍କ ମଧ୍ୟରେ ଉତ୍ସାହ ଦେଖାଦେଇଛି। ତେବେ ପ୍ରତ୍ୟକ୍ଷ ନିର୍ବାଚନ ବଦଳରେ ଚୟନ ପ୍ରକ୍ରିୟାକୁ ନେଇ କିଛି ଛାତ୍ରୀଛାତ୍ର ଅସନ୍ତୋଷ ପ୍ରକାଶ କରିଛନ୍ତି।
ମହାବିଦ୍ୟାଳୟ ପକ୍ଷରୁ ପ୍ରକାଶିତ ତାଲିକା ଅନୁଯାୟୀ, ସଭାପତି ପଦବୀ ପାଇଁ ବସନ୍ତ ମାଝୀ, ଲୋକେଶ୍ୱର ନାଏକ, ଯଦୁମଣି ନାଏକ, ଗିରିଜା ବାଗ ଓ ଯଶକେତନ ନାଏକ ନାମାଙ୍କନ ଦାଖଲ କରିଛନ୍ତି। ସେହିପରି ସହ-ସଭାପତି ପଦବୀ ପାଇଁ ନୁରୀତା ବାଗ, ପ୍ରିୟତମା ନାଏକ ଓ ରିଙ୍କି ନାଏକ ଆବେଦନ କରିଛନ୍ତି। ସାଧାରଣ ସମ୍ପାଦକ ପଦବୀ ପାଇଁ ମାଧବୀ ମାଝୀ, ପ୍ରମୋଦ କୁମାର ମାଝୀ ଓ ଭାଗ୍ୟବତୀ ନାଏକ ପ୍ରାର୍ଥୀ ହୋଇଥିବା ବେଳେ ନାଟକ ସଂସଦ ସମ୍ପାଦକ ପଦବୀ ପାଇଁ ଲିପ୍ସାରାଣୀ ନାଏକ ଓ ରଞ୍ଜିତା ନାଏକ ନାମାଙ୍କନ ଭରିଛନ୍ତି। କ୍ରୀଡ଼ା ସଂସଦ ସମ୍ପାଦକ ପଦବୀ ପାଇଁ ଡିମ୍ପଲ ନାଏକ ଓ ଦୀପକ ନାଏକ ଆବେଦନ କରିଛନ୍ତି।
ମହାବିଦ୍ୟାଳୟ ପକ୍ଷରୁ ଜାରି ସୂଚୀ ଅନୁଯାୟୀ, ଶନିବାର ସକାଳ ୧୦ଟାରୁ ଅପରାହ୍ଣ ୧ଟା ପର୍ଯ୍ୟନ୍ତ ପ୍ରାର୍ଥୀପତ୍ର ପ୍ରତ୍ୟାହାର କରାଯିବ। ଅପରାହ୍ଣ ୩ଟାରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ। ଆସନ୍ତା ୧୫ରେ ଛାତ୍ରୀଛାତ୍ର, କର୍ମଚାରୀ ଓ ଅଧ୍ୟାପକଙ୍କ ଉପସ୍ଥିତିରେ ଚୟନ ପ୍ରକ୍ରିୟା ହେବା ସହ ସେହିଦିନ ଫଳାଫଳ ଘୋଷଣା କରାଯିବ। ୧୬ ତାରିଖରେ ନବନିର୍ବାଚିତ ଛାତ୍ର ପ୍ରତିନିଧିଙ୍କ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ ବୋଲି ଅଧ୍ୟକ୍ଷ ସୂଚନା ଦେଇଛନ୍ତି।
ଛାତ୍ର ସଂସଦ ଚୟନ ପ୍ରକ୍ରିୟାରେ ରାଜନୈତିକ ହସ୍ତକ୍ଷେପକୁ ନେଇ ମହାବିଦ୍ୟାଳୟର ଭାରପ୍ରାପ୍ତ ଅଧ୍ୟକ୍ଷ ସର୍ବେଶ୍ୱର ଉଠାନ ସିଂହ ସ୍ପଷ୍ଟୋକ୍ତି ରଖିଛନ୍ତି। ଉଚ୍ଚଶିକ୍ଷା ବିଭାଗର ନିର୍ଦ୍ଦେଶାବଳୀ ଓ ଲିଙ୍ଗଡୋ କମିଟିର ମାର୍ଗଦର୍ଶିକା ଅନୁଯାୟୀ ଚୟନ ପ୍ରକ୍ରିୟାରେ ରାଜନୈତିକ ଦଳର ହସ୍ତକ୍ଷେପ ଓ ଦଳୀୟ ରାଜନୀତିକୁ ଅନୁମତି ଦିଆଯିବ ନାହିଁ ବୋଲି ସେ କହିଛନ୍ତି। ଏନେଇ ପୁଲିସ ପ୍ରଶାସନ, ଏସ୍ପି ଓ ଜିଲ୍ଲାପାଳଙ୍କ ସ୍ତରରେ ମଧ୍ୟ ଅନଲାଇନ ମନିଟରିଂ କରାଯାଉଥିବା ସେ ସୂଚନା ଦେଇଛନ୍ତି।
ଛାତ୍ର ସଂସଦ ଚୟନକୁ ନେଇ ଉତ୍ସାହ ଥିବାବେଳେ ମହାବିଦ୍ୟାଳୟର ମୌଳିକ ସମସ୍ୟାକୁ ନେଇ ଛାତ୍ରୀଛାତ୍ରଙ୍କ ମଧ୍ୟରେ ଅସନ୍ତୋଷ ରହିଛି। ପ୍ରାୟ ୨୮୦ରୁ ୩୦୦ ଛାତ୍ରୀଛାତ୍ର ଅଧ୍ୟୟନ କରୁଥିବା ଏହି ମହାବିଦ୍ୟାଳୟର ନିଜସ୍ବ ସ୍ଥାୟୀ କୋଠା କିମ୍ବା କ୍ୟାମ୍ପସ ନ ଥିବା ଅଭିଯୋଗ ହୋଇଛି। ଗୋଟିଏ ଶ୍ରେଣୀଗୃହରେ ତିନୋଟି ବିଭାଗର ପାଠପଢ଼ା ଚାଲୁଥିବା ବେଳେ ଛାତ୍ରୀଙ୍କ ପାଇଁ ଶୌଚାଳୟ ଓ ବିଶୁଦ୍ଧ ପାନୀୟ ଜଳର ସୁବିଧା ନଥିବା ନେଇ ଅସନ୍ତୋଷ ପ୍ରକାଶ ପାଇଛି। ଏହାଦ୍ୱାରା ଛାତ୍ରୀମାନେ ବିଶେଷ ଅସୁବିଧାର ସମ୍ମୁଖୀନ ହେଉଥିବା କୁହାଯାଉଛି।
ଛାତ୍ର ପ୍ରତିନିଧି ଚୟନ ପରେ ଏହି ସମସ୍ୟାଗୁଡ଼ିକର ସମାଧାନ ପାଇଁ ସରକାର ଓ ପ୍ରଶାସନ ନିକଟରେ ଦାବି ଉପସ୍ଥାପନ କରିବାକୁ ଆଶା ରଖାଯାଇଛି। ସଭାପତି ପ୍ରାର୍ଥୀ ଗିରିଜା ବାଗ ଓ ଲୋକେଶ୍ୱର ନାଏକ, ସାଧାରଣ ସମ୍ପାଦକ ପ୍ରାର୍ଥୀ ମାଧବୀ ମାଝୀଙ୍କ ସମେତ କିଛି ଛାତ୍ରଛାତ୍ରୀ ଶୌଚାଳୟ, ସ୍ଥାୟୀ ଶ୍ରେଣୀଗୃହ ଓ କ୍ୟାମ୍ପସ ନିର୍ମାଣକୁ ପ୍ରାଥମିକତା ଦେଇଛନ୍ତି। ଛାତ୍ର ସଂସଦ ଗଠନ ମାଧ୍ୟମରେ ମହାବିଦ୍ୟାଳୟର ଦୀର୍ଘଦିନର ମୌଳିକ ସମସ୍ୟାର ସମାଧାନ ହୋଇପାରିବ କି ନାହିଁ, ତାହା ଏବେ ଦେଖିବାକୁ ବାକି ରହିଲା।