ନୂଆଦିଲ୍ଲୀ,୩।୯: ଏଣିକି ଏଟିଏମରୁ ଟଙ୍କା କାଢିବା ହେଲା ମହଙ୍ଗା। ଯଦି ଆପଣ କାନାରା ବ୍ୟାଙ୍କର ଏଟିଏମ (ATM) କାର୍ଡ ବ୍ୟବହାର କରୁଛନ୍ତି, ତେବେ ଏବେ ଟଙ୍କା ଉଠାଇବା ପୂର୍ୱରୁ ନୂଆ ଚାର୍ଜ ବିଷୟରେ ଜାଣିନେବା ଆପଣଙ୍କ ପାଇଁ ଲାଭଦାୟକ ହେବ। ୧ ସେପ୍ଟେମ୍ୱର ୨୦୨୬ ରୁ ବ୍ୟାଙ୍କ ATM କାରବାରର କିଛି ନିୟମରେ ପରିବର୍ତ୍ତନ କରିଛି। ସେଭିଙ୍ଗ୍ସ ଆକାଉଣ୍ଟଧାରୀଙ୍କ ମାଗଣା କାରବାର (Free Transaction) ସୀମା କମିଯାଇଛି, ଅନ୍ୟପକ୍ଷରେ ସୀମା ଶେଷ ହେବା ପରେ ନଗଦ ଉଠାଣ ଏବଂ ଆକାଉଣ୍ଟରେ ପର୍ଯ୍ୟାପ୍ତ ଟଙ୍କା ନ ଥିବାରୁ ଟ୍ରାଞ୍ଜାକସନ Fail ହେବା ପୂର୍ୱ ଅପେକ୍ଷା ମହଙ୍ଗା ହୋଇଯାଇଛି।
କାନାରା ବ୍ୟାଙ୍କର ସେଭିଙ୍ଗ୍ସ ଆକାଉଣ୍ଟ ଗ୍ରାହକମାନଙ୍କୁ ଏବେ ଗୋଟିଏ ମାସରେ ମୋଟ ୫ଟି ମାଗଣା ATM କାରବାର ସୁବିଧା ମିଳିବ। ପୂର୍ୱରୁ ଏହି ସୀମା ୬ଟି ଟ୍ରାଞ୍ଜାକସନ ଥିଲା। ଏଥିରେ ଆର୍ଥିକ (Financial) ଏବଂ ଅଣ-ଆର୍ଥିକ (Non-Financial) ଉଭୟ ପ୍ରକାରର କାରବାର ଅନ୍ତର୍ଭୁକ୍ତ। ତେବେ ବରିଷ୍ଠ ନାଗରିକଙ୍କ ପାଇଁ ଥିବା ୮ଟି ମାଗଣା କାରବାର ସୀମାରେ କୌଣସି ପରିବର୍ତ୍ତନ କରାଯାଇ ନାହିଁ।
ମାଗଣା କାରବାରର ସୀମା ଶେଷ ହେବା ପରେ କାନାରା ବ୍ୟାଙ୍କର ATM ଏବଂ କ୍ୟାସ ରିସାଇକ୍ଲର୍ (Cash Recycler) ମାଧ୍ୟମରେ କରାଯାଇଥିବା କାରବାର ଉପରେ ସର୍ଭିସ ଚାର୍ଜ ଲାଗିବ। କିନ୍ତୁ ନଗଦ ଟଙ୍କା ଜମା କରିବା (Cash Deposit) କାରବାର ଉପରେ ଏହି ଚାର୍ଜ ଲାଗୁ ହେବ ନାହିଁ। ବ୍ୟାଙ୍କ ଏହା ମଧ୍ୟ କହିଛି ଯେ ଏହି ସର୍ଭିସ ଚାର୍ଜରେ ସମୟ ସମୟରେ ପରିବର୍ତ୍ତନ କରାଯାଇପାରେ।
ମାଗଣା ସୀମାଠାରୁ ଅଧିକ ନଗଦ ଟଙ୍କା ଉଠାଇବା ପାଇଁ ଏବେ ଗ୍ରାହକମାନଙ୍କୁ ପୂର୍ୱ ଅପେକ୍ଷା ଅଧିକ ଟଙ୍କା ଦେବାକୁ ପଡ଼ିବ। କାନାରା ବ୍ୟାଙ୍କର ATM ରୁ ନଗଦ ଟଙ୍କା ଉଠାଣ ଚାର୍ଜ ୨୦ ଟଙ୍କାରୁ ବୃଦ୍ଧି ପାଇ ଏବେ ୨୩ ଟଙ୍କା ହୋଇଛି। ଏହା ବ୍ୟତୀତ ଏଥିରେ GST ମଧ୍ୟ ଯୋଡ଼ାଯିବ। ଏଥିରେ UPI ମାଧ୍ୟମରେ ATM ରୁ ନଗଦ ଉଠାଣ ମଧ୍ୟ ସାମିଲ ରହିଛି।
ଯଦି ଆକାଉଣ୍ଟରେ ପର୍ଯ୍ୟାପ୍ତ ଟଙ୍କା ନ ଥିବା କାରଣରୁ ATM ରୁ କରାଯାଇଥିବା କାରବାର ସଫଳ ନ ହୁଏ, ତେବେ ଏଥିପାଇଁ ମଧ୍ୟ ଏବେ ଅଧିକ ଟଙ୍କା ଦେବାକୁ ପଡ଼ିବ। ଫ୍ରି ଟ୍ରାଞ୍ଜାକସନ ସୀମା ଶେଷ ହେବା ପରେ ଏପରି ବିଫଳ କାରବାର ଉପରେ ଲାଗୁଥିବା ଚାର୍ଜ ୧୭ ଟଙ୍କାରୁ ବଢ଼ାଇ ୨୩ ଟଙ୍କା କରାଯାଇଛି। ଏହା ଉପରେ GST ଅଲଗା ଭାବେ ଲାଗିବ। ଏହି ଚାର୍ଜ କାନାରା ବ୍ୟାଙ୍କ ସହିତ ଅନ୍ୟ ବ୍ୟାଙ୍କଗୁଡ଼ିକର ATM ରେ ହୋଇଥିବା ଏପରି କାରବାର ଉପରେ ମଧ୍ୟ ଲାଗୁ ହେବ।
ଅନ୍ୟପକ୍ଷରେ, ବ୍ୟାଙ୍କ ପୁନର୍ୱାର ଗ୍ରୀନ ପିନ (Green PIN) ପ୍ରସ୍ତୁତ କରିବାର ଚାର୍ଜ କମାଇ ଦେଇଛି। ମାଗଣା କାରବାର ସୀମା ପରେ ଗ୍ରୀନ ପିନ ପୁନର୍ୱାର ତିଆରି କରିବା ଚାର୍ଜ ୨୩ ଟଙ୍କାରୁ ହ୍ରାସ ପାଇ ଏବେ ୫ ଟଙ୍କା ହୋଇଛି। ଏହା କ୍ଲାସିକ, ଷ୍ଟାଣ୍ଡାର୍ଡ, ପ୍ଲାଟିନମ, ବିଜନେସ, ସିଲେକ୍ଟ ଏବଂ ୱାଲର୍ଡ କାର୍ଡ ଭଳି କାର୍ଡ ଭାରିଆଣ୍ଟଗୁଡ଼ିକ ଉପରେ ଲାଗୁ ହେବ।