ଭଞ୍ଜନଗର,୨।୭(ବାବୁଲା ପ୍ରଧାନ)-ସର୍ବସାଧାରଣଙ୍କ ସୁବିଧା ପାଇଁ ସରକାରଙ୍କ ପକ୍ଷରୁ ଅନେକ ଯୋଜନା ପ୍ରଣୟନ କରାଯାଉଛି। କିନ୍ତୁ କିଛି ନ୍ୟସ୍ତ ସ୍ବାର୍ଥ ଥିବା ବ୍ୟକ୍ତିଙ୍କ ପାଇଁ ସାଧାରଣଜନତା ତାହାର କୁପରିଣାମ ଭୋଗୁଛନ୍ତି। ଏଭଳି ଏକ ଘଟଣାକ୍ରମରେ ଭଞ୍ଜନଗର ସହର ଏବଂ ସହରତଳି ଗ୍ରାମ ଗୁଡିକରେ ଜଳସେଚନ ସୁବିଧା ପାଇଁ କେନାଲ ନିର୍ମାଣ ହୋଇଛି। କିନ୍ତୁ ଇତିମଧ୍ୟରେ କେନାଲ ଆଡ଼ିବନ୍ଧକୁ କିଛି ଲୋକେ ଜବରଦଖଲ କରିନେଲେଣି। ଫଳରେ ଏବେ ଅନେକ ସମସ୍ୟା ଦେଖାଦେଇଛି। କେଉଁଠି କେନାଲ ଆଡ଼ିବନ୍ଧ ସଫେଇରେ ସମସ୍ୟା ହେଉଛି ତ ଆଉ କେଉଁଠି ଯାତାୟତରେ ଅସୁବିଧା ହେଉଛି। ଲୋକେ ବର୍ଷ ବର୍ଷ ଧରି ଜବରଦଖଲ କରି ରଖିଛନ୍ତି। ଯେତେବେଳେ ସେମାନଙ୍କୁ ଉଚ୍ଛେଦ ପାଇଁ ଆବଶ୍ୟକ ପଡୁଛି ସେତେବେଳେ ଆଇନଗତ ସମସ୍ୟା ଦେଖାଦେଉଛି।
ଭଞ୍ଜନଗର ସହରର ଅଧିକାଂଶ କେନାଲ ଆଡ଼ି ଜବରଦଖଲ ହୋଇଛି। କେଉଁଠି ସରକାରୀ କାର୍ଯ୍ୟାଳୟ ଜବରଦଖଲ କରିଛି ତ ଆଉ କେଉଁଠି କିଛି ଲୋକ ଜବରଦଖଲ କରିଛନ୍ତି। ତେଣୁ ଉକ୍ତ କେନାଲ ଗୁଡ଼ିକରେ ପାଣି ଆଉ ଠିକ ଭାବେ ଚାଷ କାର୍ଯ୍ୟପାଇଁ ଯାଉନାହିଁ। ସହରର ମଇଳା ପାଣି ବର୍ତ୍ତମାନ କେନାଲ ରେ ଯାଉଛି। ବର୍ଷା ଦିନେ ବର୍ଷା ପାଣି କେନାଲ ରେ ଠିକ ଭାବେ ନିଷ୍କାସନ ହୋଇନପାରି ରାସ୍ତାଘାଟ ଏଣେତେଣେ ଭାସୁଛି। ଏନେଇ କୌଣସି ବିଭାଗ ଆବଶ୍ୟକ ପଦକ୍ଷେପ ନେଉନାହିଁ। ଯାହାକୁ ନେଇ ସାଧାରଣରେ ଅସନ୍ତୋଷ ବୃଦ୍ଧିପାଉଛି । ଅନ୍ୟପଟେ ଏହି ବ୍ଲକ ଅନ୍ତର୍ଗତ ଭାଲିଆଖାଇ ଗ୍ରାମରେ ମଧ୍ୟ କେନାଲ ଆଡିକୁ କିଛି ଲୋକ ଜବରଦଖଲ କରିଥିବା ନେଇ ଗତ ସପ୍ତାହରେ ଭଞ୍ଜନଗର ତହସିଲଦାରଙ୍କ ନିକଟରେ ଗ୍ରାମବାସୀଅଭିଯୋଗ କରିଥିଲେ। ଏହାପରେ ତହସିଲଦାରଙ୍କ ନିର୍ଦ୍ଦେଶ କ୍ରମେ ଆର୍ଆଇ ଘଟଣାର ତଦନ୍ତ କରି ତହସିଲଦାରଙ୍କୁ ରିପୋର୍ଟ ପ୍ରଦାନ କରିଛନ୍ତି। କିନ୍ତୁ ଆଗକୁ କଣ ପଦକ୍ଷେପ ନେଉଛି ରାଜସ୍ବ ବିଭାଗ ତାହାକୁ ନେଇ ଗ୍ରାମବାସୀ ଅପେକ୍ଷାରେ ଅଛନ୍ତି। ଦିନକୁ ଦିନ ଭଞ୍ଜନଗର ଅଞ୍ଚଳରେ ଜବରଦଖଲ ସମସ୍ୟା ବଢୁଛି। ତାହାର କୁପରିଣାମ ସାଧାରଣ ଜନତା ଭୋଗୁଛନ୍ତି। ତେଣୁ ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବା ପାଇଁ ସାଧାରଣରେ ଦାବି ହୋଇଛି।
