ନୂଆଦିଲ୍ଲୀ,୬ା୬: ବିଖ୍ୟାତ ବ୍ୟବସାୟୀ ତଥା କିଙ୍ଗଫିସର ଏୟାରଲାଇନ୍ସର ପୂର୍ବତନ ମାଲିକ ବିଜୟ ମାଲ୍ୟା ଏକ ସାକ୍ଷାତକାରରେ ଚାଞ୍ଚଲ୍ୟକର ଦାବି କରି କହିଛନ୍ତି ଯେ, ଯଦି ତାଙ୍କୁ ଭାରତରେ ନିରପେକ୍ଷ ବିଚାର ଓ ସମ୍ମାନଜନକ ଜୀବନର ନିଶ୍ଚିତତା ମିଳେ, ତେବେ ସେ ଭାରତ ଫେରିବାକୁ ଗମ୍ଭୀରତାର ସହ ବିଚାର କରିବେ। ରାଜ ଶମାନୀଙ୍କ ପଡକାଷ୍ଟରେ ଏହି ମନ୍ତବ୍ୟ ଦେଇ ମାଲ୍ୟା ନିଜ ଉପରେ ଲାଗିଥିବା ଅନେକ ଅଭିଯୋଗକୁ ଖଣ୍ଡନ କରିଛନ୍ତି।
ମାଲ୍ୟା କହିଛନ୍ତି, “ମୁଁ ଦେଶ ଛାଡ଼ି ପଳାୟନ କରିନାହିଁ। ମୋତେ ପଳାତକ କହି ପାର, କିନ୍ତୁ ମୁଁ ଚୋର ନୁହେଁ।” ସେ ଆହୁରି ଦାବି କରିଛନ୍ତି ଯେ, କିଙ୍ଗଫିସର ଏୟାରଲାଇନ୍ସର ଋଣ ପ୍ରାୟ ୬,୨୦୩ କୋଟି ଟଙ୍କା ଥିଲା, କିନ୍ତୁ ବ୍ୟାଙ୍କଗୁଡ଼ିକ ତାଙ୍କ ଚହାଦି ଯାଇଥିବା ସମ୍ପତ୍ତିରୁ ୧୪,୧୦୦ କୋଟି ଟଙ୍କା ଜବତ କରିସାରିଛନ୍ତି। ସେ ପ୍ରଶ୍ନ ଉଠାଇ କହିଛନ୍ତି, “ଯଦି ମୁଁ ଋଣ ପରିଶୋଧ କରିବାକୁ ଚାହୁଁଥିଲି, ତେବେ ମୋତେ କାହିଁକି ଚୋର କୁହାଯାଉଛି?”
ମାଲ୍ୟା ଅଭିଯୋଗ କରିଛନ୍ତି ଯେ, ଏକ ଷଡ଼ଯନ୍ତ୍ର ଅଧୀନରେ ତାଙ୍କୁ ‘ଚୋର’ ଓ ‘ଆର୍ଥିକ ଅପରାଧୀ’ ଭାବେ ଚିତ୍ରଣ କରାଯାଇଛି। ସେ କହିଛନ୍ତି, “ଯେଉଁମାନେ ମୋତେ ଆର୍ଥିକ ଅପରାଧୀ ଓ ପଳାତକ କହୁଛନ୍ତି, ସେମାନେ ମୋ ଠାରୁ ବଡ଼ ଅପରାଧୀ।”
ବିଜୟ ମାଲ୍ୟା ୨୦୧୬ ମସିହାରେ ଭାରଓ ଛାଡ଼ି ବ୍ରିଟେନ ପଳାଇଥିବା ଅଭିଯୋଗ ରହିଛି, ଯେତେବେଳେ ତାଙ୍କ କିଙ୍ଗଫିସର ଏୟାରଲାଇନ୍ସ ବିପୁଳ ଋଣ ଯୋଗୁଁ ଦେବାଳିଆ ହୋଇଥିଲା। ଭାରତୀୟ ବ୍ୟାଙ୍କଗୁଡ଼ିକ ତାଙ୍କ ବିରୋଧରେ ୯,୦୦୦ କୋଟି ଟଙ୍କାରୁ ଅଧିକ ଋଣ ଅପଚୟ ଓ ମନି ଲଣ୍ଡରିଂ ଅଭିଯୋଗ ରହିଛି। ଏହାପରେ ମାଲ୍ୟା ଲଣ୍ଡନରେ ରହୁଛନ୍ତି ଏବଂ ଭାରତ ସରକାର ତାଙ୍କୁ ପ୍ରତ୍ୟର୍ପଣ କରିବା ପାଇଁ ବାରମ୍ବାର ଚେଷ୍ଟା କରୁଛନ୍ତି।
ମାଲ୍ୟା ଦାବି କରିଛନ୍ତି ଯେ, ସେ ଋଣ ପରିଶୋଧ କରିବାକୁ ଅନେକବାର ପ୍ରସ୍ତାବ ଦେଇଥିଲେ, କିନ୍ତୁ ସରକାର ତାଙ୍କୁ ଏହି ସୁଯୋଗ ଦେଇ ନାହାନ୍ତି। ସେ କହିଛନ୍ତି, “ମୁଁ ଋଣ ଫେରାଇବାକୁ ଚାହୁଁଥିଲି, କିନ୍ତୁ ମୋ ସମ୍ପତ୍ତିକୁ ଜବତ କରାଯାଇଛି। ମୋତେ ନିରପେକ୍ଷ ବିଚାରର ସୁଯୋଗ ଦିଆଯାଉ, ମୁଁ ଭାରତ ଫେରିବି।”
ଭାରତ ସରକାର ମାଲ୍ୟାଙ୍କୁ ଯୁକ୍ତରାଷ୍ଟ୍ରରୁ ପ୍ରତ୍ୟର୍ପଣ କରିବା ପାଇଁ ୨୦୧୭ ମସିହାରୁ ଚେଷ୍ଟା କରୁଛନ୍ତି। ବ୍ରିଟେନର ଅଦାଲତରେ ଏହି ମାମଲା ଚାଲିଛି, କିନ୍ତୁ ଜଟିଳ ଆଇନଗତ ପ୍ରକ୍ରିୟା ଯୋଗୁଁ ଏହା ବିଳମ୍ବିତ ହେଉଛି। ମାଲ୍ୟା ଦାବି କରିଛନ୍ତି ଯେ, ତାଙ୍କୁ ଭାରତରେ ନିରପେକ୍ଷ ବିଚାର ମିଳିବ ନାହିଁ, ଯେଉଁ କାରଣରୁ ସେ ଲଣ୍ଡନରେ ରହୁଛନ୍ତି।
