ମୁମ୍ବାଇ,୨୨।୧୧ : ମୁଖ୍ୟମନ୍ତ୍ରୀ ଏକନାଥ ଶିିନ୍ଦେ ସରକାରଙ୍କ ସୁପାରିଶ କ୍ରମେ କମ୍ପ୍ଟ୍ରୋଲର ଏବଂ ଅଡିଟର ଜେନେରାଲ ଅଫ ଇଣ୍ଡିଆ (ସିଏଜି) ମଙ୍ଗଳବାର କରୋନ ମହାମାରୀ ସମୟରେ ବ୍ରିହାନମ୍ବାଇ ମ୍ୟୁନିସିପାଲିଟି କର୍ପୋରେଶନ (ବିଏମସି) ଦ୍ୱାରା ଠିକା ମାଧ୍ୟମରେ କରାଯାଇଥିବା କାର୍ଯ୍ୟ ଆବଣ୍ଟନ ସମ୍ପର୍କରେ ତଦନ୍ତ ଆରମ୍ଭ କରିଛନ୍ତିି। ଅଧିକାରୀମାନେ ଏ ବିଷୟରେ ସୂଚନା ଦେଇଛନ୍ତି।
ଉଲ୍ଲେଖନୀୟ ବିଷୟ ହେଉଛି, କରୋନା ମହାମାରୀ ସମୟରେ ମହାରାଷ୍ଟ୍ରରେ ମହା ବିକାଶ ଆଘାଡି (ଏମଭିଏ) ସରକାର ଥିଲା। ମହାମାରୀ ସମୟରେ ଲୋକଙ୍କ ଅସୁବିଧାକୁ ଏଡାଇବା ପାଇଁ ଟେଣ୍ଡର ପ୍ରକ୍ରିୟାକୁ ନ ଯାଇ ତୁରନ୍ତ ସୁବିଧା ତଥା ସାମଗ୍ରୀ କ୍ରୟକୁ ପ୍ରାଥମିକତା ଦିଆଯାଇଥିଲା। ଏଥି ସହିତ, ସେହି ସମୟରେ ବିରୋଧୀ ଦଳ ଭାଜପା ସରକାରଙ୍କୁ କ୍ଷମତାର ଅପବ୍ୟବହାର କରୁଥିବା ଅଭିଯୋଗ କରିଥିଲା।
ଅଧିକାରୀମାନେ କହିଛନ୍ତି ଯେ ୧୦ ଜଣିଆ ସିଏଜି ଟିମ ବିଏମସି କମିଶନର ଇକବାଲ ଚହଲଙ୍କ ସହ ସକାଳେ ବିଏମସିର ମୁଖ୍ୟାଳୟରେ ଏକ ବୈଠକ କରିଥିଲେ। ବୈଠକ ପରେ ବିଏମସି କମିଶନର କହିଛନ୍ତି ଯେ ବିଭିନ୍ନ ବିଭାଗର ଅଡିଟ କରାଯାଉଛି। ଏଥି ସହିତ, ସିଏଜି ଟିମ ଆସିବା ପୂର୍ବରୁ ସେ ସମସ୍ତ ବିଭାଗର ମୁଖ୍ୟ, ୱାର୍ଡ ଅଧିକାରୀ, ପ୍ରମୁଖ ଡାକ୍ତରଖାନାର ଡିନ ଏବଂ କୋଭିଡ-୧୯ କେନ୍ଦ୍ର ସହିତ ଏକ ବୈଠକ କରିଥିଲେ ଏବଂ ତଦନ୍ତ ସମ୍ବନ୍ଧରେ ଆବଶ୍ୟକ ନିର୍ଦ୍ଦେଶ ଦେଇଥିଲେ।
ସୂଚନାଯୋଗ୍ୟ, ଅକ୍ଟୋବର ୩୧ ରେ, ଏକନାଥ ଶିନ୍ଦେଙ୍କ ନେତୃତ୍ୱାଧୀନ ସରକାର ମହାମାରୀ ସମୟରେ ମୁମ୍ବାଇ ନାଗରିକ ସଂସ୍ଥା ଦ୍ୱାରା କରାଯାଇଥିବା କାର୍ଯ୍ୟର ଆବଣ୍ଟନ ଯାଞ୍ଚ କରିବାକ ସିଏଜିଙ୍କୁ କହିଥିଲେ।
ଭାଜପା ବିଧାୟକ ଆଶିଷ ଶେଲାର ଅଭିଯୋଗ କରିଛନ୍ତି ଯେ ବିଏମସିର ୧୦ ଟି ବିଭାଗର ଟେଣ୍ଡର ଏବଂ ଚୁକ୍ତିରେ ୧୨ ହଜାର କୋଟି ଟଙ୍କା ମୂଲ୍ୟର ଦୁର୍ନୀତି ହୋଇଛି। ଶେଲର ଅଭିଯୋଗ କରିଛନ୍ତି ଯେ ଜଣେ ବିଲଡରଙ୍କ ଠାରୁ ୩୩୯ କୋଟି ଟଙ୍କାରେ ଜମି କ୍ରୟ କରାଯାଇଛି, ଯଦିଓ ତାଙ୍କୁ ମାତ୍ର ୨-୩ କୋଟି ଟଙ୍କା ମିଳିଛି। ସେ କହିଛନ୍ତି ଯେ କୋଭିଡ -୧୯ ମହାମାରୀ ସମୟରେ କରାଯାଇଥିବା କେନ୍ଦ୍ରୀୟ କ୍ରୟ ସନ୍ଦେହଜନକ। ଆମେ ଏହାର ଯାଞ୍ଚ୍ ଚାହୁଁଛୁ।
