ଭବାନୀପାଟଣା,୨୫।୧୧(ଉତ୍ତମ କୁମାର ଦାଶ)-କଳାହାଣ୍ଡି ଜିଲା ଭବାନୀପାଟଣା ସ୍ଥିତ ମା’ ମାଣିକେଶ୍ୱରୀ ବିଶ୍ୱବିଦ୍ୟାଳୟର କଳା ତୃତୀୟ ବର୍ଷର ଛାତ୍ରୀ ତଥା ଆର୍ମି ଏନ୍ସିସିର ଜୁନିୟର ଅଣ୍ଡର ଅଫିସର ନମିତା ସାହୁ ଡାଇରେକ୍ଟର ଜେନେରାଲ ପ୍ରଶସ୍ତି ପାଇଁ ମନୋନୀତ ହୋଇଛନ୍ତି। ନବରଙ୍ଗପୁର ୧୩ ଓଡିଶା ବାଟାଲିଅନର ସେ ପ୍ରଥମ କ୍ୟାଡର ଭାବେ ଏହି ସମ୍ମାନ ପାଇଛନ୍ତି । ଏହାସହ ଭବାନୀପାଟଣା ସରକାରୀ ସ୍ବୟଂଶାସିତ ଶାସିତ ମହାବିଦ୍ୟାଳୟ ଓ ମା’ ମାଣିକେଶ୍ୱରୀ ବିଶ୍ୱବିଦ୍ୟାଳୟର ମଧ୍ୟ ସେ ପ୍ରଥମ କ୍ୟାଡର ଏହି ପୁରସ୍କାର ପାଇଁ ମନୋନୀତ ହୋଇଛନ୍ତି। ଏହାପୂର୍ବରୁ ୨୦୨୧ ମସିହାରେ ବିଶ୍ୱ ବିଦ୍ୟାଳୟର ଉପକୂଳ ସଚିବ ମେଜର ଡ. ଜୟଦେବ ସାହୁ ଅଫିସର ଭାବରେ ଏହି ପୁରସ୍କାର ପାଇଥିଲେ।
ଭବାନୀପାଟଣା ବ୍ଲକ ମେଦିନୀପୁର୍ ଗ୍ରାମର ମଦନ ସାହୁ ଓ ଲତା ସାହୁଙ୍କ ଝିଅ ନମିତା ଅଟନ୍ତି । ନମିତା ଗତ ୨୦୨୫ ଜାନୁୟାରୀ ୨୬ ଆର୍ ଡି ସି ପ୍ୟାରେଡ଼ ଦିଲ୍ଲୀ କର୍ତ୍ତବ୍ୟ ପଥରେ ମାର୍ଚ୍ଚ କରି ପ୍ରସଂଶା ସାଉଁଟି ଥିଲେ । ଏନ ସି ସି ପ୍ରତି ତାଙ୍କ ନିଷ୍ଠା ଓ ବଳିଦାନ ପାଇଁ ଏହି ପୁରସ୍କାର ପାଇ କଳାହାଣ୍ଡି ତଥା ବିଶ୍ୱବିଦ୍ୟାଳୟର ଗୌରବ ବଢାଇଛନ୍ତି । ଏହି ସଫଳତା ପାଇଁ ଭାରପ୍ରାପ୍ତ କୁଳପତି ଡ. ନିବେଦିତା ନାଥ, କୁଳସଚିବ ଡ. ଗୁଣନିଧି ନାଇକ, ଉପକୁଳ ସଚିବ ତଥା ଏନସିସି ଅଧିକାରୀ ମେଜର ଡ. ଜୟଦେବ ସାହୁ, କର୍ନେଲ ସୁନୀଲ କୁମାର ପ୍ରମୁଖ ତାଙ୍କୁ ଅଭିନନ୍ଦନ ଜଣାଇଛନ୍ତି।
