ଭୁବନେଶ୍ୱର,୫ା୧୨(ସୁନିତ୍ ମିଶ୍ର):ବିଜେଡି ୨୪ ବର୍ଷ ଧରି ସରକାରରେ ଥିବାବେଳେ ଯଦି ସବୁ ସମସ୍ୟାର ସମାଧାନ କରିଦେଇଥାଆନ୍ତେ ତେବେ ଆଜି ଗୃହରେ ଏତେ ଗୁଡ଼ାଏ କଥା ସେମାନଙ୍କୁ କହିବାକୁ ପଡୁ ନ ଥାଆନ୍ତା। ଭାଜପା ରାଜ୍ୟରେ ୫ ମାସ ହେଲା ସରକାରକୁ ଆସିଛି। ଏହି ସମୟ ମଧ୍ୟରେ ରାଜ୍ୟରେ ଖାଲି ଥିବା ଆର୍ଆଇ, ଅମିନ ପଦବୀ ପୂରଣ ପ୍ରକ୍ରିୟା ଆରମ୍ଭ ହୋଇସାରିଛି। ୨୦୨୫ ବର୍ଷ ଆରମ୍ଭ ବେଳକୁ ରାଜ୍ୟରେ ଆର୍ଆଇ, ଅମିନ ପଦବୀ ଖାଲି ନ ଥିବ ବୋଲି ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି।
ବିଧାନସଭାରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଅତିରିକ୍ତ ଖର୍ଚ୍ଚଦାବି ଆଲୋଚନା ହୋଇଛି। ଏହି ଅତିରିକ୍ତ ଖର୍ଚ୍ଚଦାବିକୁ ଗୃହରେ ପାରିତ ମଧ୍ୟ କରାଯାଇଛି। ଉକ୍ତ ବିଭାଗର ଆଲୋଚନା ପରେ ମନ୍ତ୍ରୀ ପୂଜାରୀ ନିଜ ଉତ୍ତରରେ କହିଛନ୍ତି, ରାଜସ୍ବ ବିଭାଗ ସ୍ମାର୍ଟ ସର୍ଭିଲେନ୍ସ ସିଷ୍ଟମ ଆରମ୍ଭ କରିଛନ୍ତି। ୨୩୨ ଜିଲା ସବ୍ରେଜିଷ୍ଟ୍ରାର ଏବଂ ୩୦ଟି ଜିଲା ରେଜିଷ୍ଟ୍ରାର ଅଫିସ୍ରେ ସିସିଟିଭି ଲଗାଯାଇଛି। କଟକ ସ୍ଥିତ ଆଇଜିଆର୍ ଅଫିସ୍ରେ ସବୁଠାରେ କ’ଣ ଚାଲିଛି ତାହାକୁ ମିନିଟରିଂ କରାଯାଉଛି। ପ୍ରାକୃତିକ ବିପର୍ଯ୍ୟୟ ପରିଚାଳନା କରିବାରେ ଓଡ଼ିଶାର ନାଁ ଅଛି। ହେଲେ ପ୍ରାକୃତିକ ବିପର୍ଯ୍ୟୟ ସମୟରେ ଆଗରୁ ଏସ୍ଆର୍ସି ଅଫିସ୍ ଯାଇ କୌଣସି ମୁଖ୍ୟମନ୍ତ୍ରୀ କେବେ ସମୀକ୍ଷା କରିନାହାନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୫ ଥର ଏସ୍ଆର୍ସି ଅଫିସ ଯାଇ ଜିଲାପାଳ ଏବଂ ବିଡିଓମାନଙ୍କ ସହ ବୈଠକ କରିଛନ୍ତି। ୨୪ ତାରିଖ ରାତି ଅଧରେ ବାତ୍ୟା ଦାନା ଲ୍ୟାଣ୍ଡଫଲ୍ କଲା। ଆମ ସରକାର ଦାନାକୁ ଦାନା ବାନ୍ଧିବାକୁ ଦେଲେ ନାହିଁ। ପ୍ରଥମ ଥର ଲାଗି ବାତ୍ୟା ଦାନା ସମୟରେ ରାଜନୈତିକ ବ୍ୟକ୍ତି ରାସ୍ତାକୁ ବାହାରିଲେ। ଗତ ୩୦ ବର୍ଷରେ ୧ ହଜାର ଗାଁକୁ ରାଜସ୍ବ ଗାଁ ମାନ୍ୟତା ମିଳିଲା। ଧୈର୍ଯ୍ୟ ଧରନ୍ତୁ, ଆସନ୍ତା ୫ବର୍ଷ ଭିତରେ ରାଜସ୍ବ ଗାଁ ପାଇଁ ଯେତେସବୁ ପ୍ରସ୍ତାବ ରହିଛି ସେସବୁର ସମାଧାନ ହୋଇସାରିଥିବ ବୋଲି ସେ କହିଛନ୍ତି।
ଜବରଦଖଲ ସମସ୍ୟା ନେଇ ମନ୍ତ୍ରୀ ପୂଜାରୀ କହିଛନ୍ତି, ଆମ ସରକାର ଜବରଦଖଲକାରୀଙ୍କୁ ୨ ଭାଗରେ ବାଣ୍ଟି ଦେଇଛନ୍ତି। ଗୋଟିଏ ହେଉଛନ୍ତି ଗରିବ ଲୋକ, ଯେଉଁମାନେ ଜବରଦଖଲ କରିଛନ୍ତି। ସେମାନଙ୍କ କାର୍ଯ୍ୟକୁ ଆମ ସରକାର ଜବରଦଖଲ ବୋଲି ଭାବୁନାହାନ୍ତି। ସେମାନେ ଜବରଦଖଲ କରିଥିବା ଜମିକୁ ପଟ୍ଟାକରି ସେମାନଙ୍କ ନାଁରେ କରିଦିଆଯିବ। ସେଠାରେ ସେମାନଙ୍କୁ ଘର ମଧ୍ୟ ଯୋଗାଇଦିଆଯିବ। ରାଜ୍ୟର ବଡ଼ ଲୋକ ଯେଉଁମାନେ ଜବରଦଖଲ କରିଛନ୍ତି, ସେମାନଙ୍କ ବଡ଼ ବଡ଼ ଅଟ୍ଟାଳିକାକୁ ବୁଲ୍ଡୋଜର ଲଗାଇ ଗଳାଇଦେବୁ। ଭୂମିହୀନମାନଙ୍କ ସମସ୍ୟା ତୁରନ୍ତ ସମାଧାନ ଲାଗି ସରକାର କାର୍ଯ୍ୟ କରୁଛନ୍ତି। ପ୍ରତ୍ୟେକ ମାସର ଶେଷ ଶନିବାର ବିଡିଓ, ତହସିଲଦାରମାନେ ଏକାଠି ବୈଠକକରି ପ୍ରଧାନମନ୍ତ୍ରୀ ଆବାସ ଗରିବ ଲୋକଙ୍କୁ ଯୋଗାଇଦେବେ। ରାଜ୍ୟରେ ଯେଉଁ ସ୍ଥାନରେ ଆବଶ୍ୟକତା ଅଛି ସେଠାରେ ତହସିଲ ଅଫିସ କରାଯିବ। ଦୁଇଟି ଲେଖା ପଞ୍ଚାୟତରେ ଗୋଟିଏ ଲେଖା ଆର୍ଆଇ ଅଫିସ କରାଯିବ ବୋଲି ମନ୍ତ୍ରୀ କହିଛନ୍ତି। ସେହିପରି ଜୟନାରାୟଣ ମିଶ୍ର ସ୍କୁଲ, କଲେଜ ଆଡ୍ମିଶନରେ ବିଧାୟକମାନଙ୍କ ସାର୍ଟିଫିକେଟକୁ ଚୂଡ଼ାନ୍ତ ଧରାଯାଉଥିଲା। ଏବେ ତାହା ହେଉ ନାହିଁ ବୋଲି ସେ କହିଥିଲେ। ଏହା ଉପରେ ମଧ୍ୟ ବିଚାର କରାଯିବ ବୋଲି ମନ୍ତ୍ରୀ କହିଛନ୍ତି।
