ବାରିପଦା ଅଫିସ,୧୯ା୨-ମୟୂରଭଞ୍ଜ ଜିଲା ବେତନଟୀସ୍ଥିତ ମହାରାଜା ପୂର୍ଣ୍ଣଚନ୍ଦ୍ର ହାଇସ୍କୁଲ(ଏମ୍ପିସି) ପରିସରରୁ ବେଆଇନ ମାଟି ଓ ମୋରମ ଉତ୍ତୋଳନ କରାଯିବା ପ୍ରତିବାଦରେ ଅଞ୍ଚଳବାସୀ ଜିଲାପାଳଙ୍କଠାରେ ଅଭିଯୋଗ କରିଛନ୍ତି। କୌଣସି ସରକାରୀ ନିର୍ଦ୍ଦେଶ ନ ଥାଇ ଶହ ଶହ ଟ୍ରିପ ମୋରମ ଉତ୍ତୋଳନ ହେଉଛି। ପୋଖରୀ ପୁନରୁଦ୍ଧାର ନାଁରେ ବ୍ୟବସାୟ ଚଳାଇ ଲକ୍ଷାଧିକ ଟଙ୍କା ରାଜସ୍ବ ଲୁଟ୍ କରାଯାଉଥିବା ଅଭିଯୋଗରେ ଦର୍ଶାଯାଇଛି। ଖବୁଶୀଘ୍ର ଏହାର ତଦନ୍ତ କରି ବେଆଇନ ଉତ୍ତୋଳନକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ପୋଖରୀକୁ ପୋତିବା ପାଇଁ ଅଞ୍ଚଳବାସୀ ଦାବି କରିଛନ୍ତି। ଜିଲାପାଳ ବିନୀତ ଭରଦ୍ୱାଜ ଘଟଣାର ତଦନ୍ତ ପାଇଁ ବେତନଟୀ ତହସିଲଦାରଙ୍କୁ ନିର୍ଦ୍ଦେଶ ଦେବା ସହିତ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରକାଶ କରିଛନ୍ତି। ଜିଲା ଶିକ୍ଷାଧିକାରୀଙ୍କୁ ମଧ୍ୟ ଅଞ୍ଚଳବାସୀ ଭେଟି ଘଟଣା ସମ୍ପର୍କରେ ଅବଗତ କରିଛନ୍ତି।
ସୂଚନା ଅନୁଯାୟୀ, ୧୯୪୬ରେ ୩ଏକରରୁ ଊର୍ଦ୍ଧ୍ୱ ଜମିରେ ଏମ୍ପିସି ହାଇସ୍କୁଲ ପ୍ରତିଷ୍ଠା ହୋଇଛି। ଏଠାରେ ୪୮୦ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ ସ୍କୁଲ ପରିସରରେ ଏକ ପୋଖରୀ ରହିଛି ା ଏହି ପୋଖରୀର ପୁନରୁଦ୍ଧାର ନିମନ୍ତେ ପରିଚାଳନା ସମିତି ପକ୍ଷରୁ ସିଦ୍ଧାନ୍ତ ନିଆଯାଇଥିଲା ା ତେବେ ପୋଖରୀ ପୁନରୁଦ୍ଧାର ପରିବର୍ତ୍ତେ ଏହାର ମାଟି ଓ ମୋରମକୁ ବେଆଇନ ଭାବେ ଖୋଳାଯାଇ ପ୍ରାୟ ୩୦ଫୁଟ ଗଭୀର କରିଦିଆଯାଇଛି। ଉକ୍ତ ମାଟି ଓ ମୋରମକୁ ସ୍କୁଲ ପରିସରରେ ରଖା ନ ଯାଇ ଜାତୀୟ ରାଜପଥରେ କାର୍ଯ୍ୟକରୁଥିବା ଏକ କମ୍ପାନୀକୁ ବିକ୍ରି କରାଯାଇଛି। ଫଳରେ ପୋଖରୀଟି ଏବେ ମରଣଯନ୍ତା ପାଲଟିଛି। ପୋଖରୀକୁ ଲାଗି ରହିଥିବା ସ୍କୁଲର ପାଚେରୀ ବିପଦ ସଙ୍କୁଳ ହୋଇପଡ଼ିଛି। ସେହିପରି ପୋଖରୀର ଗୋଟିଏ ପାର୍ଶ୍ୱରେ ଜାତୀୟ ରାଜପଥ ରହିଥିବା ବେଳେ ଅନ୍ୟପାର୍ଶ୍ୱ ପୂର୍ତ୍ତ ବିଭାଗ ରାସ୍ତାରେ ପ୍ରତିଦିନ ହଜାର ହଜାର ଯାନବାହନ ଚଳପ୍ରଚଳ କରୁଛି ା ସାମାନ୍ୟ ଅସାବଧନତା ହେଲେ ପୋଖରୀ ମଧ୍ୟରେ ପଡ଼ି ଜୀବନହାନି ଘଟିବାର ଯଥେଷ୍ଟ ସମ୍ଭାବନା ରହିଛି ବୋଲି ଆଇନଜୀବୀ ହିମାଂଶୁ କୁମାର ପରିଡ଼ା, କୈଳାସ ଚନ୍ଦ୍ର ଅଗ୍ରୱାଲ, ଜନମନ ବେହେରା, ସୁଶାନ୍ତ କୁମାର ବଳା, ବିଶ୍ୱନାଥ ହେମ୍ବ୍ରମ, ସୁନୀଲ ଅଗ୍ରୱାଲ, ମଳୟ ଦାସ ପ୍ରମୁଖ ଅଭିଯୋଗ କରିଛନ୍ତି। ସେହିପରି ଖରାଦିନେ ବୁଲା ଜୀବଜନ୍ତୁ ପାଣି ପିଇବା ପାଇଁ ପୋଖରୀକୁ ଯାଇ ମୃତ୍ୟୁବରଣ କରିବାର ସମ୍ଭାବନା ମଧ୍ୟ ଦେଖାଦେଇଛି ା ତେବେ ଛାତ୍ରୀଛାତ୍ରଙ୍କ ସୁରକ୍ଷା ପାଇଁ ସରକାର ପାଚେରୀ ନିର୍ମାଣ କରୁଥିବା ବେଳେ ପରିଚାଳନା ସମିତି ଓ ସ୍କୁଲ କର୍ତ୍ତୃପକ୍ଷଙ୍କ ଏପରି କାର୍ଯ୍ୟକଳାପକୁ ସାଧାରଣରେ ନିନ୍ଦା କରାଯାଇଛି। ଏ ସମ୍ପର୍କରେ ସ୍କୁଲର ପ୍ରଧାନ ଶିକ୍ଷକ ଶ୍ରୀକୃଷ୍ଣ ପାତ୍ରଙ୍କୁ ପଚାରିବାରୁ ପରିଚାଳନା ସମିତିର ନିଷ୍ପତ୍ତି କ୍ରମେ ପୋଖରୀ ଖୋଳାଯାଇଛି। ସରକାରଙ୍କ ପକ୍ଷରୁ ଏନେଇ କୌଣସି ଆଦେଶ ନ ଥିବା ବେଳେ ଏଭଳି ଭୁଲକୁ ସୁଧାରିବେ ବୋଲି ସ୍ବୀକାର କରିଛନ୍ତି। ତେବେ କୌଣସି ଅଘଟଣ ଘଟିବା ପୂର୍ବରୁ ଏହାର ସମାଧାନ କରିବା ପାଇଁ ପୁରାତନ ଛାତ୍ର ସଂସଦ, ଅଞ୍ଚଳବାସୀ ଓ ଅଭିଭାବକ ମହଲରେ ଦାବି ହେଉଛି ା
