ଭଦ୍ରକ/ବନ୍ତ,୧୫ା୧୨(ସନାତନ ରାଉତ/ହରିନାରାୟଣ ମହାନ୍ତି)-ଭଦ୍ରକ ଜିଲା ବନ୍ତ ଥାନା ଅଧୀନ ଟିଲୋ ଜାଗୁଳାଇପଦା ଛକରେ ରବିବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ବସ୍ ମାଡ଼ିଯିବାରୁ ଜଣେ ଭାଜପା ନେତାଙ୍କ ମୃତ୍ୟୁ ଘଟିଛି। ଏଥିସହ ବସ୍ଟି ରାସ୍ତାକଡ଼ରେ ଥିବା ବିଦ୍ୟୁତ୍ ଟ୍ରାନ୍ସଫର୍ମରକୁ ଧକ୍କା ଦେଇ ନୟନଯୋରିକୁ ଓଲଟି ପଡ଼ିବାରୁ ୧୦ ଯାତ୍ରୀ ଆହତ ହୋଇଥିବା ବେଳେ ୪ଜଣ ଗୁରୁତର ହୋଇ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଅଛନ୍ତି। ମୃତକ ହେଲେ ବନ୍ତ ବ୍ଲକର ପୂର୍ବତନ ଭାଜପା ସଭାପତି ତଥା ଜିଲା ଉପସଭାପତି ଟିଲୋ ଗ୍ରାମର ସୁଧାକର ଧଳ(୫୯)। କ୍ଷତିପୂରଣ ଦାବିରେ ଉତ୍ତ୍ୟକ୍ତ ଲୋକେ ରାସ୍ତାରୋକୋ କରିଥିଲେ। ଘଟଣାସ୍ଥଳରେ ପୋଲିସ ଫୋର୍ସ ମୁତୟନ ରହିଛି।
ସୂଚନା ଅନୁଯାୟୀ, ‘ବାବା ଅରୂପାନନ୍ଦ’ ନାମକ ବସ୍ ଭଦ୍ରକରୁ ଆନନ୍ଦପୁର ଯାଉଥିଲା। ଭଦ୍ରକରୁ ଯିବାବେଳେ ମାତ୍ର ୧୦ରୁ ୧୨ ଯାତ୍ରୀ ବସ୍ରେ ଥିଲେ। ଜାଗୁଳାଇପଦା ଛକ ନିକଟରେ ସୁଧାକର ନିଜ ଘର ସାମ୍ନା ରାସ୍ତାପାର୍ଶ୍ୱରେ ଅନ୍ୟ ୨ଜଣଙ୍କ ସହ ଠିଆହୋଇ କଥା ହେଉଥିଲେ। ଏହି ସମୟରେ ଦ୍ରୁତଗତିରେ ଯାଉଥିବା ବସ୍ଟି ରାସ୍ତାକଡ଼କୁ ମାଡ଼ିଯାଇଥିଲା। ଅନ୍ୟ ୨ଜଣ ବସ୍ ସେମାନଙ୍କ ଆଡ଼କୁ ମାଡ଼ିଯାଉଥିବା ଦେଖି ସେଠାରୁ ଡେଇଁପଡ଼ି ନିଜ ଜୀବନ ବଞ୍ଚାଇଥିଲେ। ସୁଧାକର ପଛରୁ ବସ୍ ଆସୁଥିବା ଜାଣିପାରି ନ ଥିଲେ। ବସ୍ଟି ତାଙ୍କ ଉପରେ ମାଡ଼ିଯାଇ ବିଦ୍ୟୁତ୍ ଟ୍ରାନ୍ସଫର୍ମରକୁ ଧକ୍କା ଦେଇ ଓଲଟି ପଡ଼ିଥିଲା।
ବସ୍ର ପଛ କାଚ ଭାଙ୍ଗି ଯାତ୍ରୀମାନଙ୍କୁ ଉଦ୍ଧାର କରାଯାଇଥିଲା। ଆହତମାନଙ୍କୁ ବନ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର, ବରପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ଭଦ୍ରକ ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେମାନଙ୍କ ମଧ୍ୟରୁ ତିହିଡ଼ିର ଆଶିଷ ରାଉତ(୨୭), ମହେନ୍ଦ୍ର ବେହେରା(୬୧), ଗଦିର ହେମଲତା ପରିଡ଼ା(୩୭) ଓ ଠାକୁରମୁଣ୍ଡାର ଅନୀତା ମାହନ୍ତ(୧୫) ଗୁରୁତର ଅଛନ୍ତି।
ଭଣ୍ଡାରିପୋଖରୀ ବିଧାୟକ ସଞ୍ଜୀବ ମଲ୍ଲିକ ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚି ଆହତମାନଙ୍କ ଚିକିତ୍ସା ବ୍ୟବସ୍ଥା ବୁଝିଥିଲେ। ଦୁର୍ଘଟଣା ପରେ ବସ୍ ଡ୍ରାଇଭର ଫେରାର ହୋଇଯାଇଥିବା ବେଳେ ଟିଲୋ ଅଞ୍ଚଳରେ ଉତ୍ତେଜନା ଦେଖାଦେଇଥିଲା। ଲୋକେ ଟାୟାର ଜାଳି ରାସ୍ତାରୋକୋ କରିଥିଲେ।
