ମେଲବୋର୍ନ, ୩୧।୧୨(ପି.ଟି.)- ଭାରତ ବିପକ୍ଷ ଟେଷ୍ଟ ସିରିଜର ଅବଶିଷ୍ଟ ୨ଟି ମ୍ୟାଚ ପାଇଁ ଅଷ୍ଟ୍ରେଲିଆ ଦଳରୁ ଓପନର ଜୋ ବର୍ନ୍ସ ବାଦ୍ ପଡ଼ିଛନ୍ତି। ଡେଭିଡ ଓ୍ବାର୍ନର ଓ ଓ୍ବିଲ୍ ପୁକୋଭସ୍କି ଦଳରେ ସାମିଲ ହୋଇଛନ୍ତି। ପ୍ରଥମ ଦୁଇ ଟେଷ୍ଟର ୪ ଇନିଂସରେ ବନର୍ସ ଗୋଟିଏ ମାତ୍ର ଅର୍ଦ୍ଧଶତକ ହାସଲ କରିଥିଲେ। ସେ ଯଥାକ୍ରମେ ୮, ୫୧, ୦ ଓ ୪ ରନ କରିଥିଲେ। ଅଷ୍ଟ୍ରେଲିଆ ଆଡିଲେଡ୍ରେ ବିଜୟୀ ହୋଇଥିଲେ ହେଁ ଭାରତ ମେଲବୋର୍ନରେ ଜିତିବାପରେ ସିରିଜ ୧-୧ ସ୍ଥିତିରେ ରହିଛି। ଉରୁସନ୍ଧିରେ ଆଘାତ ଯୋଗୁ ଓ୍ବାର୍ନର ପୂର୍ବ ୨ ଟେଷ୍ଟରେ ଖେଳିପାରି ନ ଥିଲେ। ଏବେ ଫିଟ୍ ହୋଇଥିବାରୁ ସଂଘର୍ଷ କରୁଥିବା ବର୍ନ୍ସଙ୍କ ସ୍ଥାନରେ ତାଙ୍କୁ ସାମିଲ କରିବାରେ କୌଣସି ଅସୁବିଧା ହୋଇ ନ ଥିଲା। ବନର୍ସଙ୍କୁ ଦଳରୁ ରିଲିଜ୍ କରାଯାଇଛି। ଏବେ ସେ ଘରୋଇ କ୍ରିକେଟରେ ବ୍ରିସବେନ୍ ହିଟ୍ ପାଇଁ ଉପଲବ୍ଧ ହେବେ ବୋଲି ଜାତୀୟ ଚୟନକର୍ତ୍ତା ଟ୍ରେଭର ହନ୍ସ ପ୍ରକାଶ କରିଛନ୍ତି। ଓ୍ବାର୍ନର, ପୁକୋଭସ୍କି ଏବଂ ସିଅନ ଆବୋଟ ଗୁରୁବାର ଦଳରେ ଯୋଗ ଦେବେ ବୋଲି ସେ ସୂଚନା ଦେଇଛନ୍ତି। ଆହତ ସମସ୍ୟାରୁ ଆବୋଟ ସମ୍ପୂର୍ଣ୍ଣ ମୁକୁଳିଛନ୍ତି। ଜାନୁୟାରୀ ୭ରୁ ତୃତୀୟ ଟେଷ୍ଟ ସିଡ୍ନୀରେ ଆରମ୍ଭ ହେବ। ଏହା ମଧ୍ୟରେ ଆହୁରି ୭ ଦିନ ସମୟ ଥିବାରୁ ଓ୍ବାର୍ନର ଓ ଆବୋଟ ତୃତୀୟ ଟେଷ୍ଟ ପାଇଁ ଉପଲବ୍ଧ ହୋଇପାରିବେ ବୋଲି ହନ୍ସ ଦୃଢ଼ୋକ୍ତି ପ୍ରକାଶ କରିଛନ୍ତି। କନକସନରେ ପୀଡ଼ିତ ହୋଇଥିବା ପୁକୋଭସ୍କି ଏବେ ପ୍ଲେଇଂ ପ୍ରୋଟୋକଲର ଶେଷ ପର୍ଯ୍ୟାୟରେ ପହଞ୍ଚତ୍ଛନ୍ତି। ତାଙ୍କ ଦେହରେ କୌଣସି ଲକ୍ଷଣ ନାହିଁ। ତାଙ୍କ ସ୍ବାସ୍ଥ୍ୟ ଉପରେ ନଜର ରଖାଯାଇଛି। ତେଣୁ ସେ ମଧ୍ୟ ଚୟନପାଇଁ ଉପଲବ୍ଧ ହେବା ଆଶା ରହିଛି ବୋଲି ହନ୍ସ କହିଛନ୍ତି।
ପରିବର୍ତ୍ତିତ ଅଷ୍ଟ୍ରେଲିଆ ଦଳ: ଟିମ୍ ପେନ୍ (ଅଧିନାୟକ), ସିଅନ ଆବୋଟ, ପ୍ୟାଟ୍ କୁମିନ୍ସ, କାମେରନ ଗ୍ରୀନ୍, ମାର୍ନସ ଲାବୁସ୍କାନ, ମାର୍କୁସ ହାରିସ, ଜୋଶ୍ ହାଜେଲ୍ଉଡ୍, ଟ୍ରାଭିସ ହେଡ୍, ମୋଇସେସ ହେନରିକ୍ସ, ନାଥାନ ଲିୟନ, ମିଚେଲ ନେସେର, ଜେମ୍ସ ପ୍ୟାଟିନସନ, ଓ୍ବିଲ୍ ପୁକୋଭସ୍କି, ଷ୍ଟିଭ୍ ସ୍ମିଥ, ମିଚେଲ ଷ୍ଟାର୍କ, ମିଚେଲ ସ୍ବେପସନ, ମାଥ୍ୟୁ ଓ୍ବାଡେ, ଡେଭିଡ ଓ୍ବାର୍ନର।
