କୋରୁକୋଣ୍ଡା,୨୫ା୨(ଡି.ଏନ୍.ଏ.): ମାଲକାନଗିରି ଜିଲା ଓର୍କେଲ ଥାନା ଅନ୍ତର୍ଗତ ତାରଲାକୋଟା ପଞ୍ଚାୟତ ଅଧିନସ୍ଥ ତାରଲାକୋଟା-ବି ଗ୍ରାମରେ ଏକ ଅଜବ ଘଟଣା ଦେଖିବାକୁ ମିଳିଛି।
ସୂଚନାଯୋଗ୍ୟ, ତାରଲାକୋଟା-ବି ଗ୍ରାମରେ ଥିବା ୧୦ ଜଣ ମହିଳା ମିଳିତ ଭାବେ ମା’ ତାରାତାରିଣୀ ନାମକ ଏକ ମହିଳା ସୟଂସହାୟିକା ଗୋଷ୍ଠୀ ଗଠନ କରି ମାସିକ ୧୦୦ ଟଙ୍କା ପ୍ରତି ସଦସ୍ୟ ଆଦାୟ କରି ବାଲିମେଳାସ୍ଥିତ ବ୍ୟାଙ୍କରେ ଦୀର୍ଘଦିନ ଧରି ଜମା କରି ଆସୁଥିଲେ। କିନ୍ତୁ ଗତ ୧୯ ତାରିଖ ସନ୍ଧ୍ୟାରେ ଉକ୍ତ ଗୋଷ୍ଠୀର ସଦସ୍ୟା ସୁନ୍ଦୁରା ବାଙ୍ଗୁରୁଙ୍କ ଝିଅ ରାଧିକା ସେଠୀ ମା’ ତାରାତାରିଣୀ ମହିଳା ସୟଂସହାୟିକା ଗୋଷ୍ଠୀର ସଭାପତି ଅମ୍ବିକା ବୁରୁଜା ଓ ଅନ୍ୟ ସଦସ୍ୟମାନଙ୍କୁ ମା’ଙ୍କ ଦେହ ଅସୁସ୍ଥ ଥିବା ଜଣାଇବା ସହ ଚିକିତ୍ସା ନିମନ୍ତେ ଗୋଷ୍ଠୀର ଜମା ଟଙ୍କାରୁ ୧୦ ହଜାର ଟଙ୍କା ଧାର ଆକାରରେ ମାଗିଥିଲେ। ଏହା ପର ଦିନ ୨୦ ତାରିଖରେ ସମସ୍ତ ସଦସ୍ୟ ବ୍ୟାଙ୍କ ଯାଇ ୨୦ ହଜାର ଟଙ୍କା ଉଠାଇ ରାଧାଙ୍କୁ ୧୦ ହଜାର ଟଙ୍କା ଦେଇଥିଲେ। ବ୍ୟାଙ୍କକୁ ଯିବା ସମୟରେ ନେଇଥିବା ବ୍ୟାଙ୍କ ପାସ୍ ବୁକ,ଏଟିଏମ୍, ଚେକ୍ ବୁକ୍ ସମେତ ଗୋଷ୍ଠୀର ସମସ୍ତ ନଥିପତ୍ର ଏକ ବ୍ୟାଗରେ ରାଧାଙ୍କ ନିକଟରେ ରହିଯାଇଥିବା ବେଳେ ଗତ ୨୨ ତାରିଖ ସନ୍ଧ୍ୟାରେ ମହିଳା ସୟଂସହାୟିକା ଗୋଷ୍ଠୀର ସଭାପତି ଅମ୍ବିକା ଯାଇ ନଥିପତ୍ର ଥିବା ବ୍ୟାଗଟିକୁ ମାଗିବାରୁ ସମସ୍ତ ସଦସ୍ୟା ନ ଆସିଲେ ବ୍ୟାଗ ଦେବିନାହିଁ କହିଥିଲେ। ପରେ ସଭାପତି ସମସ୍ତ ସଦସ୍ୟଙ୍କୁ ଏକତ୍ର କରି ପୁନଃ ରାଧାଙ୍କ ଘରକୁ ଯିବାରୁ, ଘରଦାଣ୍ଡରେ ବସାଇ ଘର ଭିତରୁ ସବୁ କଗଜପତ୍ର ଚିରି ନିଆଁରେ ପୋଡ଼ିଦେଇ ଅଧ ପୋଡ଼ା କାଗଜପତ୍ର ଆଣିବା ସହ ଖରାପ ଭାଷାରେ ଗାଳିଗୁଲଜ କରୁଥିଲେ। ଏନେଇ ଗତ ୨୩ ତାରିଖ ସନ୍ଧ୍ୟାରେ ଓର୍କେଲ ଥାନାରେ ସଭାପତି ଅମ୍ବିକା ବୁରୁଦା ଏକ ଲିଖିତ ଅଭିଯୋଗ କରିଥିଲେ। ଏନେଇ ଓର୍କେଲ ପୋଲିସ ପକ୍ଷରୁ ୧୨୩/୨୩ରେ ଏକ ମାମଲା ରୁଜୁ କରାଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବା ଗୋଷ୍ଠୀ ମହିଳା ଆଭିଯୋଗ କରିଛନ୍ତି। ଏନେଇ ଓର୍କେଲ ଥାନାଧିକାରୀ ଜୋନ୍ କୁଜୁରଙ୍କୁ ଫୋନ୍ ଯୋଗେ ଯୋଗାଯୋଗ କରିବାରୁ ଖୁବ୍ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମତ ପ୍ରକାଶ କରିଛନ୍ତି।
