ଇସଲାମାବାଦ,୧୯।୨ :ପୂର୍ବରୁ ଆଥର୍ର୍ିକ ସଙ୍କଟ ଦେଇ ଗତି କରୁଥିବା ପାକିସ୍ତାନ ବର୍ତ୍ତମାନ ଦେବାଳିଆ ହୋଇଯାଇଥିବା ସ୍ବୀକାର କରିଛି। ଏହାକୁ ନିଶ୍ଚିତ କରି ପ୍ରତିରକ୍ଷା ମନ୍ତ୍ରୀ ଖାୱାଜା ଆସିଫ କହିଛନ୍ତି ଯେ ଦେଶ ଦେବାଳିଆ ହୋଇସାରିଛି। ବର୍ତ୍ତମାନର ଅର୍ଥନୈତିକ ସଙ୍କଟ ପାଇଁ ସେ ସେନା, ଅମଲାତନ୍ତ୍ର ଏବଂ ରାଜନୈତିକ ନେତାମାନଙ୍କୁ ସେ ଦାୟୀ କରିଛନ୍ତି।
ନିଜ ସହର ସିଆଲକୋଟରେ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ସେ କହିଛନ୍ତି ଯେ ନିଜକୁ ସ୍ଥିର କରିବା ପାଇଁ ପାକିସ୍ତାନ ନିଜ ପାଦରେ ଠିଆ ହେବା ଆବଶ୍ୟକ। ଏକ୍ସପ୍ରେସ ଟ୍ରିବ୍ୟୁନ ଖବରକାଗଜ କହିଛି ଯେ ଆପଣ ନିଶ୍ଚୟ ଶୁଣିଥିବେ ଯେ ପାକିସ୍ତାନ ଦେବାଳିଆ ହେବାକୁ ଯାଉଛି। ଏହା ପୂର୍ବରୁ ଏଭଳି ହୋଇସାରିଛି। ଆମେ ଏକ ଦେବାଳିଆ ଦେଶରେ ବାସ କରୁଛୁ।
ସେ କହିଛନ୍ତି ଯେ ଆମର ସମସ୍ୟାର ସମାଧାନ ଦେଶ ଭିତରେ ଅଛି। ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ) ପାଖରେ ପାକିସ୍ତାନର ସମସ୍ୟାର ସମାଧାନ ନାହିଁ। ସେ କହିଛନ୍ତି ଯେ ପାକିସ୍ତାନରେ ଆଇନ ଏବଂ ସମ୍ବିଧାନ ପାଳନ କରାଯାଉ ନ ଥିବାରୁ ବର୍ତ୍ତମାନର ଆର୍ଥିକ ଅସୁବିଧା ପାଇଁ ସେନା, ଅମଲାତନ୍ତ୍ର ଏବଂ ରାଜନୈତିକ ନେତାଙ୍କ ସମେତ ସମସ୍ତେ ଦାୟୀ।
ପୂର୍ବ ସରକାର ଉପରେ ଆକ୍ରମଣ କରି ଆସିଫ କହିଛନ୍ତି ଯେ ଅଢ଼େଇ ବର୍ଷ ପୂର୍ବେ ଆତଙ୍କବାଦୀଙ୍କୁ ପାକିସ୍ତାନକୁ ଅଣାଯାଇଥିଲା। ଯାହା ଫଳରେ ବର୍ତ୍ତମାନର ଆତଙ୍କବାଦୀ ଆତଙ୍କ ସୃଷ୍ଟି କରିଛନ୍ତି। କରାଚିରେ ପୋଲିସ କାର୍ଯ୍ୟାଳୟ ଉପରେ ହୋଇଥିବା ଆକ୍ରମଣରେ ସେ କହିଛନ୍ତି ଯେ ସୁରକ୍ଷା ଏଜେନ୍ସିମାନେ ଆକ୍ରମଣକାରୀଙ୍କ ସହ ସାହସର ସହ ଲଢ଼ିଥିଲେ।
