ବରଗଡ଼,୨୩।୭(ପ୍ରେମାନନ୍ଦ ଖମାରୀ):ବରଗଡ ଜିଲାରେ ନିଶା କାରବାର ଚିନ୍ତାଜନକ ହୋଇ ପଡ଼ିଛି। ଏଠାରେ ଚୋରାମଦଠାରୁ ଆରମ୍ଭ କରି ଗଞ୍ଜେଇ, କଫ୍ ସିରପ, ନିଶା ବଟିକା ଏବଂ ବ୍ରାଉନସୁଗାର ବେପାର ଚାଲିଛି। ପୋଲିସ ଏବଂ ଅବକାରୀ ଚିରାଚରିତ ଢ଼ଙ୍ଗରେ ଚଢ଼ାଉ କରୁଛନ୍ତି। ନିଶାଦ୍ରବ୍ୟ ସହିତ ଅଭିଯୁକ୍ତମାନଙ୍କୁ ମଧ୍ୟ ଗିରଫ କରୁଛନ୍ତି। ଏହାସତ୍ତ୍ୱେ ଏହି କାରବାରରେ ଅଙ୍କୁଶ ଲାଗୁ ନାହିଁ। ଅନ୍ୟପଟେ ପୋଲିସ ଏବଂ ଅବକାରୀକୁ ଚ୍ୟାଲେଞ୍ଜ କରି ନିଶା କାରବାର ଜିଲାରେ ଦିନକୁ ଦିନ ବଢ଼ିବାରେ ଲାଗିଛି। ଗତ ୨ସପ୍ତାହ ମଧ୍ୟରେ ଜିଲାର କେବଳ ବରଗଡ଼ ସହରରେ ମୋଟ୍ ୧୩୨.୩ ଗ୍ରାମ ବ୍ରାଉନସୁଗାର ଜବତ ଏବଂ ୬ ଅଭିଯୁକ୍ତ ଗିରଫ ହୋଇଛନ୍ତି। ଜିଲାର ଅନ୍ୟଆଡ଼କୁ ମଧ୍ୟ ଏହାର ଚେର ଲମ୍ବିଥିବା ନେଇ ସାଧାରଣରେ ଆଲୋଚିତ ହେଉଛି। ସେହିପରି ବରଗଡ଼କୁ କେଉଁଠୁ ବ୍ରାଉନସୁଗାର ଆସୁଛି ଏବଂ ଏହି କାରବାରର କିଙ୍ଗପିନ୍ କିଏ ତାକୁ ନେଇ ମଧ୍ୟ ଏପର୍ଯ୍ୟନ୍ତ ଉଭୟ ଅବକାରୀ ଏବଂ ପୋଲିସ ଅନ୍ଧାରରେ ଅଛନ୍ତି। ସେଠାକୁ ଅବକାରୀ କିମ୍ବା ପୋଲିସ ପହଞ୍ଚି ପାରିଲେ ଯାଇ ଜିଲାରେ ଚାଲିଥିବା ବ୍ରାଉନସୁଗାର କାରବାର ଉପରେ କିଛିମାତ୍ରାରେ ଅଙ୍କୁଶ ଲଗିପାରିବ ବୋଲି ସଚେତନ ନାଗରିକ ମହଲରେ ମତପ୍ରକାଶ ପାଇଛି।
ମଙ୍ଗଳବାର ବରଗଡ଼ ଟାଉନ ଥାନା ପୋଲିସ ସ୍ଥାନୀୟ ଘରୋଇ ବସଷ୍ଟାଣ୍ଡ ନିକଟରୁ ୭୦ଗ୍ରାମ ବ୍ରାଉନ ସୁଗାର ଜବତ କରିଥିଲେ। ଏଥିରେ ସମ୍ପୃକ୍ତ ଦମ୍ପତିଙ୍କୁ ପୋଲିସ ଗିରଫ କରିଛି। ସେମାନେ ହେଲେ, ବରଗଡ଼ ପୌର ପରିଷଦ ଅଧିନ ୱାର୍ଡ଼ ନଂ-୫ ବିଶିପଡ଼ାର ସୁକାନ୍ତ ଓରଫ୍ ଟିଙ୍କୋଡୁ ସୁନା(୩୫) ଏବଂ ସ୍ତ୍ରୀ ରୋଜି(୩୫)। ପୋଲିସ ସେମାନଙ୍କ ପାଖରୁ ନଗଦ ୧ଲକ୍ଷ ୪ହଜାର ଟଙ୍କା, ଗୋଟିଏ ବ୍ୟାଙ୍କ ପାସ୍ବୁକ୍, ଗୋଟିଏ ଚେକବୁକ୍ ଜବତ କରିଛି। ଏ ନେଇ ଟାଉନ ଥାନା ପୋଲିସ ଏକ ମାମଲା(ନଂ-୩୬୩/୨୫) ରୁଜୁ କରିଛି। ଗିରଫ ଦମ୍ପତି ବ୍ରାଉନସୁଗାର ଧରି ସମ୍ବଲପୁର ପଟୁ ଆସୁଥିବା ସୂଚନା ମିଳିଥିଲା ଏବଂ ସେମାନଙ୍କୁ ପୋଲିସ ଧରିଥିଲା ବୋଲି ବରଗଡ଼ ଟାଉନ ଥାନାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ଇନ୍ଦୁରେଖା ପଶ୍ଚିମକବାଟ ସୂଚନା ଦେଇଥିଲେ। ଗିରଫ ଦମ୍ପତିଙ୍କ ବିରୋଧରେ ଆଗରୁ ମଧ୍ୟ ନିଶାଦ୍ରବ୍ୟ କାରବାର ନେଇ ଜିଲାର ବିଭିନ୍ନ ଥାନାରେ ମାମଲା ରହିଛି। ସୁକାନ୍ତଙ୍କ ବିରୋଧରେ ୭ଟି ଏବଂ ରୋଜିଙ୍କ ବିରୋଧରେ ଗୋଟିଏ ମାମଲା ରହିଥିବା ଅତିରିକ୍ତ ଏସ୍ପି କହିଥିଲେ। ଖବରଦାତା ସମ୍ମିଳନୀରେ ଏସ୍ଡ଼ିପିଓ ପଦାରବିନ୍ଦ ତ୍ରିପାଠୀ ମଧ୍ୟ ଉପସ୍ଥିତ ଥିଲେ। ଗତ ୧୮ତାରିଖ ଟାଉନ ଥାନା ପୋଲିସ ସହର ଉପକଣ୍ଠ ଘୁଲିପାଲି ଛକ ନିକଟରୁ ୫୦ଗ୍ରାମ ବ୍ରାଉନସୁଗାର ସହିତ ୩ଅଭିଯୁକ୍ତଙ୍କୁ ଗିରଫ କରିଥିଲା। ସେହିପରି ଗତ ୮ତାରିଖ ଅବକାରୀ ବିଭାଗ ଚଢ଼ାଉ କରି ୧୨.୩ ଗ୍ରାମ ବ୍ରାଉନସୁଗାର ସହିତ ଜଣେ ମହିଳାଙ୍କୁ ଗିରଫ କରିଥିଲା। ପୋଲିସ ଏବଂ ଅବକାରୀ ବିଭାଗର ଏଭଳି କାର୍ଯ୍ୟାନୁଷ୍ଠାନ ସତ୍ତ୍ୱେ ପୁଣି ଏଭଳି କାରବାର ଚାଲିଛି। ତେଣୁ ଜିଲା ପ୍ରଶାସନ ତଥା ପୋଲିସ ଓ ଅବକାରୀ ବେଳ ଥାଉଥାଉ ଠୋସ୍ ପଦକ୍ଷେପ ନ ନେଲେ ଆଗକୁ ଜିଲା ବ୍ରାଉନସୁଗାରର ହବ୍ ପାଲଟିବ, ଏହାକୁ ଏଡ଼ାଇ ଦେଇ ହେବ ନାହିଁ ବୋଲି ସବୁଠି ଆଲୋଚିତ ହେଉଛି।
