ଚମ୍ପୁଆ, ୧୦।୧୨(ଡି.ଏନ.ଏ.)-ଗରିବ ଆଉ କେହି ରହିବେ ନାହଁି। ଅସହାୟଙ୍କଠାରୁ ଆରମ୍ଭ କରି ବିଧବା, ଭିନ୍ନକ୍ଷମ ଏପରିକ ବୃଦ୍ଧ ମାନଙ୍କ ପାଇଁ ସରକାର ଅନେକ ଯୋଜନା କରିଛନ୍ତି। ମାତ୍ର ଏହାର ବିପରିତ ପ୍ରତିଫଳନ ଦେଖିବାକୁ ମିଳିଛି କେନ୍ଦୁଝର ଜିଲା ଚମ୍ପୁଆ ବ୍ଲକ ରଜିଆ ପଞ୍ଚାୟତର ଆଲୋକ ମୁଣ୍ଡାଙ୍କ କ୍ଷେତ୍ରରେ। ଅବିବାହିତ ଭଉଣୀ ନିରାସଙ୍କ କାନ୍ଧରେ ବୋଝ ପାଲଟିଛନ୍ତି ଆଲୋକ। ବାରଦୁଆରେ କାମ କରି ୫୦ ବର୍ଷିୟ ନିରାସ ଆଣୁଥିବା ଅର୍ଥରେ ଦୁଇ ପ୍ରାଣିଙ୍କ ପେଟ ପୁରୁ ନ ଥିବା ବେଳେ ସ୍ଥାନୀୟ ଖାଉଟି ମାନେ ଡିଲର ପାଖରେ ଛାଡିଯାଇଥିବା କିଛି ଚାଉଳ ଏହି ଭାଇଭଉଣୀଙ୍କ ଦାନା ସାଜିଥାଏ। ଆଜକୁ ୫ବର୍ଷ ହେବ ଯୁବା ବୟସରେ ଶାରୀରିକ ଅସୁସ୍ଥତା ହେତୁ କାମଦାମ କରି ନ ପାରି ଘରେ ପଡିରହିଲେ ଆଲୋକ। ଅର୍ଥ ଅଭାବ ହେତୁ ଚିକିତ୍ସା ହୋଇପାରିଲା ନାହଁି। ଧୀରେ ଧୀରେ ଆଲୋକଙ୍କ ଅଣ୍ଟା ନଇଁପଡିଲା। ଶେଷରେ ଚାଲିବା ତାଙ୍କ ପାଇଁ ଅସମ୍ଭବ ହୋଇ ପଡିବାରୁ ଭଉଣୀ ନିରାସ ହିଁ ତାଙ୍କ ସାହାରା ପାଲଟିଗଲା। ସକାଳ ହେଲେ ନିରାସ ଆଲୋକଙ୍କୁ ଘରୁ ଟେକିଟେକି ବାହାରକୁ ବାହାର କରି ନିତ୍ୟ କର୍ମ ଶେଷ କରାଇବା ପରେ ଦୁଇ ମୁଠା ଖାଦ୍ୟ ଦେଇ କାମକୁ ଚାଲିଯାଉଥିବା ବେଳେ କାମରୁ ଅପରାହ୍ନରେ ଫେରି ଘରକୁ ନେଇଥାଏ। କାଁ ଭାଁ ପାଖଲୋକ ଆଲୋକଙ୍କୁ ସହାୟତା ମଧ୍ୟ କରନ୍ତି। ଘର ନ ଥିବା ବେଳେ ଝାଟିମାଟି ଘର ଖଣ୍ଡିଏ ଉପରେ ପୁରୁଣା ଟିଣ ପକାଯାଇ ଛପର ଉଡିବା ଭୟରେ କାଠ ଓ ପଥର ଲଦାହୋଇଛି। ଆଜି ପର୍ଯ୍ୟନ୍ତ ଆଲୋକଙ୍କ ନାଁରେ ଭତ୍ତା, ଆବାସ ଓ ଖାଉଟି ସୁରକ୍ଷା କାର୍ଡ ନାହିଁ। ଏନେଇ ସ୍ଥାନୀୟ ସରପଞ୍ଚ ଜୟକିଶରୀ ନାଏକଙ୍କୁ ପଚାରିବାରୁ ମୁଁ ଏବିଷୟରେ ଅବଗତ ନ ଥିଲି ଆପଣଙ୍କ ଠାରୁ ଜାଣିବାକୁ ପାଇଲି ବୋଲି କହିଛନ୍ତି। ସେହିପରି ଚମ୍ପୁଆ ବିଡିଓ ନୁପୁର ଚାନ୍ଦଗୋଟିଆ କହିଛନ୍ତି ତୁରନ୍ତ ପଦକ୍ଷେପ ନିଆଯିବ।
