କେନ୍ଦୁଝର,୭ା୯ (ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ଦୌରାଜଜ୍ ଗୋପାଳ ଚନ୍ଦ୍ର ବେହେରା ସୋମବାର ଏକ ହତ୍ୟା ମାମଲାରେ ଶୁଣାଣି କରି ଅଭିଯୁକ୍ତ ପ୍ରସନ୍ନ ବାରିକଙ୍କୁ ଆଜୀବନ କରାଦଣ୍ଡରେ ଦଣ୍ଡିତ କରିଛନ୍ତି। ଏପରିକି କୋର୍ଟ ୧୦ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦେୟ ୬ମାସ ଅତିରିକ୍ତ ଦଣ୍ଡାଦେଶ ଶୁଣାଇଛନ୍ତି।
ସୂଚନା ଯୋଗ୍ୟ, ୨୦୨୩ ଅକ୍ଟୋବର ୬ ତାରିଖରେ ପଣ୍ଡାପଡ଼ା ଥାନା ଅନ୍ତର୍ଗତ ସୋମଗିରି ଗ୍ରାମର ନଡାମ ସାହିରେ ଘରୋଇ କଳିକୁ କେନ୍ଦ୍ର କରି ପ୍ରସନ୍ନ ବାରିକ ତାଙ୍କ ସକ୍ୟୁରିଟି ବନ୍ଧୁକରୁ ଅବିବାହିତା ଭଉଣୀ ମାଳତୀ ବାରିକଙ୍କୁ ଗୁଳି କରିଥିଲେ। ଫଳରେ ମାଳତିଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା।
ଘଟଣା ସମ୍ପର୍କରେ ଖବର ପାଇ ପଣ୍ଡାପଡ଼ା ପୋଲିସ ପହଞ୍ଚି ମାଳତୀଙ୍କ ରକ୍ତ ଜୁଡୁବୁଡୁ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଥିଲା। ହେଲେ ଅଭିଯୁକ୍ତ ଘଟଣାସ୍ଥଳରୁ ଚମ୍ପଟ ମାରିଥିଲେ। ହତ୍ୟାକାଣ୍ଡକୁ ନେଇ ଗ୍ରାମବାସୀ କିମ୍ବା ତାଙ୍କ ସମ୍ପର୍କୀୟ ଭୟରେ ଏତଲା ନ ଦେବାରୁ ପୋଲିସ ପକ୍ଷରୁ ଏକ ହତ୍ୟା ମାମଲା(ନଂ.୧୪୩/୨୦୨୩) ରୁଜୁ କରାଯାଇଥିଲା। ପଣ୍ଡାପଡା ଥାନା ପୋଲିସ ତଦନ୍ତ କରି ଅଭିଯୁକ୍ତଙ୍କୁ ଗିରଫ କରିଥିଲା। ପ୍ରସନ୍ନଙ୍କ ମା’ବାପାଙ୍କ ମୃତ୍ୟୁ ଘଟିଥିବା ବେଳେ କଳିଝଗଡ଼ାକୁ ତାଙ୍କ ସ୍ତ୍ରୀ ପିଲାଙ୍କୁ ନେଇ ବାପ ଘରକୁ ଚାଲିଯାଇଥିବା ଜଣାପଡିଛି।
୧୪ଜଣ ସାକ୍ଷୀ ଏବଂ ପୋଲିସର ତଦନ୍ତ ରିପୋର୍ଟକୁ ଆଧାର କରି କୋର୍ଟ ଉପରୋକ୍ତ ଦଣ୍ଡାଦେଶ ଶୁଣାଇଛନ୍ତି। ମାମଲାର ତଦନ୍ତ ଅବିନାଶ ପରିଡା କରୁଥିବା ବେଳେ ସରକାରଙ୍କ ପକ୍ଷର ପିପି ଭାବେ ପ୍ରଦୀପ କୁମାର ଦାସ ମାମଲା ପରିଚାଳନା କରୁଥିଲେ।
