ବଲାଙ୍ଗୀର,୨୨।୧୧(ସୁନିଲ କୁମାର ମହାନ୍ତି/ଭୁବନେଶ୍ୱର ବାରିକ): ବଲାଙ୍ଗୀର ଜିଲା ଲାଠୋର ଥାନା ଅଧୀନ ସାହାଜପାଣି ଗ୍ରାମର ଅନିଲ ମେହେର(୨୯) ନାମକ ଜଣେ ହତ୍ୟା ଅଭିଯୁକ୍ତଙ୍କୁ ୫ ବର୍ଷ ପରେ ପୋଲିସ ବେଙ୍ଗାଲୁରୁରୁ ଗିରଫ କରିଛି। ଅନିଲଙ୍କୁ ପୋଲିସ ଶୁକ୍ରବାର ପାଟଣାଗଡ଼ କୋର୍ଟ ଚାଲାଣ କରିଛି। ମିଳିଥିବା ସୂଚନା ଅନୁସାରେ, ଅନିଲଙ୍କ ନିଜ ବଡ଼ଭାଇ କ୍ଷୀରଧର ମେହେରଙ୍କ ସହ ପଡୁ ନ ଥିଲା। ଦୁଇଭାଇଙ୍କ ମଧ୍ୟରେ ବାରମ୍ବାର ଝଗଡ଼ା ହେଉଥିଲା। ଗତ ୨୦୨୧ ଅଗଷ୍ଟ ୪ ସନ୍ଧ୍ୟାରେ ବଡ଼ଭାଇ ଘରେ ଅନୁପସ୍ଥିତ ଥିବା ସୁଯୋଗ ନେଇ ଭାଉଜ ସୂର୍ଯ୍ୟକାନ୍ତି ମେହେର(୩୮)ଙ୍କୁ ଏକ ଧାରୁଆ ଛୁରିରେ ଆକ୍ରମଣ କରି ଘରୁ ଫେରାର୍ ହୋଇଯାଇଥିଲେ। ସୂର୍ଯ୍ୟକାନ୍ତିଙ୍କୁ ସଙ୍ଗେସଙ୍ଗେ ପାଟଣାଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। କ୍ଷୀରଧର ଘଟଣାକୁ ନେଇ ଲାଠୋର ଥାନାରେ ଏତଲା ଦେଇଥିଲେ। ତାଙ୍କ ଏତଲାକୁ ଭିତ୍ତିକରି ଥାନାରେ ଏକ ମାମଲା (ନଂ.୧୦୫/୨୦୨୧) ରୁଜୁ ହୋଇଥିଲା। ପୋଲିସ ଅଭିଯୁକ୍ତଙ୍କୁ ଖୋଜି ଚାଲିଥିଲା। ୫ ବର୍ଷ କାଳ ଅନିଲ ପୋଲିସ ଆଖିରେ ଧୂଳିଦେଇ ବେଙ୍ଗାଲୁରୁ ଚାଲିଯାଇଥିଲେ। ସେଠାରେ ସେ ଜଣେ ଯୁବତୀଙ୍କୁ ବିବାହ ହୋଇ ଏକ କମ୍ପାନୀରେ କାମ କରୁଥିଲେ। ୫ ବର୍ଷ କାଳ ପୋଲିସ ଅନିଲଙ୍କୁ ଗିରଫ କରିବାରେ ବିଫଳ ହେବାରୁ ପାଟଣାଗଡ଼ କୋର୍ଟରୁ ଅନିଲଙ୍କ ନାମରେ ୱାରେଣ୍ଟ ବାହାରିଥିଲା। ଉକ୍ତ ୱାରେଣ୍ଟକୁ ଭିତ୍ତିକରି ବର୍ତ୍ତମାନର ଲାଠୋର ଥାନା ଅଧିକାରୀ ରମାକାନ୍ତ ସାହୁ ତଦନ୍ତ ଆରମ୍ଭ କରିଥିଲେ। ସେ କୌଣସି ସୂତ୍ରରୁ ଖବରପାଇ ୪ ଜଣିଆ ପୋଲିସ ଟିମ୍କୁ ନେଇ ବେଙ୍ଗାଲୁରୁ ଯାଇଥିଲେ। ସେଠାକୁ ଯାଇ ଅନିଲଙ୍କୁ ଗିରଫ କରି ଲାଠୋର ଥାନାକୁ ଆଣିଥିଲେ।
Dharitri – Odisha’s No.1 Odia Daily
